Manipud Managbasatayo
Ti Estilo ti Panagbiag ti Homoseksual
Interesadoak iti artikuloyo “Ti Estilo ti Panagbiag ti Homoseksual—Kasano Karagsak Dayta?” (Agosto 22, 1986) Nupay kasta, impaawatyo a ti AIDS ket dusa ni Jehova kadagiti homoseksual. Patienyo kadi a ti sicle-cell anemia, a nangnangruna a mangapektar kadagiti negro, ket dusa ni Jehova kadagiti negro? Kasta met, di apektaran ti AIDS dagiti lesbians. Daytoy kadi kayatna a sawen a kagura ni Jehova dagiti lallaki a bakla ngem anamonganna dagiti lesbians? Nalaka laeng a kunaen dagidiay a di manganamong iti homoseksual a manginaig ti AIDS iti homoseksualidad, ngem kaaduanna dida ikankano.
M. D., Estados Unidos
Dikam kinuna wenno impaawat a ti AIDS ket dusa ti Dios kadagiti homoseksual. Ti sakit ket paset iti basol ken kinaimperpekto a tinawidtay amin manipud ken Adan. (Roma 5:12) Ngem di mailibak a dadduma a tigtignay ti makaipaay iti di maliklikan a pagbanagan. Ti managsigarilio isarangna ti bagina iti ad-adda a peggad iti kanser iti bara. Ti mammartek isarangna ti bagina met laeng iti ad-adda a peggad iti sakit ti dalem. Ti narawet isarangna ti bagina met laeng iti peggad a mainaig iti kinalukmeg. Ti pannakainaig ti homoseksualidad iti AIDS saan a naggapu kadakami no di ipasdek dayta ti medikal a siensia. Nupay dayta saan nga ebkas ti dusa ti Dios, ti espisipiko a pagbanaganna mainaig iti pananglabsing kadagiti linlinteg ti Dios. Idiay Galacia 6:7 kunana: “Dikay maallilaw: Ti Dios saan a marabrabak. Ta ti aniaman nga imulanto ti maysa a tao, apitennanto met.”—ED.
Panangliklik iti Panangrames
Pagyamanan iti artikuloyo nga “Itan Mataykan!” (Setiembre 22, 1986) Maseknanak iti balakad a naited, nupay kasta. Dadduma a manangrames nauyongda ken naranggas iti iyaadanida ket umayda a naarmasan ken addaan panggep a mangusar kadakuada iti uray bassit laeng a pananggargari. Ti Metropolitan Organization to Counter Sexual Assault isingasingna ti panagkedked, ngem no ti babai mabutbuteng unay wenno ti riknana ibagana a di agkedked, mabigbigmi a dayta ket umiso. Nasaysayaat laengen a ti maysa ibturanna ti kapadasan imbes a mapapatay wenno madangran iti kasta unay.
P.R., Estados Unidos
Ti Biblia suportaranna ti kapanunotan a no ti babai ti rauten ti manangrames masapul nga agriaw ken agkedked. Pudno, ti babai masapul nga agtignay sigun iti panangtingitingna iti peggad iti biagna, ket patienmi a dayta ket nasaklaw iti balakad a naited iti kahon iti panid 16 (Setiembre 22, 1986.) Laglagipen koma a ti panangipalubos iti panangrames ket saan a mangipanamnama a ti biktima ket saan a mamalo wenno mapapatay kalpasanna. Kitaenyo ti artikulo a “Linapdanda ti Manangrames” iti ruartayo a 7/22/84.—ED.
Ti Bomba ken ti Masanguanan ti Tao
Tinagiragsakko ti nangbasa kadagiti artikuloyo maipapan iti “Ti Bomba ken ti Masanguanan ti Tao.” (Setiembre 22, 1986) Nupay kasta, diak patien a ti artikulo awan ti puersana, kas ti panangparegta kadagiti managbasa a (Kristiano) a busorenda dagiti nuklear nga armas babaen ti panangbotos ken panagsuratda kadagiti managarmid ti lintegda. Aloha.
J. G. B., Hawaii
Ti panangbotos ken panagsurat kadagiti managaramid ti linteg isingasingna nga adda solusion ti tao iti parikut. Dagiti artikulomi nalawag ti panangibagana a ti laeng Pagarian ti Dios ti mangiyegto iti agnanayon a talna ken kinatalged kadagiti agayat iti talna iti sadinoman. Ikarkararag dagiti Saksi ni Jehova dayta a Pagarian, agbiagda a maitunos kadagiti prinsipio iti talna, ket busbosenda ti tiempoda iti panangibaga kadagiti dadduma ti maipapan iti dayta.—ED.