Manipud Managbasatayo

Kasano Kapateg ti Langa?

Kayatko koma ti agyaman kadakayo maipaay iti artikulo nga “Agimtuod dagiti Agtutubo . . . Kasano Kapateg ti Langa?” (Hunio 8, 1986) Maysaak a 15 años ket nakataytayagak, 5 pie 8 pulgada tapno umiso. Kankanayonak nga agreklamo gapu iti kinatayagko, ngem ti artikuloyo ti nangipabigbig kaniak nga awan pakibiangan ti kinatayagko iti personalidadko. Ta, ti adda iti uneg ti napatpateg, saan a ti makinruar a langa.

J. D., Louisiana

Down’s Syndrome

Anian a rag-o ti pannakabasak iti kasta a makapabileg-puso nga estoria dagiti nagannak a siaayat a tinulonganda ti addaan lapped nga anakda. (“Tallupolo a Tawen ti Ayat ken Debosion,” Hulio 8, 1986) Makipagriknaak unay kadakuada iti debosionda. Bayat dagiti sumagmamano a tawtawen nagtrabahoak iti maysa nga institusion a nakaikabilan dagitoy nga ubbing. Kalpasan ti pannakabasak iti artikuloyo, nalagipko dagitoy nga ubbing a naikabil sadiay gapu ta dagiti nagannak ibainda ida wenno mariknada nga awanen ti namnama tapno makasuroda. Gapu ta dagiti ubbing nga addaan iti Down’s syndrome kasapulanda iti adu unay nga atension ken panangaywan, ti maysa nga institusion saan nga isu ti sungbat a pangtulong kadagitoy. Awan ti umdas a kamengna a mangtulong iti tunggal maysa a sinaggaysa, gapuna maag-agasan dagiti ubbing tapno patalnaen ida ken tapno maturogda iti kaaduan ti tiempo. Nasaysayaat ti kasasaad dagiti ubbing iti pagtaengan iti bukodda a gagangay nga aglawlaw.

D. H., Maryland

Nagduduma dagiti kasasaad, ngem umanamongkami a no nabileg ti rikna ti pamilia a mangaywan iti ubing nga addaan iti Down’s syndrome, daytat’ nasaysayaat a solusion ngem ti panangikabil iti ubing iti institusion.​—ED.

No ti Mannursuro Makapaaburido

Ti artikuloyo nga “Agimtuod dagiti Agtutubo . . . Kasano a Makasuroak No Makapaaburido ti Mannursurok?” (Marso 8, 1986) ti nangiparang iti nagsayaatan nga impormasion ken nagsayaatan a balakad maipaay iti siasinoman idiay eskuelaan. Impakitayo a ti panagsuro kasapulanna ti panangikagumaan, ket dagiti estudiante makapataudda iti nasaysayaat nga atmospera babaen iti pannakipaset iti klase ken panagsaludsod a buyogen ti panagraem.

M. C., Minnesota

Pagyamanan ti artikuloyo nga “Agimtuod dagiti Agtutubo . . . Kasano a Makatunosko ti Mannursurok?” (Abril 22, 1986) Idiay elementaria dagiti gagayyemko dakes ti panagsasaoda maipapan kadagiti mannursuro, gapuna idi rinugiak ti segundaria nakauy-uyongak kadakuada, nangnangruna ti mannursurok iti Italiano. Nanipud idi nabasak ti artikuloyo, binalbaliwakon ti kababalinko. Saan laeng a makitunosak kenkuanan no di ket situtulok nga aramidek ti homeworkko ket agimdengak idiay eskuelaan.

D. M., Italy

No ti Inay-ayatyo Matay

Ti asawak ken siak tarigagayanmi nga iyebkas ti naimpusuan a panagyamanmi iti nakaskasdaaw nga artikulo a “No ti Inay-ayatyo Matay . . . ” (Oktubre 22, 1985) Pudno a natulongannakami iti dakkel unay. Ti anakmi a lalaki nagsagaba iti leukemia iti siam a tawen idi rimmuar dayta nga artikulo, ket ti asawak ken siak adun ti nailuami. Ket idi napalabas a Disiembre natay ti anakmi a lalaki iti maikasangapulo ket uppat a tawenna. Daytoy ti nangiyeg kaniak iti tarigagayak unay nga ibaga: “Merci beaucoup.” Amin dagiti kakabsattayo a lallaki ken babbai a Saksi inaramidda amin a singasing a naited iti artikulo a “Kasano a Tumulong ti Dadduma.” Mariknamin a kabaelanmin ti tumulong kadagiti kakaduami kadagiti kakasta a rigat. Pagyamanan unay.

C. L., France