Balligi Idiay European Court of Human Rights

IDI ENERO 11, 2007, ti European Court of Human Rights idiay Strasbourg, Francia, inyetnagna ti nagkaykaysa a desision a pabor kadagiti Saksi ni Jehova idiay Russia iti kasoda maibusor iti Russian Federation. Intandudo dayta a desision ti wayawaya ti relihion para kadagiti Saksi ni Jehova ken ti kalinteganda a mabista iti di mangidumduma a pamay-an. Ammuentayo no apay a timmaud dayta a kaso.

Adda kongregasion dagiti Saksi ni Jehova iti siudad ti Chelyabinsk, Russia, nga umel ti kaaduan kadagiti kamengna. Ti paggigimonganda ket maysa nga auditorium nga ab-abanganda manipud iti maysa nga eskuelaan dagiti bokasional a kurso. Idi Domingo, Abril 16, 2000, ti gimongda ket impasardeng ti tserman wenno ti Komisioner ti Human Rights Commission iti rehion agraman ti dua a nangato ti ranggoda a polis ken maysa a nakasibilian a lalaki. Gapu iti panangidumduma, nangruna iti biang ti Komisioner, napasardeng ti gimong gapu iti pinarparbo nga akusasion nga ilegal dayta a panaggigimong. Idi Mayo 1, 2000, nawaswas ti kontrata ti pannakaabang ti auditorium.

Nangyuli iti darum dagiti Saksi ni Jehova iti piskal ti ili ti Chelyabinsk, ngem saan a naaksionan dayta. Ti Konstitusion ti Russia ken ti Convention for the Protection of Human Rights and Fundamental Freedoms (Tulagan Agpaay iti Pannakasalaknib Dagiti Kalintegan ti Tao ken Kangrunaan a Wayawaya) garantisaranna ti wayawaya ti relihion ken panagtataripnong. Isu a nayuli ti darum iti maysa a korte ti distrito sa naipasarunson ti panagapelar iti korte ti rehion. Kasakbayanna, idi Hulio 30, 1999, inkeddeng ti Korte Suprema iti sabali pay a kaso a “maitunos iti Linteg ti Russia maipapan iti wayawaya ti konsiensia ken narelihiosuan a panagtataripnong, ti sasao nga ‘awanan iti lapped’ kaipapananna a saanen a kasapulan ti pammalubos, wenno nasaksakbay nga autorisasion dagiti sekular nga autoridad, iti pannakaangay dagiti narelihiosuan a seremonia iti luglugar a nailatang [para iti dayta a panggep].” (Isuda ti nangikabil kadagiti braket.) Iti laksid dayta a pangngeddeng, ti korte ti distrito ken rehion imbasurada ti darum dagiti Saksi.

Idi Disiembre 17, 2001, ti kaso ket nayuli iti European Court of Human Rights. Nabista dayta idi Setiembre 9, 2004. Ti sumaganad ket naadaw manipud iti pinal a desision ti Korte:

“Natakuatan ti Korte a nalapdan ti kalintegan ti aplikante a mangalagad iti wayawaya ti relihion agsipud ta idi maika-16 ti Abril 2000, dagiti opisial ti Gobierno pinasardengda ti narelihiosuan nga asamblea a nasapsapa ngem iti naikeddeng a pannakaileppasna.”

“Nabatad nga awan ti legal a nakaibasaran ti panangpasardeng iti maysa a narelihiosuan a taripnong a maang-angay iti pasdek a legal a naabangan agpaay iti dayta a panggep.”

“Nadlaw [ti Korte] a kadagiti kaso nga inusig ti Korte Suprema ti Russia, di pulos nabalbaliwan ti pangngeddeng a dagiti narelihiosuan nga asamblea ket saan a masapul nga agkiddaw iti pammalubos kadagiti autoridad, wenno din masapul a maipakaammo kadagiti autoridad.”

“No kasta, nasalungasing ti Artikulo 9 [wayawaya ti relihion] iti Convention for the Protection of Human Rights and Fundamental Freedoms gapu iti panangpasardeng ti Komisioner ken ti kakaduana iti narelihiosuan a miting dagiti aplikante idi maika-16 ti Abril 2000.”

“Natakuatan ti Korte a dagiti korte iti distrito ken rehion saanda a natungpal ti annongenda . . . a mangipakita a nabista dagiti partido iti patas ken saan a mangidumduma a pamay-an. Nasalungasingda . . . ti Artikulo 6 ti Convention [kalintegan a maaddaan iti patas a pannakabista].”

Agyaman dagiti Saksi ni Jehova iti Dios gapu iti impaayna kadakuada a balligi idiay European Court of Human Rights. (Salmo 98:1) Kasano kasaknap ti epekto dayta a desision ti Korte? Kastoy ti kinuna ni Joseph K. Grieboski, a presidente ti Institute on Religion and Public Policy: “Maysa manen dayta a nakapatpateg a desision a mangapektar iti wayawaya ti relihion iti intero a Europa, agsipud ta dakkel ti epekto dayta a desision kadagiti kalintegan dagiti relihion iti amin nga estado a masakupan ti European Court of Human Rights.”