Agimtuod dagiti Agtutubo. . .

Kasano a Makapagserbiak iti Dios No Busorendak dagiti Dadakkelko?

DAGITOY nababaotda, nabutbutengda ken naparitanda, ket kamaudiananna napilitda a pumanaw iti pagtaenganda. Ti gubuayan daytoy a di umiso a panangtrato? Dagiti miembro ti pamiliada. Dagita ti kapadasan da Kamal, Chani, ken Jaswinder, dagiti tallo nga agtutubo nga agkakabsat manipud India nga agnanaed idiay Inglatera. Tarigagayanda ti agbalin a Kristiano, ngem dagiti dadakkelda​—kinapudnona ti intero a pamiliada​—ti sipipinget a nangbusor iti panangpanawda iti tradisional a narelihiusuan a pammatida.

Nalabit addakayo iti kasta met laeng a kasasaad. Babaen iti panagadal iti Biblia, napataudyo iti tarigagay nga agbalin a maysa a ‘managdaydayaw iti Ama iti espiritu ken kinapudno.’ (Juan 4:23) Mabalin, nupay kasta, a dagiti dadakkelyo naupaydan iti relihion wenno iti kabbaro a pammatiyo maisuppiat kadagiti nabayagen nga ik-ikutan a narelihiusuan a pammati. Aniaman ti kaso, dayta di koma mangpasiddaaw kadakayo nga adda ti pannangbusor iti pamilia. Impadto ni Jesus a ti pudno a Kinakristiano ti masansan a mangbingaybingay kadagiti pamilia. (Mateo 10:34-37) Ti parikut ket, Kasano ti panangtamingyo iti kasasaad?

Ni Kamal, Chani, ken Jaswinder nagtakderda a sititibker a maipaay kadagiti Nainkasuratan a prinsipio a maam-ammuanda. Nabaelanda ti siwayawaya a nagdayaw kalpasan laeng ti ipapanawda manipud iti industrial a Midlands a napan iti makin-abagatan a paset iti Inglatera. Kaskasdi, nupay kasta, mabalin a legal pay laeng nga agpaituraykayo kadagiti dadakkelyo. Ania, ngarud, ti maaramidanyo, bayat ti kaaddayo iti pagtaengan, tapno maparmek iti panangbusor dagidiay inay-ayatyo? Ti Biblia mangipaay kadagiti makaiwanwan a prinsipio.

Taginayonenyo ti Naraem a Kababalin

Idiay 1 Pedro 3:15 iparegta ti Biblia kadatayo ti panangiraman iti pammatitayo a “sipapakumbaba ken sidadayaw.” Kaskasdi, mabalin a naregtakayo unay iti kabaro a naammuanyo a kinapudno ti Biblia ta aglablabeskayo wenno ipilityo ti pammatiyo, nalabit pagbalinen pay a maag dagiti dadakkelyo. Awan ti mangayat nga agparang nga awan ammona. Gapuna no kankanayon ti panangbabalawyo kadagiti dadakkelyo gapu kadagiti bambanag a naadalyo, manginanamakayo iti negatibo a tignayda.

Ni Rita, maysa a tin-edyer nga agnanaed idiay Alemania iti dayta a tiempo, impudnona: “Ti isuamin a naammuak imbagak kadagiti dadakkelko a dagdagus, a kasla ibagbagak kadakuada a ti patpatienda ket saan a pudno.” Ngem dagiti dadakkel addaanda iti kalintegan a mangtaginayon iti personal a kapanunotanda ken pammatida a saanen a mababbabalaw​—nangnangruna kadagiti annakda. Inamin ni Rita: “Nagbalinak koma nga ad-adda pay a managraem kadakuada ket binigbigko koma ti pammatida iti Dios.”

Imbaga ni Pablo ken agtutubo a Timoteo a “dina ungtan ti maysa a lakay.” Saan kadi nga agaplikar met dayta iti pagtaengan, kadagiti dadakkelyo a mangay-ayat kadakayo?​—1 Timoteo 5:1.

Agtulnogkayo kadagiti Dadakkelyo

“Annak, agtulnogkayo kadagiti dadakkelyo,” ibilin ti Biblia. (Efeso 6:1) Sinurot ni Kay daytoy a prinsipio. Isut’ nakasarak kadagiti Saksi ni Jehova idi isu ti walo ti tawenna. “Dagiti dadakkelko pinadakkelkami a manangikaso kadagiti dadduma,” kuna ni Kay, “gapuna pinalubosandak nga agadal iti Biblia ken mapan makigimong.” Uray pay no kasta, ni Kay masapul nga agtrabaho a naimbag tapno masiguradona nga amin nga ibagbagana ken inaramidna iparangarangna a naimbag ti pammatina.

“Idi rinugiakon ti makitimpuyog iti ili ni Jehova,” inlawlawag ni Kay, “nabigbigko a no saanak nga agtulnog, saan laeng a di magustuan dagiti dadakkelko dayta no di ket dida makita ti kinapudno nga addaan iti naimbag nga impluensia kaniak. Gapuna no kalikagumanda ti panangibellengko iti basura, agawidak iti naikeddeng a tiempo, agsanayak iti piano, wenno aniaman, padpadasek ti agtulnog iti inggana ti kabaelak. Pulos a diak sumungsungbat.”

Pulos a saan a nakiraman dagiti dadakkel ni Kay iti pammatina. Gapu iti panagtulnogna, nupay kasta, nabaelanna nga intultuloy ti pammatina nga awan ti pannakabusor, a nagbalin a bautisado a Kristiano idi agtawen iti 19.

Makisarita kadagiti Dadakkelyo

Kinuna ti masirib nga Ari a ni Salomon: “Ta maysaak nga anak ni amak, nadungdungngo ken kakaisuna nga ay-ayaten ni inak.” (Proverbio 4:3) Wen, ti kinapudno a dagiti dadakkelyo dida makiraman iti pammatiyo dina pagbalinen ida a kabusoryo. Kaskasdi nga ikagumaanyo ti agbalin a “pudno nga anak a lalaki” wenno anak a babai. Padasenyo nga awaten ti nakaro a panagleddaangda gapu iti panangitultuloyyo iti maysa a pammati a dida ammo. Iti dayta met laeng a tiempo, siwayawayakayo a mangiraman kadagiti rikriknayo ken pannakaseknanyo kadakuada. Pudno, gapu ta ti kapanunotanyo ti maiwanwanwanen babaen kadagiti prinsipio iti Biblia, mabalin a naidumakayo kadagiti dadakkelyo maipapan kadagiti dadduma nga isyu.​—1 Corinto 2:14.

Maysa nga agtutubo a lalaki a managan Alan, kas pangarigan, tarigagayanna ti mangbusbos iti ad-adu pay a tiempo iti Nakristianuan a ministerio. Dagiti dadakkelna, nupay kasta, tarigagayanda ti panagtultuloyna nga agadal iti kolehio. Malagip ni Allan: “Pagarupek a maamakak bassit iti pannakisaritak ken tatang maipapan iti kasta a kangrunaan a pangngeddeng. Gapuna inkeddengko a diak ibagbaga ti panagsardengko nga ageskuela​—ket dayta ti nangpataud iti adu pay parparikut. Masapul nga agtrabahoak a naimbag tapno ibangonko manen ti panagtalekmi iti maysa ken maysa, ta no inlawlawagko koma ti planok, uray pay no madida idi damo, pagarupek nga ad-adda pay ti panagraemna kaniak, ket dayta koma ti nangilisi kadakami kadagiti adu a pakarigatan.”

Ngem ania ti namataud iti panagkedked ni Allan a makisarita kadagiti dadakkelna? Impudnona: “Posible ti mamataud iti pannakaidadanes no dagiti dadakkel lapdanda ti banag a kayattayo nga aramiden. Mabalin a panunotentayo: ‘Daytoy ti nasursurok! Ti lalaki busorenna ti amana; dagiti kabusorna, dagiti kabbalayna met laeng!’” (Mateo 10:35, 36) Nakasursuro ni Alan iti narigat a pamay-an a dagiti dadakkel saan a masapul a tratuen ida kas kabkabusor. Itan mamalakaden: “Makisaritakayo! Ipakaammoyo dagiti rikriknayo. Pagarupek a kaaduan a nagannak umimdengda​—no makitada a pudno nga adda ti kinapasnek.”

Nupay no masapul a natibkerkayo kadagiti nadiosan a prinsipio, “no mabalin, ken kas iti kabaelanyo agbiagkayo a makippia kadagiti isuamin a tattao.” (Roma 12:18) Babaen ti panangipakaammoyo kadagiti dadakkelyo ti pudno a riknayo maipapan kadagiti dadduma a bambanag, masansan a maliklikan ti panagsinnungbat wenno mapabassit dayta. Siempre, no dagiti dadakkelyo ipapilitda ti panangalayo iti maysa a kurso iti panagtignay, ikagumaanyo a tungpalen ida no dayta a kurso saan a maisuppiat kadagiti prinsipio iti Biblia. Imbes nga agbaliwbaliwkayo, “maammuan koma ti isuamin ti kinaanusyo.”​—Filipos 4:5.

Ragpatenyo ti Panangsuportar dagiti Pada a Kristiano

“Ipangagmo ni amam a nagputot kenka, ken dika lalaisen ni inam intono bumaket,” kuna ti Proverbio 23:22. No dadduma, nupay kasta, dagiti di manamati a dadakkelyo ti mabalin a marigatan nga umawat kadagiti dadduma a pakaseknanyo. Maysa a ngangani makagteng iti kinatin-edyer a managan John, kas pangarigan, ti nangpadas a mangisalaysay iti prinsipio ti Biblia iti amana. Ti sungbat ti amana? “Diak kayat ti agpannuray iti Biblia wenno iti maysa nga organisasion, gapuna agsoloka!”

Ngem pudno a dika agsolsolo. Inkari ni Jesus ti panangsuportar dagiti naespirituan a “kakabsatmo a lallaki ken babbai” iti uneg ti kongregasion Kristiano. (Marcos 10:30) Ni Kay, a nadakamat a nasaksakbay, nasarakanna a pudno daytoy iti kasona. “Dagiti kakabsatko a lallaki ken babbai a Kristiano,” malagipna, “nagbalinda a kasla pamiliak.” Saanna kayat a sawen a ti aniaman a sabali a tao, nupay kasano ti panangayat iti dayta, ti mabalin a maisukat iti amin a pamay-an iti pudno a nagannak. Kaskasdi, iti uneg ti kongregasion makasaraktayo kadagidiay nga ingungotentayo​—kas kadagiti amma ken inna​—ken isuda a makaipaay kadatayo kadagiti napapateg a balakad ken pammagbaga.​—Idiligyo iti 1 Corinto 4:15.

Taginayonenyo ti Positibo a Panangmatmat!

Aminentayo, nga uray babaen iti tulong ti immun-unan a balakad, awan duadua masarakanyonto a narigat ti kasasaadyo. Ngem laglagipenyo: Agpadpada dagiti tattao ken kasasaad ti mabalin nga agbaliw! Dagiti tallo nga Indian nga agkakabsat a nadakamat iti pangrugian ti nangipadamag: “Gapu iti kinatibkermi ken ti managraem a kababalinmi, itan tagtagiragsakenmin ti naragsak a relasion iti intero a pamilia.” Maysa nga Ingles nga ubing a babai a managan Jane kasta met laeng ti insuratna: “Masapul ti pannakidangadangko iti namin-ano a daras ken makisuppiatak a maipaay iti kinapudno, ngem itan dagiti dadakkelko nalaklakadan nga awaten dagiti pammatik kas maysa a pudno a Kristiano, ket inanamaekon ti pannakabautisarko iti mabiiten.”

Kadagiti dadduma a kaso dagiti nagannak, a matignay babaen iti nagsayaatan nga ulidan dagiti annakda, nagbalinda metten a dedikado nga ad-adipen ni Jehova a mismo! Gapuna posible ti pannakagun-odyo iti panagraem gapu iti nadiosan a kurso ti panagtignayyo ket agbalinkayo nga ulidan saan laeng a “kadagiti matalek” no di ket kasta met kadagidiay nga inay-ayatyo iti pagtaengan. (1 Timoteo 4:12) Dikay koma sumuksuko iti determinasionyo nga agserbi iti Dios. Sikakararag a surotenyo dagiti singasing a naaramid ditoy, ken agpannuraykayo ken ni Jehova. Impanamnama ti salmista: “Ikumitmo ti dalanmo ken Jehova, agtalekka met kenkuana, ket isu ibanagnanto.”​—Salmo 37:5.

[Ladawan iti panid 18]

Dagitoy tallo nga agtutubo a babbai nagtalinaedda a natibker iti Nakristianuan a pammati nupay adda ti panangbusor ti pamilia