Terorismo​—Asidegen nga Agpatingga!

MAYSA a bus idiay Jerusalem, maysa a patakder ti gobierno idiay Oklahoma City, wenno maysa nga apartment idiay Moscow ket mabalin a puntiriaen ti terorismo. Nupay adda napateg a mensahe a nalawag a kayat nga idanon dagiti terorista kadagiti politiko, lider ti militar, wenno lider ti ekonomia, masansan nga awan ti nakainaigan dagiti prinsipio wenno panggep nga ilablabanda kadagiti puntiriada. Iti adu a kaso, dagiti aktual a puntiriada ket ordinario a tattao​—tattao nga awan maaramidanda iti prinsipio nga ilablaban dagiti terorista. Apay ngarud nga agaramid dagiti ekstremista iti terorismo?

Apay a Maaramid ti Terorismo?

Ti terorismo ket naiplano, nairanta, ken napattapatta. Saan a ti pagbanaganna nga ipapatay ken pannakadangran ti kangrunaan a panggepna. Ti kasta a panangpapatay ket maysa la a pamay-an tapno maibanag ti panggep dagiti terorista. Paset dayta ti makapakullayaw ken nakaam-amak a kasasaad a kayat a parnuayen ti terorista tapno kumapuy dagiti agtuturay ken maipangag ti espesipiko nga iruprupirna. Usigem ti dadduma a banag a pakaigapuan ti kinaranggas dagiti terorista.

Gura. “Ti terorismo . . . ket rubroban ti gura,” kinuna ni Louis J. Freeh, direktor iti Federal Bureau of Investigation ti E.U. “Dagidiay agipempempen iti gura agbibiagda iti lubong nga im-impluensiaan ti kinapanatiko, a pinakaro ti pannakikumplot ken tinubay ti kinakuneng.”

Panangirurumen. “Admitirentayo nga adda dagiti lider iti grupo ken pagilian a di nainkalintegan ti kalatda a mangikisap iti dadduma a kultura,” insurat ni Stephen Bowman iti librona a When the Eagle Screams. “Ngem nalawag met nga adu a terorismo ti timmaud gapu iti pannakapaay.”

Pannakapaay. “Iti adu a kaso . . . ti kangrunaan a pakatignayan ti terorista isu ti napaypayso a pannakapaay iti kasla din agbalbaliw a kasasaad ti politika, kagimongan, ken ekonomia,” kuna ti editor ti libro nga Urban Terrorism.

Kinaawan Hustisia. “Ti terorismo ket sintoma ti maysa a parikut, saan a ti aktual a makagapu,” kuna ni Michael Shimoff iti suratna a “The Policy of Terrorism.” Kunana pay: “Ti koma manayon a kalattayo isut’ pannakaikkat dagiti sosial ken napolitikaan a pakaigapuan ti terorismo. . . . Bayat a sarsarangtentayo ti terorismo, masapul a napasnek dagiti panagreggettayo a mangpasayaat iti wayawaya, dignidad, kinahustisia, ken prinsipio nga agpaay a pagimbagan ti tao ken ti kagimongan. Inton epektibon dagidiay a napasnek a panagregget, satayto laeng kabaelanen nga isardeng ti pananglaban ken panangbusor iti terorismo.”

Paneknekan dagiti makagapu ken pakasaritaan ti terorismo ti kinapudno ti sasao ti Biblia: “Ti tao dinominaranna ti tao iti pakadangrananna.” (Eclesiastes 8:9) Impadto pay ketdi ti Biblia dagiti kababalin a mangpatpatanor iti terorismo. Kunana: “Kadagiti maudi nga aldaw dumtengto dagiti napeggad a tiempo a narigat a pakilangenan. Ta dagiti tattao managayatdanto iti bagbagida, . . . awanan nainkasigudan a panagayat, saan a sidadaan iti aniaman a tulagan, manangparpardaya, awanan panagteppel, narungsot, awanan panagayat iti kinaimbag, mangliliput, natangken ti uloda, natangsit gapu iti panagpannakkel.”​—2 Timoteo 3:1-4.

Kinapudnona, dagiti panagregget ti tao a mangparmek iti terorismo, kasano man kapasnek dagitoy, dida sibaballigi a maikkat dagiti pakaigapuanna. Sipupudno a kuna ti Biblia: “Saan a kukua ti naindagaan a tao ti dalanna. Saan a kukua ti tao a magmagna uray ti panangiturong iti addangna.” (Jeremias 10:23) Ngem nupay di kabaelan ti tao a solbaren ti terorismo, sigurado a kabaelan ti Dios.

Ti Solusion

Dagidiay naranggasan wenno nairurumen ken makarikna a napaayda, maliwliwada iti sigurado a kari ti Biblia: “Dagiti napalungdo isuda ti agtaengto iti daga, ket dagiti awan pakababalawanna isuda ti mateddanto iti dayta. No maipapan kadagiti nadangkes, magessatdanto iti mismo a daga; ket no maipapan kadagiti nagulib, maalat-atdanto [maparutdanto, PBS] iti dayta.”​—Proverbio 2:21, 22.

Asidegen a matungpal daytoy a kari ti Dios. Ti dinutokanna nga Agturay, ti agturturayen nga Ari a ni Jesu-Kristo, sigurado a tungpalennanto dayta. Kuna ti padto ti Biblia maipapan ken Kristo: “Isu saanto a mangukom babaen iti aniaman a makita laeng dagiti matana, wenno uray mangtubngar sigun laeng iti banag a nangngeg dagiti lapayagna. Ket buyogen ti kinalinteg ukomennanto dagidiay nanumo, ket buyogen ti kinapalungdo mangipaayto iti pannubngar maigapu kadagidiay naemma iti daga.”​—Isaias 11:3, 4.

Wen, ti anak ti Dios a ni Jesu-Kristo, asidegen a pukawenna ti amin nga aramid a di nahustisiaan agraman dagidiay mangar-aramid iti dayta. Iti nalinteg a baro a sistema ti Dios, mapalabaston ti amin a kita ti terorismo ken kinaranggas. Ket amin nga adda ditoy daga agbiagdanto a sitatalged, nga awan pagbutnganda nga adda aniaman a mangdangran kadakuada.​—Apocalipsis 21:3, 4.

[Ladawan iti panid 12]

Ikari ti Biblia nga iti mabiiten pukawen ti Dios ti amin a panangirurumen ken kinaawan hustisia