Manipud Managbasatayo
Panagsaludsod Maipaay iti Panagtrabaho
Pagyamanan iti panangipablaakyo iti artikulo nga “Agimtuod dagiti Agtutubo . . . Kasano ti Panangtamingko iti Panagsaludsod a Maipaay iti Panagtrabaho?” (Hulio 8, 1983) Kalpasan ti pannakaturposko iti eskuelaan a segundaria, nangaramidak iti adu nga aplikasion maipaay iti trabaho. Maysa a kompania ti nangawag kaniak a maipaay iti panagsaludsod isu a nalawag a diak nakaipaay iti nasayaat nga impresion. Kalpasanna inawisnak ti sabali a kompania a maipaay iti panagsaludsod. Iti daytoy a tiempo nalagipko ti artikuloyo ket inadalko dayta a naimbag. Inyaplikarko dagiti singasing maipapan iti umuna a panagplano, panabalin a nakalma, alerto, episiente, nadayaw, napudno, ken prangka. Nakaipaayak iti nasayaat nga impresion ket naalak ti trabaho.
B. O., Nigeria
Panangusar kadagiti Artikulo iti Eskuelaan
Kayatko nga ibaga kadakayo no kasano nga us-usarek dagiti nagsayaatan nga artikuloyo. Idi 1981 nakipasetak iti Science Fair a nangiparangak iti maysa a banag nga insuratko maipapan iti panagsigarilio, a naibatay kadagiti magasin. Nanipud idin inusarkon dagiti magasin iti namin-anon a daras idiay eskuelaan ta diak idan mabilang amin. Tunggal adda tema a tumaud, iti uneg man wenno iti ruar ti klase, mangitugotak iti maysa kadagiti magasin idiay eskuelaan iti sumaganad nga aldaw. Dagiti magasin nagbalinda a nakalatlatak iti klasek ta no adda tumaud a tema a maipaay iti panagsirarak wenno debate, dagiti kaklaseak imtuodendak maipapan iti dayta, ket mangitugotak iti material idiay eskuelaan a maipaay iti dayta. Agyamanak unay kadakayo.
L. C., Brazil
Ti Iglesia Katolika ken ni Maria
Nakaaramidkayo iti dakkel a panangdangran iti Iglesia Katolika iti kaaduanna ken iti Bendito a Birhen Maria nangnangruna. (“Ti Iglesia Katolika—Ti Panangmatmatna iti Sekso,” Marso 8, 1986) Insuratyo a ti “sursuro maipapan iti agnanayon a kinabirhen ni Maria pataudenna ti kapanunotan a ti panagdenna ket narugit.” Daytoy ket saosao laeng. Ti sursuro iti agnanayon a kinabirhen ipakitana a ni Maria ken ni Jose ti sinaggaysa a nangaramid iti kari ti kinadalus sakbay ti panagasawa, isu a sinalimetmetanda a dua iti agnanayon. Kamaudiananna kinunayo a ni Jesus ti addaan kadagiti pudno a kakabsat a lallaki ken babbai iti pamiliana. Daytoy met ket sasao laeng. No ni Jesus addaan kadagiti dadduma a kakabsat a lallaki ken babbai, apay, nga idi matmatayen iti krus, intalekna ti inana iti maysa a gayyem imbes nga iti maysa a kabagian?
D. H., Wisconsin
Ti panagdenna dagiti agasawa saan a narugit. (Hebreo 13:4— Dina dadaelen wenno ipababa ni Maria iti aniaman a pamay-an ti panangibaga a simmaruno iti pannakaipasngay ni Jesus, isut’ nakidenna iti asawana a ni Jose ket naaddaan kadagiti annak kenkuana. Ti Biblia dina ibaga a sinalimetmetan ni Jose ken ni Maria ti agnanayon a kinadalus. Ti “The New American Bible” (maysa a patarus a Katoliko) kunaenna idiay Mateo 1:25 maipapan ken Jose ken ni Maria: “Ket saanna a tinignay agingga ti impasngayna ti umuna unay nga anakna a lalaki, ket pinanagananna ti Jesus.” Ti footnote iti daytoy a patarus kunana: “Ti ebanghelisador impaganetgetna ti kinabirhen ti ina ni Jesus manipud iti kanito iti panagnginawna agingga iti pannakaipasngayna. Dina nakaseknan ti panawen a simmaruno iti pannakaipasngay ni Jesus.”
No maipapan iti kaadda ti pudpudno a kakabsat ni Jesus a lallaki ken babbai, namin-adu a daras a tinukoy ti Biblia ti kasta idiay Mateo 12:46, 47; 13:55, 56; Marcos 6:3; Lucas 8:19, 20; Juan 2:12; 7:3, 5. Ti “The New Catholic Encyclopedia” kunaenna a dagiti sasao a nausar a mangituding iti relasion ni Jesus ken dagitoy a kakabagian addaan iti kaipapanan a kakabsatna a lallaki ken babbai a mismo. Mabalin a ti rason no apay nga intalek ni Jesus ti inana iti adalanna a ni Juan imbes nga iti aniaman a nainlasagan a kakabsatna a lallaki a ta dagitoy saanda pay a manamati idi, ket ni Jesus imbilangna ti naespirituan a relasionna a napatpateg ngem ti nainlasagan, kas kinunana idiay Mateo 12:46-50.—ED.