“Sapay Koma ta Amin Mammadtoda!”

NI Papa Paulo II impalawagna ti sumaganad a mensahe iti gimong dagiti managayat iti Biblia a Katoliko: “Mangipaayak iti naayat a kablaaw kadagidiay a makipaspaset iti General Assembly of the World Catholic Federation for the Biblical Apostolate ket ipanamnamak kadakuada ti naespirituan a kinasingedko. Maragsakanak a nakaammo a daytoy a gimong nakasarak iti inspirasion iti temana kadagiti sasao ni Moises, ‘Sapay koma ta amin mammadtoda’ (Numeros 11:29), ket inyaplikarna daytoy nga ebkas iti rebbengen nga aramidenna.”​—L’Osservatore Romano, Agosto 24, 1984.

Trabaho a Katoliko a Panangisuro ti Biblia

Ti Maikatlo a General Assembly of World Catholic Federation for the Biblical Apostolate ti naangay idiay Bangalore, India, idi Agosto 1984. Dagiti delegado manipud 53 a pagpagilian nagtitiponda. Ti Pederasion ti naibangon idiay Roma idi 1969. Dayta ket tallo a tawen kalpasan a ni Papa Paulo VI kinomisionanna ti maysa nga Aleman a kardinal idiay Roma nga agadal iti kasapulan ti Iglesia Katolika maipapan kadagiti bambanag a mainaig iti Biblia. Ita agdama, ni Msgr. Ablondi, obispo iti Leghorn, Italia, ti presidente.

Iti panangbalakadna iti Pederasion a mangrepaso kadagiti kalatna, ni Papa Juan Paulo kinunana iti mensahena: “Ti pannakitulag iti Pederasion isu ti panangtulong kadagiti Katoliko iti isuamin a lubong a nalakada a magun-odan ti Sao ti Dios. . . . Kinapudnona amin nga aramid ken amin a pammaneknek iti Iglesia ti agayus koma manipud iti sibibiag a Sao . . . Ti ‘naimpadtuan nga akem’ dagiti Tattao iti Dios ti masapul a sipapanunot a maaramid kas pudpudno a serbisio iti Sao. . . . Babaen iti pannakiraman iti trabaho ti panangipatarus, panangipablaak ken panangisaknap iti Sao, ti maysa mangar-aramid iti panangpennek iti kasapulan dagidiay a mabisin ken mawaw iti Sao ti Dios (idilig ti Amos 8:11). Daytoy agaplikar met iti trabaho a panangummong kadagidiay a mangidedikarto iti bagbagida iti maysa nga aldaw iti panangisuro ken panangikasaba iti Nasantuan a Kasuratan.”

Maitunos iti temana, iti maudi a deklarasion daytoy a Catholic Biblical assembly kinunana: “Ammo ti Pederasion a no amin dagiti Tattao ti Dios aramidenda ti naimpadtuan a pasetda, masapul a maaddaanda iti Sao ti Dios (ti personal a kopiada iti Biblia iti pagsasaoda). Addaanda ti kalintegan a masanay iti pannakaammo iti Kasuratan . . . Daytoy nga Asamblea patalgedanna manen a ti trabaho ti Iglesia a panagebanghelio ti naisentro iti Biblia.”

Imposible a Kasasaad

Dagiti Katoliko, ngarud, ti maparparegtan saan laeng a mangbasa iti Biblia no di ket makipaset iti trabaho a panagebanghelio a naisentro iti Biblia. Daytoy makomendaran. Ngem daytoy ti mangikabil kadakuada iti imposible a kasasaad.

Maysa a gapu ket, ti Iglesia Katolika isursurona a ti tradision umun-una ngem ti Biblia. Kasano a ti maysa a Katoliko mainanama nga agbalin a naregta a mannursuro iti Biblia ken maigiddato met iti dayta agtalinaed a matalek iti iglesiana? Kas pangarigan, mabasananto iti Biblia: “Ti kararua nga agbasol matayto.” (Ezequiel 18:4, 20, Revised Standard Version, edision a Katoliko; idilig iti Douay Version.) Ngem isursuro ti iglesiana a ti kararua di matay ket amin a kararua addada idiay impierno, limbo, purgatorio, wenno langit. Anianto ti isurona​—ti sursuro ti Katoliko wenno ti Biblia?

Kasta met, ti Iglesia Katolika inanamonganna ti pannakaipablaak dagiti edision iti Biblia a naglaon kadagiti panangilawlawag ken komento a mangpakapuy laeng iti panagtalek ti managbasa iti Biblia kas ti naipaltiing a Sao ti Dios. Kas pangarigan, iti introduksionna a, “No Kasano a Basaen ti Bibliayo,” ti The New American Bible, a naglaon kadagiti umuna a panangbendision ni Papa Paulo VI, kunana: “Kasano ti pannakaammo ti maysa no isut’ mangtamtaming iti historia wenno dadduma a porma ti piguratibo a sasao? . . . Kaaduan a sientista patienna a ti tao nagtaud iti nababbaba a kita dagiti biag. Daytoy a pannakaammo ti mangtulong kadagiti Kristiano a mangpanunot manen no ‘kasano’ ti aramid ti Dios a panamarsua ken ti panangawat a ti Genesis 2 ken 3 ket saan a maysa a leksion iti Antropolohia, no di maysa a pangngarig, a mangisuro kadatayo a ti basol ti ramut ti amin a dakes.”

Gapuna, sakbay pay laeng ti pannakagtengda iti umuna a pinanid iti Genesis, naibagan kadagiti managbasa iti daytoy a Katoliko a Biblia a saandanto a mangbasbasa iti historia no di ket maysa laeng a pangngarig. Daytoy agbanag ti panangikuna a ni Jesus inusarna ti pangngarig kas pamuon iti monogamia idi inusarna da Adan ken Eva nga ulidan. (Mateo 19:3-9; Genesis 1:27; 2:24) Kasta met, no ti sangatauan awananda ti maymaysa nga inapo, ti pundamental a doktrina iti subbot ni Kristo marbek.​—Mateo 20:28; Roma 5:12, 17-19; 1 Corinto 15:45.

Daytoy met laeng a Biblia a Katoliko nakagteng pay iti panagduadua iti kinapudno dagiti sasao ni Jesus a nailanad idiay Biblia. Iti sidong ti “No Kasano a Basaen ti Bibliayo,” kunana: “Masapul a laglagipentayo a dagiti mannurat iti Ebanghelio dida inranta ti panangisurat iti historia iti sientipiko a kaipapananna . . . Nairaman kadi ni Jesus iti daytoy a panagsasarita? Simmungbat kadi a siuumiso kas naisalaysay idiay Biblia? Saan a masigurado.”

Kasano a dagiti napasnek a Katoliko mainanamada a mangbasa iti Biblia a buyogen iti pammati ken “idedikarda ti bagbagida iti panangisuro ken panangikasaba iti Nasantuan a Kasuratan” kadagiti dadduma no ti iglesiada anamonganna ti pannakaipablaak ti kasta a makadadael-pammati a sasao? Ket dagiti umasping met a makapakapuy a komento ti masarakan iti The Jerusalem Bible, ken dadduma pay a Biblia a Katoliko ken enciklopedia. Iti awan panangidumduma masapul a kunaen nga adu a Biblia a Protestante ti kasta met laeng a makadangran iti panamati iti Biblia.

Amin a Pudno a Kristiano KET Mammadtoda

Ti The New American Bible umiso ti panangikunana: “Ti mammadto kaipapananna ‘maysa nga agsao a maipaay iti sabali,’ nangnangruna maipaay iti Dios. Dayta dina kayat a sawen nga ipadpadtona ti masanguanan!” Kinuna ni Papa Juan Paulo II: “Ti ‘saad ti mammadto’ kadagiti Tattao iti Dios ti masapul a sipapanunot a maaramid kas pudno a serbisio iti Sao.” Ngem kas nakitatayon, imposible para iti maysa a Katoliko nga agbalin a pudno a mammadto, wenno saksi, a maipaay iti Sao ti Dios, ti Biblia, a saanna a laksiden ti doktrina iti Iglesia Katolika, a naibatay a nangnangruna iti tradision.

Iti maudi a deklarasionna, ti World Catholic Federation for the Biblical Apostolate inyebkasna ti pannakasapul iti pannakaisuro ti Biblia, nangnangruna kadagiti agtutubo ken napanglaw, dagiti nalaka laeng a Biblia ken literatura a pangisuro ti Biblia, dagiti patarus ti Biblia ken managipatarus iti Biblia, ken dagiti amin-tiempo a trabahador. Kinunana pay nga amin dagiti Kristiano ti masapul a mangasaba ken mangisuro, agbiag a maitunos iti Biblia, ken “ammuenda dagiti pagilasinan iti panawen.”

Mabalin nga interesadokayo a makaammo a ti Dios addaan ti maysa nga ili ditoy daga, nga aminda ket mammadto, wenno saksi iti Dios. Kinapudnona, maawaganda iti isuamin a lubong a kas dagiti Saksi ni Jehova. Gapu iti ayatda iti Dios ken iti Saona, mangar-aramidda iti sapasap nga edukasional a trabaho kadagiti nataengan ken agtutubo, napanglaw ken nabaknang. Addaanda kadagiti ginasgasut a ribo nga amin-tiempo a boluntario a trabahador, dadduma kadakuada ti agipatarus ken agiprenta kadagiti Biblia ken edukasional a literatura ti Biblia a maiwarwaras iti nalaka laeng, wenno awanan pay bayad. Dagitoy ti tultulongan dagiti paset-tiempo a trabahador. Asinoman kadagitoy ti maragsakanto a tumulong kadakayo a “mangammo kadagiti pagilasinan iti panawen” ken mangabrasa iti nagsayaatan a namnama a linaon ti Sao ti Dios, ti Biblia.

[Blurb iti panid 8]

“Dagiti mannurat ti Ebanghelio dida inranta ti mangisurat iti historia,” kuna ti The New American Bible

[Ladawan iti panid 9]

Dagiti pudno a Kristiano mammadtoda ta mangisuroda kadagiti sabsabali iti Sao ti Dios

[Picture Credit Line iti panid 7]

UPI/Bettmann Newsphotos