Kasano nga Agbalin a Pudpudno ti Talna?
Aniada dagiti dadduma a kangrunaan a pakaitibkolan a manglapped iti agnanayon a talna nga pudpudno a maibanag? Manipud iti napalabas nga artikulo, mailasintayo dagiti sumaganad:
(1) Dagiti naagum a natatan-ok nga agturay (napolitikaan, namilitaran, komersial, ken relihiuso) a mangiturturong kadagiti tattao.
(2) Maysa a sistema iti edukasion a panangisagana a naibatay iti nakaro a nasionalismo a mangisuro iti “sagrado a panangipangpangruna iti bagi,” nasional a kinatan-ok, di panagtalek, ken gura.
(3) Ti panangtengngel iti isuamin ken panangiturong ‘ti dios daytoy a sistema dagiti bambanag, isu a nangbulsek iti is-isip dagiti di mamati,’ nga isu, ni Satanas a Diablo.—2 Corinto 4:4.
ITI sangalubongan a kasaknap, masapul nga adda ti panagbalbaliw ti kapanunotan, ti panagbalbaliw iti puso. Ket dayta kaipapananna ti panagbalbaliw iti edukasion—ti panangisuro kadagiti amin a tattao iti talna, ayat, ken ti panangraem iti maysa ken maysa. Ket dayta kaipapananna met ti sangalubongan a panagbalbaliw iti panangidaulo nga agturong iti sangsangkamaysa a panangidaulo a raemen dagiti amin a nasnasion—maysa a di agrupsa a sangalubongan a gobierno. Ngarud, dayta kaipapananna ti panagbalbaliw iti panangtengngel iti lubong—manipud iti turay ni Satanas nga agturong iti turay iti Dios! Ngem kasano a maibanag dagitoy a panagbalbaliw?
Ti Biblia impadtona nasurok a 2,500 a tawtawenen a napalabas nga iti tiempo iti panungpalan daytoy a sistema dagiti bambanag ‘ti Dios ti langit mamangonto ti maysa a pagarian nga kaanoman dinto madadael.’ (Daniel 2:44) Daytoy ket agnanayon a Pagarian isu nga insuro ni Jesus nga ikararag dagiti paspasurotna: “Umay koma ti pagariam. Maaramid koma ti pagayatam, kas sadi langit kasta met ditoy daga.” (Mateo 6:9, 10) Dayta a pagarian kaipapananna ti maysa a baro a panangituray babaen ken Kristo Jesus, manipud langit, a maipaay iti isuamin a daga, kas iti insurat ni mammadto a Daniel: “Ti panagturayna [wenno, kinasoberanona] agnanayon a panagturay a dinto mapalabas, ket ti pagarianna dinto maduprak.”—Daniel 7:13, 14.
Daytoy a nailangitan a gobierno iti im-ima ni Kristo isu ti baro nga urnos a mangsukatto iti nabingaybingay, naagum a grupo dagiti natatan-ok a di umiso ti panangiturayna iti sangatauan bayaten dagiti adu a milenio. Dayta ti mangbukel iti mangituray a paset iti “baro a langlangit ken ti maysa a baro a daga” nga “ur-urayentayo mayannurot iti kari ti [Dios], isuda a pagtaengan ti kinalinteg.” (2 Pedro 3:13) Daytoy a gobierno isu ti pudpudno a “pangrugian iti masanguanan a pagtungpalan iti lubong,” saan a ti Naciones Unidas idiay Nueva York nga intandudo ni Robert Muller, ti katulongan a sekretario-heneral iti NU. Nupay impakaammo ti NU ti 1986 a kas ti Internasional a Tawen iti Talna, ti pudpudno a talna ti mabalin a dumteng laeng babaen iti inanamongan-Dios a kalasugan iti Pagarian ti Dios.
Ti Paset iti Edukasion
Minilmilion a tattao ti mangisagsaganan iti bagbagida nga agbiag iti sidong ti turay dayta a gobierno ti Pagarian. Bayat ti nasuroken a sangagasut a tawtawen ti nakasaksaknap a kampania ti edukasion ti naipaayen iti isuamin a nasnasion tapno mangipan iti mensahe dayta a Pagarian kadagiti amin a tattao. Nalabit addan natalna a pannakabagi dayta a gobierno a simmarungkar iti pagtaenganyo, nupay iti dayta a tiempo nalabit saanyo a nabigbig ti kinapateg dayta a panagsarungkar. Isut’ makipaspaset iti kasasaknapan nga edukasional a trabaho a naaramid pay laeng iti natauan a historia. Siasino ti bisita? Maysa kadagiti Saksi ni Jehova. Ket apay a bumisbisita dagiti Saksi kadakayo?
Dagiti Saksi mangituktukonda iti panagadal iti Biblia iti aniaman a napasnek panagpuspusona a tao nga agtarigagay a makaammo maipapan iti dalan ni Jehova nga agturong iti talna. Daytoy nga awan bayadna nga edukasion ti mangtultulongen kadagiti minilion a “mangpanday kadagiti kamkampilanda a pagbalinen a dingding ti arado ket dagiti pikpikada pandayendanto a komkompay.” Kuna ni mammadto nga Isaias: “Ti maysa a nasion saannanto nga itag-ay ti kampilan a maibusor iti nasion, ket didanto met adalenen ti pannakigubat uray kaano.”—Isaias 2:4.
Dagiti Saksi ni Jehova tungtungpalendan daytoy a padto a maisupadi kadagiti miembro iti Naciones Unidas, a makidangdangadang pay laeng babaen iti sao wenno pisikal a pannakigubat iti maysa ken maysa. Ket kasano ti panangibanag dagiti Saksi iti daytoy? Babaen iti panagadal iti Biblia tapno magun-odanda ti panunot ni Kristo maipapan kadagitoy a bambanag; babaen iti panangsuro a pudno a ti Dios ayat ket masapul nga iparangarangda ti ayatna kadagiti padada a tao iti amin a nasnasion ken rasa. Gapu iti dayta a rason taginayonenda ti nainget a kinaneutralda kadagiti napolitikaan nga isyu ket agkedkedda a makipaset iti aniaman a gubat wenno panagdadangadang, aniaman ti mapasamak.—1 Juan 4:8; Juan 13:34, 35.
Sigun iti natungpalen a padto iti Biblia asidegen ti tiempo a panagtignay ti Pagarian ti Dios. (Mateo 24:3-35) Din agbayag ti gubat ti Dios nga Armagedon ipatinggananton ti panangituray ni Satanas agraman dagiti amin a mangbingaybingay ken madadael a politikana. (Apocalipsis 16:14-16; 19:17-21) Itan ti tiempo nga agturong iti Dios ken iti Saona. Dagiti Saksi ni Jehova iti sangakaarrubaanyo maragsakandanto a tumulong kadakayo tapno mapaneknekanyo a mismo a ti agnanayon a talna saan a maysa a naatap a tagtagainep no di ket pudpudno a mabiiten a dumteng iti sangalubongan. Wenno dikay bumdeng nga agsurat iti manangipablaak itoy a magasin a maipaay iti kanayonan nga impormasion ken tulong.
[Blurb iti panid 9]
“Ket pandayendanto dagiti kamkampilanda a pagbalinen a dingding ti arado . . . Ti maysa a nasion saannanto nga itag-ay ti kampilan a maibusor iti nasion, ket didanto met adalenen ti pannakigubat uray kaano.”—Mammadto nga Isaias