No Agsakit ti Uloyo

ANIA ti aramidenyo a maipaay iti pannakabang-ar? Maysa a remedio a kadagiti dadduma a tattao agkurri a kas met iti maysa nga agas isu ti supot ti yelo. Nabayagen a maus-usar a pangep-ep iti gurigor ken ti pannakabullo, ti yelo makaagas met iti sakit ti ulo, sigun iti nabiit pay a panagadal. Kadagiti 90 a pasiente a naadal a nagsagaba iti nakaro a sakit ti ulo, agraman dagiti migraines ti panangusar iti yelo nangipaayen iti bang-ar iti 71 porsiento. Nasurok a kagudua ti nakapaliiw iti dagdagus nga ibabassit ti sakit. Apay nga agkurri dayta?

“Ti sakit ti ulo patauden iti panagbussog dagiti urat a pagayusan ti dara,” kuna ni Dr. Seymour Diamond, direktor iti klinika iti sakit ti ulo idiay Chicago. “Ti lamiis pakebbetenna ti urat.” Irekomendarna ti panangikabil ti narumek a yelo iti maysa a supot a plastik ken ti panangideppel iti dayta iti mugingyo bayat iti 30 agingga iti 45 a minutos bayat a nakatugaw wenno nakaidda. Marikna ti pannakabang-ar a dagus gapu iti mangpipikel nga epekto ti yelo.