Agbibiagak Gapu iti Musika
TI KASAPAAN a pakalaglagipak iti musika agsubli iti apok a baket. Tunggal Domingo ti intero a pamilia agtitipon iti balayna a maipaay iti pangmalem. Agtoktokar ti musika iti agmalmalem. Addada dagiti folk songs dagiti taga Ireland, light opera wenno ababa a musikal a pabuya, dagiti pabuya iti musika a Broadway, ken dadduma pay a musika.
Idi agarup walo ti tawenko, nangalaak kadagiti leksion iti guitara. Ngem gaput’ kurang ti interesko, di nagbayag simmardeng dagiti leksion. Ngem, bayat dagidiay a tiempo, no makangngegak iti banda ti sangakaarrubaan nga agsansanay, dayta ti mangparagsak kaniak.
Kadagiti sumaganad a sumagmamano a tawtawen, naginteresak iti musika a pop, a maikuyog iti rock. Kas kadagiti dadduma iti kaputotak, kankanayon nga agan-andar ti radio. Kalpasanna rinugiak manen ti nangala kadagiti leksion iti guitara ket di nagbayag agtoktokarakon iti lokal a banda. Nangrugikami nga agtokar a kankanayon kadagiti pagsasalaan iti lokal a paruko. Kabayatanna, insublatko ti bajo ket di nagbayag gatgatangekon dagiti amin nga alikamen a maikuyog iti dayta.
Bayat dayta met laeng a tiempo, adda napasamak kaniak. Nangrugi a makitak ti kinamanaginsisingpet ti iglesia, bayat ti pannakilangenmi iti lokal a padi ti parokia a nangtangdan kadakami a maipaay kadagiti panagsasala. Ngem idi saanko pay nga ammo a daytoyto ti mangapektar a naimbag iti panagbiagko kamaudiananna.
Ti Aglikmut
Bayat dagidiay a tawtawen iti panagtokar iti rock ’n’ roll, kanayon ti panagbiahemi. Adu a bar ken pagsasalaan iti ruar ken uneg ti siudad ti Nueva York ti namagbalin kadakami nga ukopado bayat dagiti sumagmamano a tawtawen, ngem ti aglikmut saan a nasayaat. Adda nakaad-adu nga imoralidad, siwayawaya a panagusar iti droga, ken ti makaupay unay nga atmospera wenno aglikmut.
Addaankami iti bassit a pasurot a buklen dagiti junkies ken acidheads (dagiti adikto iti heroin ken managusar iti LSD). Awan aniamanna kadakami aniaman dagitoy. Kayatda ti musikami ket kayatmi ti panangsuportarda. Malagipko maysa a rabii idi a ti maysa a lalaki ti rimmuar iti klab nga agririaw iti kasta unay. Isut’ agar-arapaap gapu iti LSD ket buybuyaennakami a naan-anay a naipamaysa iti musika, iti mental ken pisikal. Daytat’ nalabesen a maipaay kenkuana!
Nupay makagunggun-odkami iti pannakabigbig ket mangrugrugin a mangaramidkami kadagiti konsierto, nangrugin a marurodak iti isuamin a banag. Naupayak a naimbag iti kinamusiko. Ket dagiti dakes nga ug-ugali a nanglikmut kaniak ti nangrugin a nangapektar kaniak, a nangiturong kaniak nga agtomar iti droga. Gapu amin daytoy, ti panagbiagko kumarkaro ti kinalidayna ken makaupay. Gapuna rinugiak ti nagsapul iti mariknak a nasaysayat a kita iti musika. Isu dayta idi ti pannakasarakko iti klasikal a musika.
Panangitultuloy iti Karera iti Musika
Bayat ti panangrugik nga agimdeng iti klasikal a musika, masarsarakak ti naiduma a lubong. Idi napalabas, kanayon nga addaankami iti dakkel a panagraem iti musiko iti jazz a mabalinna ti agputar a naimbag, ngem ditoy, babaen iti musika a klasikal, ti maysa ti masapul ti mangisurat iti pinutarna iti papel. Iti dayta met la a tiempo, itunosna dayta iti orkestra a simponia. Dayta ti pudno a musiko!
Itan tarigagayakon ti mangitulutloy iti daytoy a kita iti musika. Gapuna simrekak iti kolehio ti estado ket rinugiak ti nagadal iti musika. Ti instrumentok isu ti double bass. Masursurokon ti agkanta a dagus bayat ti panangmatmatko iti nota, agkanta iti grupo, agadal iti harmonia, ken mangparang-ay kadagiti kangrunaan a pamay-an iti piano. Mariknak a mangrugrugin kamaudiananna a masursurok ti maysa a banag. Kadagiti sumaganad a sumagmamano a tawtawen, intultuloyko daytoy a pamay-an.
Kalpasanna nangaramidak iti sabali a pangngeddeng. Rumangrang-ayak, pudno, ngem mariknak a nasaysayaat pay ti maaramidak. Gapuna inkeddengko a padasek ti sumrek iti konserbatorio. Ngem ammok nga adu ti kurang iti musikal a nalikudak. Naladawen ti panangrugik. Iti daytoy a tay-ak ti musika, dagidiay a mangaramid iti karera iti dayta kaaduanna ti masubuan iti dayta manipud kinaubing. Gapuna inyad-adok ti panawen ti panagsanayko agingga iti uppat nga oras iti inaldaw.
Nasubokak ket naawat iti Manhattan School of Music idiay Nueva York. Mariknak a mabalinkon a parang-ayen ti kinamusikok. Inyad-adok ti tiempo ti panagsanayko agingga iti innem nga oras iti inaldaw. Kankanayon ti iyaay ti guardia iti rabii a mangibaga kaniak nga idulinkon dagiti alikamenko agsipud ta isut’ agserran a maipaay iti rabii. Kalpasanna agawidakon babaen iti subway, ket iti sumaganad nga aldaw maulit manen dayta nga aramid.
Bayat ti panaglabas ti tawen, mariknak nga adu ti masursurok. Ngem inkeddengko ti umakar manipud iti Manhattan School of Music a mapan iti Juilliard School, nga adda met laeng idiay Siudad ti Nueva York. Daytoy ket nalatlatak nga eskuelaan, nupay no ti atmospera sadiay ket ad-adda a mannakisalisal. Gapuna iti sumaganad a kalgaw nasubokak ket naawatak. Ngem iti daytoy a tiempo adda manen sabali a napasamak iti kasasaad ti panagbiagko.
Adda Banag a Kurang
Makitayo, bayat dagitoy amin a tawtawen, agtomtomarak iti droga. Nupay kasta, ti parikut a ta dagiti panagar-arapaap gapu iti droga nagbalinda a saanen a makapnek. Nakagtengak iti punto a ti kakaisuna a banag nga addaan pateg iti panagbiagko isu ti musikak.
Nagbalinak met a managsolsolo ket literal a manganak laeng, maturog, ken mapan ageskuela. Ket kumarkaro ti panagdanagko. Umay dagiti dati a gagayyem iti balay, ket diak pay mabaelan ti makisarita kadakuada. Diakon kabaelan ti makilangen kadagiti tattao.
Ania ti mabalinko nga aramiden? Itultuloyko nga aramiden ti tarigagayak, ngem iti kaungan ti riknak adda banag a kurang. Rinugiak ti nagusisa kadagiti relrelihion iti Daya a maipaay iti panangiturong ken talna iti panunot. Sapsapulek ti awagak a kinapudno, ngem adda kasta unay a kinamanaginsisingpet, ken adu unay a tattao a di mangikankano maipapan iti kinapudno. Gapuna diak kayat ti maaddaan iti aniaman a pakainaigan kadakuada wenno iti siasinoman.
Ti biagko nagbalin a kumarkaro ti kinalidayna. Kalpasanna maysa a rabii, kalpasan ti panagtalinaedko agingga iti kagudua iti rabii tapno agsanay, mariknak a ngangnganiakon agmauyong. Idin nagkararagak iti Dios, siasinoman wenno aniaman dayta, a dumawdawat iti tulongna.
Pannakasapulko iti Pudno a Tarigagayak
Sumagmamano a tiempo iti napalabas, dua a gagayyemko ti nakasabet kadagiti Saksi ni Jehova. Dagiti gagayyemko rinugianda ti nagsarita kaniak maipapan kadagiti masursuroda, ngem awan ti aniaman a tarigagayak iti dayta! Idi nakasabetak iti maysa kadagiti Saksi ni Jehova, isut’ nakisarita kaniak maipapan iti Biblia ket impakitaannak ti literatura a mangilawlawag iti Biblia. Ngem diak inkankano dayta, a kasla dayta ket saan a napateg a basaen.
Maysa a rabii, sumagmamano a lawas kalpasan ti panagkararagko a maipaay iti tulong ti Dios, agaw-awidak manipud iti eskuelaan iti agarup alas onse, ket ni Tom, ti Saksi a makisarsarita idi kaniak, ti nangilugan kaniak iti taxina. Rinugianna manen ti nagsarita kaniak maipapan iti Biblia, ket kasta unay ti panangliklikko kenkuana. Ngem, iti unegko ammok a ti ibagbagana ket pudno! Nagimtuodak kadagiti adu a naririkut a salsaludsod, ngem siaalumamay ken siuumiso a sinungbatannak. Nagbiahekami iti lima nga oras ket intultuloymi ti nagsarita!
Bayat ti panagsaritami, ti pannakariribuk a napadasak idi napalabas a sumagmamano a tawen ti nangrugin a nangpanaw kaniak. Pudno a nangrugin a naawatak no ania ti padpadasen ni Tom nga ibaga kaniak kadagitoy amin a bulbulan. Itan, dayta ket kasla emosional unay a kapadasan, ngem pudno a saan a kasta. Dayta ket maysa laeng a pannakaawat iti kinapudno iti pudno a kaipapananna. Ti imbaga ni Tom pudno nga addaan iti pateg. Kas pangarigan, nabigbigko kas intudona, a ti sangatauan saanda a nagballigi iti amin a pamay-an a nangrisot kadagiti kangrunaan a parparikut. Awan ti napolitikaan, ekonomiko, wenno relihiuso a sistema daytoy a lubong a nakaiturong iti kappia, kinaragsak, salun-at ken biag a kasapulan unay ti sangatauan. Ti laeng gobierno nga insuro ni Jesus ti makaaramid iti daytoy.—Jeremias 10:23; Mateo 6:9, 10.
Kasta met, ti panangmatmat iti Biblia no kasano ti pannakilangen ti Dios kadagiti tattao ket makapabang-ar unay. Saanna a matmatan ti maysa a tao sigun iti makinruar a buya ket saanna a kitaen ti maysa a nasionalidad a natantan-ok ngem ti sabali. Ti napateg isu ti isip ken puso ti tao.—Aramid 10:34, 35.
Ti kinatan-ok a nangrugi a nasarakak kadagiti Saksi ti nangawis kaniak iti kasta unay. Gapuna rinugiak ti nagatender kadagiti gimgimongda iti maysa kadagiti Kingdom Hall da. Sadiay, nakadaldalus ti itsurada ken nakadaydayaw. Dagus a nakitak ti pannakasapul ti panangdalusko iti panagbiagko ken isardengko ti panagtomar iti droga. Siraragsakak a mangaramid iti daytoy, ta ti dati a panagbiagko ti napaneknekan a saan a naballigi!
Musika Saanen a ‘Numero Uno’
Kalpasan ti panagbakasionko iti kalgaw, nagsubliak iti eskuelaan a maipaay iti sabali a semestre. Ngem ita naiduman ti panangmatmatko kadagiti bambanag. Ti tarigagayko a rumang-ay kas maysa a musiko saanen a nabileg a kas idi. Ammokon a saan laeng a kastoy ti biag ket ti musika saanen nga isu ti agbalin a ‘numero uno.’
Maysa nga aldaw idiay Kingdom Hall, nakitak ni Tom nga addaan iti iggem a porma iti aplikasion. Dayta ket maipaay iti iseserrek iti amin a tiempo a ministerio. Ti rag-ona ti nangtulong kaniak a mangammo no ania ti pudno a tarigagayak iti biagko. Siak, met, tarigagayak ti agserbi ken Jehova iti amin-tiempo, a mangipakpakaammo kadagiti dadduma kadagiti nakaskasdaaw a bambanag a nasursurok maipapan iti panggepna a mangyeg iti panungpalan daytoy saan a naballigi a lubong ken mangsukat iti dayta iti naparaisuan a baro a sistema.—Salmo 37:10, 11, 29; Lucas 23:43.
Nalawag met a nalagipko ti tignay ni tatangko iti pangngeddengko. Dinanogna ti lamisaan ket sititibker nga imbagana kaniak a mapapanawak iti balay no panawak ti panageskuelak. Ngem pudno a pinanawak. Dua a bulan kalpasanna nabautisaranak kas simbolo ti dedikasionko iti Dios, ket di nagbayag kalpasanna simrekak iti amin-tiempo a ministerio. Kamaudiananna, kalpasan ti sumagmamano a tawen, ni tatangko siayat a nangawis kaniak nga agsubli iti pagtaengan, gaput’ makitana a saanko nga isuko ti pangngeddengko nga agserbi ken ni Jehova.
Idin maysa a kabbaro a pribilehio ti nailukat kaniak. Idi 1979 nagaplikarak ket naawatak nga agserbi idiay hedkuarter dagiti Saksi ni Jehova idiay Nueva York, a maawagan Bethel (“balay iti Dios”). Dayta ti pudno a maysa kadagiti kararagsakan iti biagko. Rinaraemko dagidiay a matalek a lallaki ken babbai, sumagmamano a riboda, nga agtartrabaho sadiay. Itan addaanakon iti pribilehio nga agserbi a kaduada. Adu kadakuada ti mabalin a nangpili koma iti nasayaat pagsuelduanna a karera iti daytoy a lubong ngem inkeddengda ti agtalinaed iti amin-tiempo a panagserbi iti Namarsua.
Ket, saan met a nalaka ti biag iti panagserbi idiay Bethel! Ngem pulos a saanko a ninamnama a kasta. Masapul ti bassit a panagsakripisio. Adda adu a napapateg a bambanag nga aramiden, masapul nga ipaaytayo dagiti bagbagitayo a sipapasnek.
Ti panagserbi iti Bethel insuronak a ti pudno a kinaragsak saan a magun-odan babaen iti panangtungpal kadagiti personal a tarigagay. Dayta agtaud manipud iti panagserbi iti Namarsua, isu a makaammo a siuumiso no ania ti kasapulantayo tapno maaddaan ti pudpudno a kinaragsak. Sansanayek pay laeng ti musikak ngem iti bassit laeng a paset iti tiempok isu a dati nga ipapaayko iti dayta. Kasta met, no dadduma agtokarak a maipaay kadagiti gagayyemko ken addaanak pay iti pribilehio nga agtokar a kadua ti maysa nga orkestra a Saksi. Dayta ti namagtalinaed kaniak iti musika a pagay-ayatko.
Panangikabil ti Musika iti Lugarna
Ania a balakad ti mabalinko nga ipaay iti agtutubo a managayat iti musika? Bueno, laglagipenyo a ti musika ket mannangimon unay a Mutya (maysa a maipagarup nga annak iti pagano a dios a ni Zeus). Ti karera iti dayta kaligagumanna ti naipamaysa a debosion. Iti daytoy makisalisal iti Namarsua ken ti panagaramid iti pagayatanna. Ti musika mabalin met a ngangngani kasla maysa a sakit. Nakalaklaka ti agbalin a nalabes ti pannakairamanna iti dayta. Nakakitaakon kadagiti musiko a nangrugi a nagadal iti Biblia ngem indianda dayta agsipud ta dayta bianganna ti musikada. Anian a minamaag a panangisukat, idinto a ti panagserbi iti Dios saan laeng a makaipaay iti talna ken pannakapnek itan no di ket biag nga agnanayon iti maysa a paraiso a daga iti asidegen a masannguanan!
Sipaprangkesa, matmatmatakon dagiti musikal nga institusion kas moderno-aldaw a templo iti panagdayaw a mangkalikagum kadagiti tattao a mangipamaysa iti intero a panagbiagda iti musika. Ngem dayta ket panangaramid iti maysa a dios manipud iti dayta, ket sigurado a daytoy saan nga anamongan ti Namarsua. Pudno, ti musika ket sagut manipud ken Jehova, ngem masapul a maikabil iti lugarna.
Kasta met, laglagipentayo a ti kita ti musika a tokarentayo wenno imdengantayo apektarannatayo, a maipaay iti pagimbagan wenno pagdaksan. Gapuna masapul a napilitayo. Ti musika masapul a makagunggona ken makapabileg, ngem ita adu kadagitoy ti makaikulbo, agpada iti espirituna ken iti sasaona. No tarigagayanyo ti makaruso kadagiti pamunganayan iti musika, awan ti nasaysayaat ngem ti panangusar iti pagkantaan nga impablaak dagiti Saksi ni Jehova. Dayta naglaon kadagiti nasasayaat a musika ken addaan kadagiti amin a kangrunaan ken nasken a bambanag iti harmonia.
Ti Dios inikkannatayo ti nakaskasdaaw a sagut iti musika. Ti makin-uneg a rag-o a magun-odan ti maysa manipud iti panagkanta a naimbag ken addaan iti manangapresiar a managdengngeg ket makagunggona. Ngem tapno siuumiso a tagiragsaken dayta, masapul a maikabil iti lugarna—iti likudan ti panagdayaw iti Naindaklan a Namarsua, ni Jehova.—Kas insalaysay ni William Mullane.
[Blurb iti panid 14]
Rinugiak ti nagsapul iti mariknak a nasaysayaat a kita iti musika
[Blurb iti panid 15]
Umay dagiti dati a gagayyem iti balay, ket diak pay mabaelan ti makisarita kadakuada
[Blurb iti panid 17]
Ti kinatan-ok a nangrugi a nasarakak kadagiti Saksi ti nangawis kaniak iti kasta unay
[Ladawan iti panid 16]
Pagrag-oak pay laeng ti agtokar a maipaay kadagiti gagayyemko ket no dadduma addaanak ti pribilehio nga agtokar a kadua ti maysa nga orkestra a Saksi