Ti Estilo ti Panagbiag ti Homoseksual—Kasano Karagsak Dayta?
Rimmuar iti pagidulinan ket nagbalin a paulo dagiti damdamag. Dayta ti agdama a kasasaad ti homoseksualidad. Dagiti liblibro, pabuya, sine, programa ti telebision, ken dagiti report iti pagiwarnak ipablaakda dayta, gagangay kas maawat a maisukat nga estilo ti panagbiag. Ngem kasano ti kasayaat ti panangawat iti dayta? Ania ti iraman dayta? Agbibiagda kadi a maitunos iti pannakaitudingda a “bakla”? Ket dagidiay ngay mangliklik iti dayta? Dagitoy kadi saanda a mannakaawat? Ket ti Dios, awatenna kadi dayta? Ania ti kunaen, ti Saona, ti Biblia, maipapan iti dayta? Dagitoy napapategda a salsaludsod, gapu iti propaganda ti pannakaawatna.
IDIAY Estados Unidos, dagiti liblibro ken pabuya maipapan iti biag ti homoseksual ti mareprepaso iti pagiwarnak. Maysa a libro maipapan kadagiti lesbian a mamadre ti nakagteng iti innem a numero a naglakuan ket dayta ti narepaso iti maysa a pabuya iti aldaw iti TV. Ti board of education iti Nueva York anamonganna ti high school a maipaay kadagiti homoseksual. Ti kongregasion iti Riverside Church (awan denominasionna, a 3,000 a miembro) iti purok iti Manhattan, Siudad ti Nueva York, butosanna “a buyogen ti pananganamong ti naiyebkas a panggep a panangawat kadagiti homoseksual a relasion kas paset iti kapanunotan a Nakristianuan a panagbiag ti pamilia.”
Impadamag ti Daily Mail iti Londres a “ti Britania maaddaanto iti damo a Gay Olympics.” Ti tallo-kapaset a dukomento a Briton “isingasingna a ni Jesus ti mabalin a homoseksual.” Idiay Toronto, Canada, maysa a “homoseksual a piesta ti mangrugi nga addaan iti 2,000 a nagparada iti ili,” ket dayta “iramanna ti nagtitipon a denominasion a serbisio ti iglesia.” Dagiti parada dagiti homoseksual, ig-iglesia, tiendaan ti libro, bar, pagdigosan dagiti homoseksual, dagiti homoseksual a napolitikaan nga aktibista agraman dagiti linlinteg ti kalintegan dagiti homoseksual—agtultuloy daytoy a bukod nga estilo a pagraragsakan iti sosiedad.
Umad-adu a Propaganda a Maipaay iti Estilo ti Panagbiag ti Homoseksual
Dagidiay nga agkedked iti dayta ti mabagbagaan. Idiay Siudad ti Nueva York, ti napeklan a homoseksual natudingan iti saad iti kriminal a korte. Idi tiempo ti panagsapatana, isut’ “nangidayaw iti bagina met laeng gapu iti ‘turedna’ a nagbalin a kasta,” kalpasanna “inagekanna ti lalaki a kaayan-ayatna ket nakagun-od iti naisangsangayan a balligi.” Adda ti panangbusor, ngem ti kadadakkelan a pagiwarnak iti siudad, ti Daily News, ti nagsurat iti editorial a siasinoman a mangbusor iti pannakatuding iti hues a homoseksual “ket maysa a mangidumduma.”
Bayat iti Nobiembre 1985 iti rinabii a panangipadamag kadagiti damdamag, dua nga estasion iti TV idiay Siudad ti Nueva York, ti WNBC ken WABC, ti mangiparang kadagiti naisangsangayan a paset maipapan iti homoseksualidad—tapno sumrek iti kasasaad iti homoseksual, kas impamatmat ti reporter. Ti serie a WNBC, a napauluan “No ti Anakyo ket Bakla,” ti nairanta a nangnangruna iti panagtignay dagiti nagannak kadagiti homoseksual nga annak. Dagiti sikiatrista nga adda iti programa impamatmatda a kadagiti kakasta nga ubbing daytoy a seksual a pannakaiyam-ammo ket gagangay ken nauneg ti pannakairamutna ket dagiti nagannak saanda koma a padasen a baliwan dayta. ‘Nasaysayaat a ti anakyo agragsak ken maysa a homoseksual,’ kuna ti maysa, ‘ngem ti naliday ken heteroseksual wenno agrayo iti kasungani a sekso.’
Ti Marso 1985 a ruar iti Seventeen isingasingna a no riribukennakayo ti panagbalin ti maysa a homoseksual, mabalin a kasapulanyo ti balakad “iti maysa a lokal a sentro ti serbisio ti komunidad dagiti bakla.” Ti artikulona inramanna ti sinao ni “Reverendo” Robert H. Iles: “Agayatka man iti lalaki wenno babai ket, iti kamaudianan a panangusig, saan a kas iti kinapateg iti kinapudno a kabaelanyo ti agayat.” Ipadana ti ayat iti sekso ket kunaenna, makidennaka, homo ka man wenno hetero.
Maysa nga edukador a Briton ti nagsennaay a kadagiti eskuelaan “amin dagiti programa iti edukasion iti sekso ti naaramid a maipaay kadagiti heteroseksual . . . awan ti uray maysa kadakuada a nangaramid iti maysa a programa a maipaay kadagiti bakla nga eskuela.” Nagreklamo met a “kaaduan a libraria ti eskuelaan addaanda laeng kadagiti datin a romansa . . . kadagiti bannuar a heteroseksual—nupay umad-adu dagiti tomo ti saan a pudno a sarsarita maipapan kadagiti bakla.” Intudona ti gapu iti panangidumduma a maibusor kadagiti homoseksual: “Ti kapanunotan a ti heteroseksualidad ket natantan-ok . . . ti kangrunaan a kababalin iti gapu iti panangidumduma.”
“Ayat” ti Homoseksual
Ngem saan kadi a ti heteroseksualidad natantan-ok? Saan kadi a ti disenio ken ti gagangay a panagandar ti paspaset ti bagi ramanenna daytoy a nalawag a kasasaad? Saan kadi a ti lalaki ken ti babai ti nalawag a gagangay a kasasaad, ket ti lalaki iti lalaki ti nalawag a panaglabsing? Ti “ayat” ti homoseksual ramanenna dagiti ar-aramid a mabalin a pampanunoten ni apostol Pablo idi sinaritana dagiti bambanag “a saan man la [koma] a madukit kadakayo” ken “nakababainda uray saritaen laeng ida.” (Efeso 5:3, 12) Nupay kasta, no dadduma mariknana a nasken ti saan a direkta a panangtukoyna kadagidiay a nakababain nga ar-aramid idiay Roma 1:24-27. Ti agdama a tiempo kasla mainugot a tiempo. Ti homoseksualidad rimmuaren manipud iti panaglemmengna. Buyogen iti sisasagana a pannakisaranget, isut’ agparada a kas maawat nga estilo ti panagbiag. Ngem kasta kadi? Ngem ania ti ramanen dayta?
Ti medikal a magasin a Practical Gastroenterology, iti ruarna a Hulio/Agosto 1985, a detaliado a nangisalaysay kadagiti dodoktor ken narses a mangag-agas kadagiti homoseksual iti dadduma kadagiti ar-aramid iti estilo ti panagbiag dagiti bakla. Ipamatmatna a ti masturbasion ket gagangay nga aramidenda a dua, ken kasta met ti ipadalan iti bibig ken iti kerret a sekso. Dagiti dadduma pay a nakaam-amak nga ar-aramid ti nakalawlawag a naisalaysay iti artikulo.
Ipakitana a ti homoseksualidad ti mabalin nga agtungpal iti sadomasochisn, ti rag-o iti panangipababa ken ti pannakaipababa. Para kadagiti pudno a Kristiano daytoy nga estilo iti panagbiag ti naan-anay a di maawat. Ti nasikap a propaganda nga agsaksaknapen a maigapu iti dayta ti masapul a liklikan a kas iti kasta a saplit.
Ti Apit ti Kinabakla
Ti kasta a nalabes a panangabuso saan a maaramid nga awan ti supapakna. No agmula dagiti tattao, agapitda. Ti Practical Gastroenterology addaan iti maysa a serie dagiti artikulo maipapan kadagiti saksakit a patauden ti homoseksualidad. Ti hepatitis simplex, pannakaimpeksion ti dalem, gonorrhea, syphilis, impeksion dagiti igges, small-bowel lymphoma, Kaposi’s sarcoma, ken, siempre, ti nakaam-amak nga AIDS—dagitoy ti sumagmamano laeng kadagiti saksakit a nausig kadagiti ruarna nga Hulio/Agosto ken Setiembre/Oktubre 1985.
Dagiti kabbaro a panagsirarak pabasolenna ti AIDS a mangdadael iti utek ken ti dori. Ti paset a siensia iti The New York Times, Oktubre 15, 1985, ipadamagna: “Dadduma kadagitoy a pasiente ipakitada dagiti nalawag a pagilasinan iti panagmauyong, agraman ti kinamananglilipat, di pannakabael nga agplano wenno mangaramid iti pangngeddeng, ken ti nakaskasdaaw a di panangikankano iti isuamin. Dadduma ti makapataud iti paralisis, ti saan a panagtutunos dagiti piskel wenno nakarkaro pay a parikut iti panangtengngel iti bagida . . . Dadduma kadagiti utek dagiti biktima iti AIDS ti kimsen. Dagiti makin-uneg nga espasio, a maawagan ventricles, dumakkelda ket dagiti paspaset ti nakapatpateg a cerebral cortex ti agparang a natiritir . . . Uray pay no adda pannakaagas a mamagsardeng iti impeksion ti virus ken pannakaipalubos ti sistema ti panangsalaknib ti bagi a maibusor kadagiti saksakit a mangpabaro iti bagina met laeng, ti pannakadadael ti utek ti mabalin a manayonen.”
Ti AIDS, nga ita awan pay agasna, a dagiti kaso ti nasursurok pay ngem doble iti tinawen, ti kanayon a makapapatay, ken agsaksaknap iti sangalubongan. Nangnangruna a saplitenna dagiti homoseksual, ngem uray met dagiti managusar iti droga a maipadalan iti urat ken dagiti umawat iti panangyalison iti dara wenno dagiti produkto a dara. Kasta met dagiti maladaga a maipasngay kadagiti naimpektaran iti virus nga ina. Babaen ti panangisaknap ti pluido, ti virus masarakan iti dara, semilia, isbo, katay, ken lua. Daytat’ addaan iti napaut a pannakapessa. Mabalin nga adu a tawtawen ti mapalabas iti pannakaisarang iti virus ken ti mismo nga itataud ti AIDS, a mamagbalin nga imposible ti nasapa a pannakailasin. Ti virus adda iti uneg, maysa a naorasan a bomba nga agur-uray iti ibebettakna—ngem siasino ti makaammo no kaano?
Itan bumbumtaken iti sangalubongan. Nasurok a sangamilion a tattao—kunaen dagiti dadduma ngangngani dua a milion—idiay Estados Unidos ti napattapatta a naisarang iti virus ti AIDS. Adda nasurok a 14,500 a kaso nanipud 1981, nasurok a 7,000 ti natayen. Ti bilang dagiti kaskaso iti sangalubongan agpangpangato—idiay Europa, Asia, Australia, pagpagilian ti Caribbean, ngangngani 20 a nasnasion iti Africa, ken 15 a pagpagilian iti Americas. Idi napan a tawen ti bilang dagiti nasnasion a nangipadamag kadagiti kaso iti AIDS iti World Health Organization ngimmato manipud 40 idi Agosto agingga iti 71 idi Oktubre, a ti bilang dagiti kaso iti dayta a tiempo ket ngangngani 17,000.
Estilo ti Panagbiag a Di Awaten ni Jehova
Ti homoseksualidad ket saan a kasukat iti estilo ti panagbiag nga awaten ni Jehova a Dios. Masansan, agpada ti bakla ken liberal a manangaskasaba tiritirenda dagiti kasuratan iti awan mamaayna a panangikagumaan a mamagbalin iti dayta a nasayaat. (2 Pedro 3:16) Rinibribo a tawenen a napalabas dinadadael ni Jehova ti Sodoma gapu ta kaaduan kadagiti lallaki iti dayta a siudad ar-aramidenda dayta. (Genesis 19:4-25) Adu a siglo kalpasanna ni apostol Pedro impadisna dagiti lallaki a nangtulad kadagiti taga Sodoma kadagiti ‘awan nakemda nga an-animal a naiyanakda a linalasag tapno matiliw ken madadaelda.’—2 Pedro 2:6-13.
Iti di agbiddut a pagsasao, agpada ti homoseksualidad ti lalaki ken ti lesbianismo ti kinondenar ti napaltiingan nga apostol a ni Pablo: “Gapu itoy ti Dios binaybay-anna ida kadagiti derderrep a nakababain, ta uray dagiti babbai nga adda kadakuada sinukatanda ti nakaparsuaan a pannakaaramatda iti maisalungasing iti nakaparsuaan; ket kasta met dagiti lallaki binaybay-anda ti nakaparsuaan dagiti babbai, simgedda iti derrep iti maysa ken maysa kadakuada nga inaramidda ti nakarugrugit a pamay-an a lallaki ken lallaki, ket inawatda kadagiti bagbagida met laeng ti maikari a gunggona ti pannakaallilawda.”—Roma 1:26, 27.
Nagsurat met ni Pablo: “Dikay koma maallilaw. Uray dagiti mannakiabig, uray dagiti agrukbab kadagiti ladladawan uray dagiti makikamkamalala, uray dagiti binabai, uray dagiti tumulad kadagiti taga Sodoma, uray dagiti mannanakaw, uray dagiti naagum, uray dagiti managbarbartek, uray dagiti managtabbaaw, uray dagiti managpaanak, saandanto a tawiden ti pagarian ti Dios.” (1 Corinto 6:9, 10) Dagiti dadduma a patarus ti Biblia ipatarusda ti ebkas a “binabai” iti nadumaduma a pamay-an, kas iti sumaganad: sodomitas, managdakdakes, nalulok iti sekso, dakes a homoseksual, homoseksual a kinadakes, ken basta homoseksual.
Naragsak nga Estilo ti Panagbiag nga Awan Inggana
Awan ti pagragsakan maipapan iti apit dagiti bakla. Dayta mabalin a maliklikan babaen iti panagimdeng ken Jehova: “Siak ni Jehova a Diosmo, a mangisuro kenka a maipaay iti gunggonam, a mangiturong kenka iti dalan a papanam koma. O no dinengngegmo koma dagiti bilbilinko! Iti kasta ti talnam kas koma iti maysa a karayan, ken ti kinalintegmo kas la koma daldalluyon ti baybay.”—Isaias 48:17, 18.
Dadduma a sikiatrista ken dadduma a tattao, nupay kasta, kunaenda a ti homoseksualidad saan a “maagasan,” uray pay ti relihiuso a pannakakumberte. Nakarigrigat, nalabit, ngem saan nga imposible. Impakita ni apostol Pablo daytoy idi kinunana iti sumaganad: “Ket kakastada idi dagiti dadduma kadakayo. Ngem nadalusankayo.” (1 Corinto 6:11) Gapuna inaramid dagiti immuna a Kristiano. Ket maar-aramid ita. Dayta aramidento dagiti dadduma nga agturong ken Jehova a maipaay iti tulong: “Mabalinak dagiti amin a bambanag gapu iti daydiay mamapigsa kaniak.” (Filipos 4:13) Ngarud, “uksobenyo daydiay daan a personalidad agraman dagiti ar-aramidna, ket ikawesyo ti baro a personalidad, isu a mapabpabaro iti pannakaammo nga umasping iti Daydiay namarsua kenkuana.”—Colosas 3:9, 10.
Guraen ni Jehova ti dakes, ngem sisasagana a mangipakita iti asi kadagiti indibidual nga agbabawi kadagiti nagbiddutanda. Dagiti Saksi ni Jehova guraenda ti dakes, agraman ti bukodda a nainlasagan a kinaimperpekto, ngem dida kagura ti bagbagida met laeng wenno dagiti dadduma nga indibidual nga agaramid iti dakes. Guraem ti basol ngem saan a ti managbasol isu ti linteg ni Jehova ken kasta met kadagiti managdaydayawna. Ti mannurat iti Biblia a ni Judas kunaenna: “Dagiti dadduma kaasianyo ida a siaamak, karugityo uray ti pagan-anay a marugitan iti lasag.”—Judas 23; kitaenyo met ti Salmo 97:10, Mateo 5:43-48, ken Roma 7:15-25.
Kas insurat ni apostol Pablo idiay Roma 3:23: “Ta isuda amin nagbasolda ket agkurangda iti dayag ti Dios.” Ngem dagiti amin a managbasol, agraman dagiti homoseksual, a manggun-od iti umiso a pannakaammo ket agtignayda iti dayta agapitdanto kadagiti gunggona itan ken makagun-od iti biag iti maysa a paraiso a daga.—Salmo 37:10, 11, 29; Mateo 6:10; Juan 17:3; Apocalipsis 21:3-5.
[Blurb iti panid 14]
Ti homoseksualidad rimmuaren manipud iti panaglemmengna. Dagidiay agkedked isuda ti mabagbagaan
[Blurb iti panid 15]
“Gapu iti daytoy ti Dios binaybay-anna ida kadagiti derderrep a nakababain . . . nga inaramidda ti nakarugrugit a pamay-an a lallaki ken lallaki.”—Roma 1:26, 27