Iparit ti Panagsigarilio kadagiti Eroplano?

TI DOKTOR ken abogado a Lee S. Glass ti nangisalaysay iti daytoy a mapagsusuppiatan a topiko iti maysa nga artikulo ti Newsweek iti di pay nabayag.

Impadamagna: “Idi nakisaritaak iti maysa a superbisor ti panangmantener maipapan ti panagsigarilio, imbagana kaniak a medyo nagastos para kadagiti kompania ti eroplano. Amin dagiti libra ti tabako nga agbalin nga onsa ti dapo ti saan a basta agpukaw. Kalpasan a maideposito ti maysa a kantidad ti carcinogensda iti bara dagiti agsigsigarilio, rummuarda kadagiti pagruaran ti angin ket mangpataudda ti mekanikal a katupag ti atherosclerosis kabayatan dayta. Dayta nga asuk ti kumpet kadagiti tubo a metal kas ikakapet kadagiti urat ti agsigsigarilio, ket dakkel ti magastos tapno maisubli ti nasayaat a kasasaad ti sistema.” No kasta, apay a dagiti kompania ti eroplano palubosanda daytoy di kasapulan a paggastosan, idinto ta ti panangiparit ti panagsigarilio ti mamagsalimetmet ti adu a tiempo ken kuarta? “Ti rason no apay a dagiti kompania ti eroplano ket ipalubosda daytoy a paggastosan,” kuna ni Glass, “ket dagiti kuarta a mapastrek babaen ti pannakalako kadagiti tiket kadagiti agsigsigarilio ti nangatngato ngem ti gatad a masalimetmetan babaen ti panangiparit ti panagsigarilio.”

Di anamongan ni Glass daytoy nga argumento. Inrasonna nga iti panagbayagna, dagiti babassit a pannakalugi ti mapasubli babaen ti suporta nga ited dagiti di agsigsigarilio ken “tunggal organisasion a bumusor iti panagsigarilio manipud Savannah agingga ti San Francisco.” Kamaudiananna, dagiti kompania ti eroplano “ti makailugan kadagiti agsigsigarilio a dinto agsigarilio ta awanto ti tugaw a maipalubos ti panagsigarilio. Dakkelton ti pannakaipababa ti gastos ti panangmantener agsipud ta dagiti pagruaran ti angin ket awananda kadagiti mantsa ti asuk. Addanton dakkel nga addang nga agturong ti panangpasayaat ti nasional a salun-at ken mabalinto pay a makatulong a di direkta kadagiti sumagmamano a tattao tapno isardengda ti panagsigarilio.”