Idi Nagunggon ti Daga, Timmulongda

Babaen ti koresponsal ti “Agriingkayo!” idiay Chile

TI DAGA naggungon iti kasta unay. Napankamin iti ruangan iti kuartomi. Dagidiay adda iti kusina padpadasenda a rikepan dagiti estante, bayat a dagiti liblibro, botelia, dagiti mulmula iti balay, dagiti sarming, dagiti garapon ti jam ti nagtinnag iti datar iti ngato. Pinanunotmi no kasano ti kapautto dayta.

Din masapul a sawen pay, ta dikam inorasan dayta, ngem iti sumaganad nga aldaw ti pagiwarnak imbagana a dayta ti nagpaut iti dua a minutos. Itan, mabalin a pagarupenyo a ti dua a minutos saan met a napaut, ngem patiendak, mabalin a masdaawkayo no kasano ti kapautna no agkinkintayeg ti daga iti babaen dagiti saksakayo!

Alas 7:47 t.r. iti Domingo, Marso 3, 1985, idi nagginggined ditoy Santiago, Chile. Agin-inanakami iti kuartomi iti sanga nga opisina iti Watch Tower Society idi napasamak dayta. Dadduma a miembro iti kamkamengmi ti agkapkape iti kusina.

Ti ginggined ti nangibati kadakami nga awanan ti koriente bayat ti sumagmamano nga oras. Gapuna, rimmuar dagiti flashlight, kandila, ken dagiti transistor a radio. Sigun iti damdamag iti radio, dagiti luglugar iti igid ti baybay ken dadduma a paspaset iti Santiago ti nakaro ti pannakaapektarna. ‘Kasano ti kasasaad dagiti kakabsattayo sadiay?’ pinanunotmi. Dikam makaawag kadakuada​—ta ti linea ti telepono napnapnoda kadagiti awag, ken malaksid iti dayta, dagiti linea ti telepono ti natumba kadagidiay a luglugar. Ti damo nga awag ti nakagteng kadakami manipud iti pagibangbangonan iti pasilidad ti kabbaro a sanga. Nabang-arankami a makaangngeg a nasayaat ti isuamin ket ti kabbaro a patakder ti paktoria ti interamente a nakatakder! Kinapudnona, ti laeng diding a ladrilio a naikabil iti lugar ti opisina iti dayta nga agsapa ti natumba!

Iti dayta a rabii sumagmamano kadakami ti nasayaat ti turogna. Nabiit pay a nakaturogkamin idi a nagunggon dagiti kamami, isu a nangriing kadakami. Iti sumaganad nga agsapa, ti pagiwarnak impadamagna ti nadadael, a nangipakita kadagiti ladawan ti nadadael a dinadael ti ginggined a nakagteng iti 7.7 iti Richter scale. Dagiti siudad awananda iti danum ken koriente. Nadadael dagiti rangtay. Nasurok a 140 a tattao ti natay ket ti napattapatta a 150,000 ti naawanan iti pagtaengan. Nalabit $1,800 milion (E.U.) ti nadadael! Ta, ti ginggined ti narikna idiay Buenos Aires, Argentina, agarup 1,350 kilometros (840 mi) ti kaadayona iti igid ti baybay Atlantiko! Ti Marso 3, 1985, mabayagto a malaglagip.

Napartak ti Kasapulan a Tulong!

Dagus a nangiyurnoskami iti nadumaduma a kameng iti miembro iti sanga nga opisina a mangbisita kadagiti luglugar a kas ti Machalí, Melipilla, Rengo, San Antonio, Valparaíso, ken Viña del Mar. Ti rason? Tapno kitaen dagiti Kristiano a kakabsattayo ken no ania ti kasapulan unay nga emerhensia a panangtulong.

Dagiti buya iti pannakadadael ti makita iti sadinoman. Ngangngani kaaduan kadagiti nadadael isu dagiti daanen a patakder nga adobe, ken dadduma a moderno a patpatakder ti naapektaran​—kas iti walo grado nga apartment a patakder idiay Reñaca a nakaro ti pannakagunggonna ta kalpasanna dayta ti nagirig a kas iti Tower of Pisa. Dayta ti masapul a maduprak.

Dagiti ngay Kristiano a kakabsattayo? Nupay no ginasgasut kadakuada ti nakapukaw iti pagtaenganda ken sanikuada, maragsakantayo a makaammo nga awan ti maysa kadagiti 16,000 a Saksi nga agnanaed kadagiti naapektaran a lugar a natay wenno nasugatan! Dagiti kongregasion dagiti Saksi ni Jehova idiay Santiago ken agingga iti kaadayo a kas ti Punta Arenas ken Iquique nangrugidan nga umawag, a damdamagenda no kasano a makatulongda. Dagus a nagsaknap ti sao, iti uneg ti sumagmamano nga or-oras nangrugin a nagsangpet dagiti taraon, kawes, ules, ken dadduma pay a mausar a bambanag. Di nagbayag dagiti dua a trak nga addaan ti magupgop a kabaelan nga awiten a 5.5 tonelada nakargaandan ket napandan iti dalanda. Idi agsublida iti naladawen a paset iti rabii, addan umdas a donasion a naawat tapno maiplano ti sabali pay a biahe. Ket nagtultuloy a kasta agingga iti dua a lawlawas.

Iti maikadua a ngudot’ lawas a sumaganad iti ginggined, 110 a boluntario manipud iti asideg a kongregasion ken ti lugar a pagibangonan iti kabbaro a sanga ti nagbiahe kadagiti siudad a nakaro ti pannakaapektarna ket nangibangonda kadagiti 24 a sangalen laengen a pagtaengan. Idi pannakaisurat daytoy, nakaibangonkamin kadagiti 69 a kakasta a pagtaengan, ket inanamaenmi ti mangibangon ti ad-adu pay sakbay a mangrugi dagiti nakaro a tudtudo.

Maysa a kongregasion ti nagsurat kadakami a mangibaga a ti praktikal a tulong ken pagtaengan ti makita a demonstrasion iti panagkakabsattayo. “¡Los hermanos se pasaran!”) (“Inaramid dagiti kakabsattayo ti amin a kabaelanda!”) Iti makatignay a pamay-an, naipalagip kadakami a dayta ket maysa nga internasional a panagkakabsat, ta kadagidi al-aldaw ken lawlawas a simmaruno iti ginggined, dagiti Saksi manipud Argentina, Alemania, Italia, ken ti Estados Unidos immawagda tapno agsaludsod maipapan iti kasasaad dagiti Kristiano a kakabsattayo idiay Chile. Dagiti awag ti telepono ti sinaruno dagiti naparabur a kontribusion tapno tumulong a mangipaay iti kasapulan ti “pamilia[tayo].”

Panawen iti Panangusig iti Bagi Met Laeng

Ti ikkis a “Ginggined!” ken ti makadadael a pannakabalin a mairaman ti masansan a mangtignay kadagiti tattao nga agpanunot maipapan iti relasionda iti Dios. Kinapudnona, sumagmamano a minutos kalpasan iti ginggined ditoy Chile, adu kadagiti Kingdom Halls ti binisita dagiti kakaarruba nga agsapsapul iti proteksion. Maysa a Saksi idiay Melipilla, a nalatak iti sangakaarrubaanna, ti naaddaan kadagiti adu a bisita iti dayta a rabii. Iti tunggal panaggunggon umad-adu a kaarruba ti nagparang iti pagtaenganna a mangsapsapul iti salaknib. Naibangon ti maysa a tolda iti likudan ti balayna, isu a nangbusbosanna kadagiti adu nga or-oras iti naladawen a rabii a mangisalsalaysay kadagiti sasao ni Jesus maipapan kadagiti maud-udi nga al-aldaw a dagiti “ginggined mapasamakda iti nadumaduma a luglugar.”​—Marcos 13:3-8.

Idiay Viña del Mar maysa a lalaki ti di nangitultuloy ti panagadalna iti Biblia ket imbagana a saanen a pulos nga agsubli idiay Kingdom Hall. Ngem sadino ti nakasarakanna iti bagina iti dayta a rabii kalpasan ti ginggined? Siempre, idiay Kingdom Hall! Isu ken ti pamiliana ti naawat ken naikkan iti temporario a pagtaengan. Isut’ natignay babaen iti nabara a kinamanagpadagos a naipaay kenkuana ken iti pamiliana ket inkeddengna a pabaruenna ti panagadalna iti Biblia.

Dadduma kadagiti kakabsattayo ti ngangngani nakapukaw iti biagda. Kas pangarigan, idiay Kongregasion ti Vicuña Rozas, maysa a kabsat a lalaki ti nabiit pay a nagsubli manipud ospital ket adda pay laeng iti pagiddaan. Maysa a rabii ti asawana ken ti anakna a babai ti napan nakigimong, gapuna isut’ nabati nga agmaymaysa iti pagtaengan. Sumagmamano a minutos sakbay ti ginggined, inkeddengna ti bumangon ket kellaatenna ti asawana ken ti anakna a babai babaen ti panangisaganana iti danum a maipaay iti tsa inton sumangpetda iti pagtaengan. Isut’ napan iti kusina, ket idi a ngangnganin mangipapudot iti danum, nagginggined. Idi agsublin iti kuartona, nasarakanna ti kuartona nga addan iti sirok ti tallo metro kangatona (9 pie) a pader a natumba! Anian ti panagyamanna ta napanunotanna ti mapan iti kusina a mangisagana iti tsa!

Makapabileg-pammati ti makakita iti isusungbat dagiti Kristiano a kakabsattayo a lallaki, a nupay no napukawda dagiti amin a sanikuada, nagtalinaedda nga optimistiko. Kas inkomento dagiti adu: “Narba dagiti pagtaenganmi, ngem saan a narba ti pammatimi!”