Ania ti Solusion?
“DAYTA ti kakaisuna a solusion,” kinuna ti piloto ti EgyptAir a ni Hani Galal maipapan kadagiti komando a dimmarop iti na-“hijack” nga eroplanona. Ngem, pudno kadi a dayta ti solusion idinto a dagiti awan basolna a tattao ti napapatay wenno nakaro a nasugatan?
Kinapudnona, awan siasinoman a nairaman ti makaammo iti solusion iti parikut iti terrorismo. Mabalin a dayta ket nadumaduma a porma ken mapasamak kadagiti nakaad-adu a luglugar. “Ti terrorismo ket kas iti higante a Hydra iti sarsarita,” kuna ni Brian Jenkins, maysa nga eksperto maipapan iti terrorismo. “Tunggal putdem ti ulona, dua ti tumubo iti lugarna.”
Sumagmamano a tattao, wenno uray maymaysa, ti makabael a mangriribuk iti minilion. Ti nabiit pay a pannakaikabil iti sabidong iti Tylenol a kapsula nga agas ti sakit ti ulo idiay Estados Unidos, a naawagan “ti aramid a nakalawlawag a terrorismo,” ti maysa a pangarigan. Dagiti autoridad ti basta awanan ti pamay-an a mangtaming iti nagbalin nga iyaalsa iti organisado a sosiedad.
Ngem apay adda daytoy nga iyaalsa? Ania ti makimbiang iti terrorismo? Marikna dagiti tattao a mailupitlupitda ken maupay gapu kadagiti kinaawan ti kinahustisia, ket nalabit makitada dagiti ar-aramid ti terrorismo kas ti kakaisuna a pamusposan. Ti hijacker iti TWA Flight 847 idi napalabas a kalgaw pinirmaanda ti komentoda: “Dagiti mailupitlupit iti daga.” Ket, kinapudnona, ti piloto ti TWA imbagana iti managsaludsod iti telebision: “Dagitoy a tattao basta addaanda ti nainkalintegan a rason.”
Idiay eropuerto ti Roma idi napalabas a kalam-ekna, maysa kadagiti napaltogan a terrorista addaan iti surat iti bagina a naiturong kadagiti “Zionista” a mabasa: “Gapu ta minulitanyo ti dagami, ti dayawmi, dagiti tattaomi, dakami met mulitanminto ti isuamin, uray pay dagiti annakyo, tapno ipariknami ti leddaang dagiti annakmi. Dagiti luluami masukatandanto iti dara.” Ti surat napirmaan: “Dagiti martir iti Palestina.”
Ngem dagitoy kadi a taga Palestina martirda wenno terrorista? Dagiti met ngay supsuportaran ti Estados Unidos a gerilla idiay Nicaragua—dagitoy kadi mannakidangadangda a maipaay iti wayawaya wenno terrorista? Kinapudnona, ti terrorista iti maysa a tao ket mannakidangadang iti wayawaya iti sabali a tao.
Wen, aniaman ti pangnagantayo, narigat a makarikna ti siasinoman iti talged manipud kadagiti ar-aramid ti terrorista. Ket dagiti pamay-an ti seguridad—uray pay ti panangbusbos ti Estados Unidos iti $5 bilion a maipaay kadagiti opisial a patakderna iti sabali a daga—ket saan a pudno a solusion. Dagitoy nga addang awan ti maaramidanda a mangiramut iti pagtataudan ti terrorismo. Ngem adda solusion. Ket nupay no dayta saan a kabaelan nga ipaay ti tao, kabaelan dayta ti Dios.
Ti solusion a maipaay kadagiti mailupitlupit ditoy daga saan a ti panagturong kadagiti ar-aramid ti terrorismo no di ket ti kaitungpalan ti sigurado a karkari ti Dios: “Ta ti nalinteg agtalinaedto ditoy daga, ket ti napnuan-imbag agtaengto kenkuana. Ngem dagiti nadangkes magudasdanto ditoy daga, ket dagiti nagulib maparutdanto kenkuana.”—Proverbio 2:21, 22.
Daytoy a kari ti Dios matungpalton iti mabiit. Ti agturayna, ti napagungaren a Jesu-Kristo, kitaennanto a maaramid dayta. Maysa a padto ti Biblia kunaenna maipapan iti Daytoy: “No di ket ukomennanto dagiti napanglaw a buyogen ti kinalinteg, ken mangipato a sililinteg a maipaay kadagiti napakumbaba ditoy daga. Ket kabilennanto ti daga iti pang-or ti ngiwatna; ken gapu iti puyot dagiti bibigna patayennanto dagiti managdakdakes.”—Isaias 11:4.
Wen, ti Anak ti Dios a ni Jesu-Kristo pukawennanton dagiti amin a kinaawan ti kinahustisia, agraman dagidiay a makimbiang iti dayta. Iti nalinteg a baro a sistema ti Dios, ti terrorismo ken isuamin a kita ti kinaranggas bambanagdanto a napalabas. Ket tunggal maysa ditoy daga agbiagton iti kinatalged, nga awan ti panagbuteng iti aniaman a pannakadangran.—Apocalipsis 21:3, 4.