5 Ni Maria Kano ti Ina ti Dios

Ania ti nagtaudan dayta a di umiso a sursuro?

“Nangrugi a maitandudo ti panagdayaw iti ina ti Dios idi . . . nagbalin a Kristiano ti adu a pagano. . . . Nabukel ti kinarelihiosoda [dagiti pagano a nagbalin a Kristiano] iti rinibu a tawen babaen iti kulto ti ‘naindaklan nga ina’ a diosa ken ti ‘nadiosan a birhen.’”​—The New Encyclopædia Britannica (1988), Tomo 16, panid 326 ken 327.

Ania ti kunaen ti Biblia?

“Agsikogkanto. Ipasngaymonto ti maysa a lalaki, ket panaganamto iti Jesus. Naindaklanto. Maawaganto iti Anak ti Kangatoan. . . . Nasantoanto ti ubing, ket maawaganto iti Anak ti Dios.”​—Dakami ti nangitaliko; Lucas 1:31-35, Ti Baro a Naimbag a Damag Biblia.

Dayta a teksto ti Kasuratan ibatadna a ni Maria ti ina ti “Anak ti Dios,” saan nga ina ti Dios. Kabaelan kadi nga isikog ni Maria Daydiay ‘saan a malaon ti langit’? (1 Ar-ari 8:27) Pulos a di imbaga ni Maria nga insikogna ti Dios. Ti doktrina a Trinidad ti nangriro iti kinasiasino ni Maria. Ti Konsilio ti Efeso idi 431 K.P. impasdekna ti panagdayaw ken Maria babaen ti panangtukoyna ken Maria kas Theotokos (Griego a sao a kaipapananna “nangipasngay iti Dios”), wenno “Ina ti Dios.” Ti siudad ti Efeso, a nakaangayan dayta a konsilio ti simbaan, ket sinigsiglon a sentro ti panagdayaw iti idolo a mangitantan-ok ken Artemis kas diosa ti kinabunga.

Isu nga adu nga aspeto ti panagdayaw iti ladawan ni Artemis, a patienda a “nagtinnag manipud langit,” ti nairaman iti panagdayaw ken Maria, kas iti libut. (Aramid 19:35) Ti sabali pay a kaugalian nga in-inut a naiserrek iti Nakristianuan a sursuro ket ti panagusar iti imahen ni Maria ken iti dadduma pay nga imahen iti panagdayaw.

Idilig dagitoy a bersikulo ti Biblia: Mateo 13:53-56; Marcos 3:31-35; Lucas 11:27, 28