Manipud Managbasatayo
Ti Estilo ti Panagbiag ti Homoseksual
Tarigagayak nga iyebkas ti panagyamanko iti panangipablaakyo iti artikulo a “Ti Estilo ti Panagbiag ti Homoseksual—Kasano Karagsak Dayta?” (Agosto 22, 1986) Kas maysa a paset idi dayta nga estilo ti panagbiag, sipupudno a makunak a daytat’ saan a naragsak no di nakalkaldaang. Nakidangadangak a mangbalbaliw iti panagpampanunotko ken ti pamay-an ti panagbiagko, ngem ti panangsurot iti balakad idiay Isaias 48:17, 18 ken ti pammaregta iti 1 Corinto 6:9-11, agraman ti tarigagay a mangay-ayo ken ni Jehova a Dios ken ti pananggura iti dakes (a saan a ti bagik), ti nangtulong kaniak a mangilapsut iti bagik. Siasinoman a nairaman iti kasta met laeng nga estilo ti panagbiag ti “maimbagan” laeng no agpannuray ken ni Jehova ken kayatna nga aramiden ti naimbag iti imatangna.
C. G., California
Addaanak kadagiti rikrikna ti homoseksual a maikontra iti anamongan ni Jehova. Napanakon kadagiti espesialista, a makuna a Kristiano ken saan a Kristiano. Dida maawatan no apay a diak basta sumuko iti tarigagayko. Nakasimsimple—Inay-ayatko ni Jehova. Ti panagballigi kadagitoy a tarigagay ket nakarigrigat—no dadduma kasla imposible—ngem maaramidan. Ti saludsod nga imtuodek iti bagik ket: “Siasino ti ad-adda nga inay-ayatko, ni Jehova wenno ti bagik?” Pinilik ni Jehova. (Mateo 22:37) Naragragsakak itan, ta tinaginayonko ti ayatko ken kinasungdok ken ni Jehova, ngem no ad-adda nga inayatko ti bagik. Ti mensahek kadagidiay makarikrikna iti daytoy ket: No inay-ayatyo ti Dios kas ti kanayon nga ibagbagayo, masursuroyo ti agpannuray iti ayat ken bilegna a saan nga iti ayatyo laeng iti ragragsak.
C. J., Montana
Pagyamanan iti artikuloyo a “Ti Estilo ti Panagbiag ti Homoseksual—Kasano Karagsak Dayta?” Iti panagserbik ken ni Jehova, itan adaanakon iti nadalus a konsiensia, ket diak agdanag kadagiti makadangran nga epekto ken di kinatalged a pagam-amkak sumagmamano a tawenen ti napalabas. Ti artikuloyo ipanamnamana a ti estilo ti panagbiag ti homoseksual ket saan unay a naragsak ken ti pudno a kinaragsak masarakan babaen iti panagserbi ken Jehova a Dios.
A. G., California
No ti Inay-ayatyo Matay
Kalkalpasko pay laeng a binasa ti “Manipud Managbasatayo” maipapan iti tema a “No ti Inay-ayatyo Matay.” (Mayo 22, 1986) Ti anakko kinettelna ti biagna met laeng nakatawenen ti napalabas, ket ibagak kadakayo a ti artikulo a mismo (Oktubre 22, 1985) ken kasta met dagiti sungbat manipud iti managbasayo ti nakatulong kaniak a nangaramid iti kangrunaan a panangbalbaliw iti pusok. Idi nabasak ti artikulo iti Oktubre 22, 1985, anian ti panagsangitko! Pinadpadasko a minedmedan, kas ti napasamak, tapno maipakitak ti pammatik iti Dios! Anian a biddut! Iti dakkel nga ayat ken asina, impakitana kaniak dayta, babaen kadagiti artikuloyo. Manginanamaak nga ibagbagana kaniak nga agsangitak laeng. Pagyamanan!
H. T., England
Panagluto ti Spaghetti
Kayatko nga iyebkas ti panangapresiarko iti artikuloyo maipapan iti “Panagluto ti Spaghetti iti Pamay-an ni Giulia.” (Enero 8, 1986 nga Awake!) Agsolsoloak nga agbibiag iti napalabasen a pito a tawen, ket dagiti lallaki gagangay a saanda a nalaing nga agluto. Ti naisangsangayan a putahe ni Giulia iti spaghetti ken sauce ninayonanda ti dua a putahe iti taraonko. Gapuna, imbes a mangbusbosak iti tiempo a mangbasa iti cookbook, maipamaysakon ti tiempok kadagiti napatpateg pay a bambanag. Kanayon a pagragsakak a basaen dagiti magasinyo.
M. S., Australia