Ti “Clownfish” ken ti “Anemone”

Ti symbiosis kaipapananna ti “panagkadua.” No dagiti pareha magunggonaanda nga agpada, ti aramid ti maawagan met panagtinnulong. Kasta ti kasasaad iti nagbaetan ni Mr. Clownfish ken ni Mr. Carpet Anemone.

Kasano ti panagandar ti relasion?

Dagiti gamat ti anemone napnoda kadagiti mangsilud a selula. No dagiti mangsida iti dayta kamatenda ti makaay-ayo a clownfish, dagitoy ti masilud, mapapatay, ket dagitoy ti kanen ti anemone. Ti clownfish, kanenna met dagiti sobra ti anemone​—a masansan alaenna pay dayta manipud iti ngiwat ti anemone.

Ngem apay a ti clownfish saan a siluden ken kanen ti pagaponanna, nangruna no ti ikan takawenna ti taraon iti ngiwat ti pagaponanna?

Naammuan dagiti sientista a ti saan a pannakadangran ti clownfish ket saan a gapu ta mabigbig ti carpet anemone ti serbisio nga ipapaayna iti pagap-aponanna. Imbes ketdi, ti panagbaliw iti balkot ti ikan a buteg lapdanna ti panangiruar ti anemone kadagiti makasabidong a selulana a makasilud. Ni Mr. Anemone magunggonaan iti relasion, ngem ni Mr. Clownfish isu ti mangtengtengngel iti panagandar dagiti bambanag.