“Agnanayon a Kinabirhen ni Maria”—Ti Epektona
DADDUMA a managbasa ti masdaaw, ken makigtot pay, a makakita iti tema “ti agnanayon a kinabirhen ni Maria” a mausig iti sidong dagiti pangkaaduan a tema a “Ti Iglesia Katolika—Ti Panangmatmatna iti Sekso.” Ti panggepmi ket pudno a saan a tapno mangsair iti rikna dagiti Katoliko wenno mangipababa ken Maria. Kinapudnona, kasta unay ti panagraemmi kenkuana kas maysa kadagiti matalek nga ad-adalan ni Kristo.
Kasta met, naan-anay nga umanamongkami a ni Maria ket birhen idi impasngayna ni Jesus. (Mateo 1:18-23) Ti parikut ket, Nagtalinaed aya ni Maria a birhen iti isuamin a naindagaan a panagbiagna?
Adu a Katoliko ti Agduadua
Dagiti sursurat a Katoliko ipalgakda a dagiti Katoliko nga eskolar agduaduada a nagtalinaed ni Maria a birhen iti isuamin a panagbiagna. Ti Biblia a mismo sumagmamano a daras a dinakamatna dagiti “kakabsat a lallaki” ken “kakabsat a babbai” ni Jesus. (Mateo 12:46, 47; 13:55, 56; Marcos 6:3; Lucas 8:19, 20; Juan 2:12; 7:3, 5) Dadduma a Katoliko, nupay kasta, kunaenda a dagitoy a sasao ti mangibilang kadagiti “kakabagian,” kas kakasinsin. Pudno aya daytoy?
Ti The New Catholic Encyclopedia kunaenna: “Dagiti Griego a sasao . . . a nausar a mangibilang iti relasion iti nagbaetan ni Jesus ken dagitoy a kakabagian addaanda iti kaipapanan a pudno a kakabsat a lallaki ken babbai iti Griego-pagsasaona a lubong idi panawen dagiti Ebanghelisador ket gagangay a kastoy ti panangipapan dagiti Griego a managbasa.” Kasta met, ti The New American Bible, maysa a patarus a Katoliko, aminenna iti footnote iti Marcos 6:1-6, a sadiay dagiti kakabsat a lallaki ken babbai ni Jesus ti nadakamat: “Saan koma a timmaud ti parikut maipapan iti pannakaipatarus ditoy no saan a gapu iti pammati ti iglesia iti agnanayon a kinabirhen ni Maria.”
Nalawag nga ipakita ti Biblia a ni Maria addaan kadagiti dadduma nga annak malaksid ken ni Jesus; ti sursuro ti Iglesia Katolika nga isut’ awanan kadagiti dadduma nga annak ti nangpataud iti suppiat. Ti Katoliko nga autor a ni J. Gilles, a naan-anay a nangusig kadagiti amin a Nainkasuratan a pammaneknek maipapan iti tema, ti nagkonklusion: “Iti ababa ken nalawag a pagsasao, gapu iti kinamatalek ti Iglesia [Katolika], patiek a magupgopko ti panangusigko kas iti sumaganad. . . . Ti UPPAT A PAGALAGADAN TI EBANGHELIO mangipaayda iti agtutunos a pammaneknek . . . a ni Jesus addaan kadagiti pudno a kakabsat a lallaki ken babbai iti pamiliana. . . . Iti sidong daytoy nga agtutunos a pammaneknek ti gagangay a sasaaden [iti Iglesia Katolika] ti kasla nakapuy ken narasi.”
Gapuna no saan a mangipaay ti Biblia iti pammaneknek iti “agnanayon a kinabirhen ni Maria,” sadino ti nangrugian daytoy a pammati?
Nagtaudan ti Pammati
“Kadagiti sumagmamano a relrelihion idi ugma,” kuna ti padi a Jesuita a ni Ignace de la Potterie, “ti kinabirhen addaan ti sagrado a kinapateg. Dadduma a diosa (da Anath, Artemis, Athena) maawaganda birhen.” Ngem, ania ti pakainaigan dayta ken Maria? Ilawlawag ti padi a Katoliko a ni Andrew Greeley: “Ti simbolo ni Maria inaigna ti Kinakristiano a direkta kadagiti relrelihion ti ina a diosa idi ugma.”
Ti propesor iti historia ti iglesia a ni Ernst W. Benz ti nagkomento iti daytoy a pannakainaig kadagiti pagano a relihion. “Ti panangidayaw iti ina ti Dios,” insuratna iti The New Encyclopædia Britannica, “nakaawat iti pammaregta idi a ti Iglesia Kristiana nagbalin nga iglesia ti imperio iti sidong ni Constantino ket ti kaaduan a pagano ti simrek iti iglesia. . . . Ti debosion [dagiti tattao] ken ti relihiuso a pannakaammo ti naporma kadagiti adun a milenio agingga iti itataud ti kulto iti diosa ti ‘natan-ok nga ina’ ken ti ‘nadibinuan a birhen,’ maysa a pammati a nagtaud manipud pay iti daan a nalatak a relrelihion iti Babilonia ken Asiria . . . Nupay adda di nasayaat a pannakaipapan iti tradision ti Ebanghelio, ti panagdayaw ti kulto iti nadibiduan a birhen ken ina nakasarak iti kabbaro nga ebkas iti panangdayaw ken Maria iti Iglesia Kristiana.”
Ngem ania ti nangtignay iti Iglesia Romana a mangibagay ken manganamong iti kulto ti “natan-ok nga ina” a diosa ken ti “nadibinuan a birhen”? Ti maysa a rason, ket ti “kaaduan a pagano” a sumrek iti iglesia tarigagayanda dayta; saanda a mababain iti iglesia a mangdayaw iti ‘natan-ok a birhen nga ina.’ “Idiay Egipto,” napaliiw ni Propesor Benz, “ni Maria, iti nasapa pay a tiempo, maidaydayawen iti sidong ti titulo a nangisikog iti Dios (Theotokos).” Gapuna ti kulto ti “nadibinuan a birhen” ti naanamongan tapno awatenna dagiti “kaaduan a pagano” a sumsumrek iti iglesia.
Naipaay ti pammaregta iti panangdayaw ken Maria idi immuna a Konsilio ekumenikal iti Nicaea idi 325 K.P. Kasano a kasta? Bueno, ti doktrina a Trinidad naaramid idi a maysa nga opisial a sursuro a Katoliko, a ti Kredo ti Nicaea ti nangiwaragawag ken Jesus a Dios. Maipagarup a daytoy ti namagbalin ken Maria a “nangisikog iti Dios,” wenno “ina ti Dios.” Ket kinuna ni Propesor Benz: “Ti Konsilio iti Efeso (431) ti nangitan-ok iti daytoy a saad a maysa a sursuro a pagalagadan.” Ti sumaganad met nga addang isut’ panamagbalin met ken Maria nga “agnanayon a birhen.” Daytoy napasamak idi a ti titulo nga “agnanayon a Birhen” ti naited ken Maria idiay maikadua a Konsilio ti Constantinople idi 553 K.P.
Nagbanagan dagiti Sursuro
Ti Propesor iti Yale a ni J. J. Pelikan nagsurat: “Ti irarang-ay iti kapanunotan nga ascetiko wenno panangmedmed ti bagi a panagbiag a maipaay iti relihiuso a panggep iti uneg ti iglesia ti nangtulong a mangsuportar iti daytoy a panangmatmat ken Maria kas modelo iti ingganat’ tungpal-biag a kinabirhen.” Daytoy nga “ascetiko a kapanunotan” nabatad met iti itataud ti monasticismo ken di panagasawa kadagiti adu a siglo a simmaganad iti konsilio ti Nicaea. Ginasgasut a ribo kadagiti Katoliko a papadi, mongha, ken mamadre ti nangikagumaan—dadduma naballigi, adu ti saan a naballigi—ti nangmedmed iti panagbiagda gapu ta ti iglesia isurona a ti sekso ken ti kinasanto saan nga agkabagay.
Kangrunaanna, ti kangrunaan nga autoridad iti iglesia, ni “San” Agustin, “ti nanginaig iti orihinal a basol iti seksual a kinaderrep.” Pudno, kaaduan a moderno-aldaw a Katoliko saandan a mamati iti daytoy a panangipatarus. Ngem saan kadi a ti doktrina iti agnanayon a kinabirhen ni Maria ken ti linteg ti inkapilitan a di panagasawa dagiti papadi mangpataud iti kapanunotan a ti sekso saan a nadalus? Ken saan kadi a ti naulit manen a pagalagadan ti Vaticano maipapan iti deborsio ken ti pananglapped iti panagsikog ti nangpakaro iti parikut dagiti minilion a Katoliko?
Napatpateg pay, ania ti panangmatmat ti Biblia maipapan kadagiti bambanag maipapan iti sekso?
[Blurb iti panid 8]
“Ti UPPAT A PAGALAGADAN TI EBANGHELIO mangipaayda iti agtutunos a pammaneknek . . . a ni Jesus addaan kadagiti pudno a kakabsat a lallaki ken babbai.”—Katoliko nga autor
[Ladawan iti panid 8]
“Ti simbolo ni Maria inaig na ti Kinakristiano kadagiti ina a diosa dagiti relrelihion idi ugma’