Panangmatmat ti Biblia

Makatulong Kadi ti Biblia kadagiti Malidliday?

Nalidayen ti biag ita para iti lakay ta ti asawana addan iti “nursing home.” Bayat ti panaglabas dagiti al-aldaw, inkeddengna nga awanen ti rason nga agtalinaed pay nga agbiag. Dayta ti gapuna a pinidutna ti maysa a paltog . . .

TI PANAGLIDAY ket naawagan a kas “ti sakit iti maika-20 a siglo.” Dayta saanna laeng a tiruen dagiti lallakay no di ket isu pay ti makagapu iti panangabuso iti droga, alkoholismo, ken uray pay ti panagbekkel kadagiti agtutubo.

Wen, ti panagliday ket maysa a moderno-aldaw a saplit. Dagiti panangikagumaan a mangpunno iti kinaawan ti mamaay iti panagliday ti masansan a napaneknekan nga awan ti mamaayna. Dadduma ti mangpadpadas a maaddaan kadagiti adu a “gagayyem”​—ket masarakandanto laeng a dagita a relasion ket masansan a narabaw ken saan a makapnek. Dadduma ti agapura a makiasawa. Napaliiw ti nalatak a sikologo a ni Dr. Joyce Brothers: “Ti panagapura a makiasawa saan nga isu ti sungbat [iti panagliday]. Sakbay ti panangtagiragsakyo iti aniaman a relasion, masapul nga addaankayo iti ad-adu pay a pannakaawat kadagiti parparikutyo a mismo.”

Ti Umiso a Panangmatmat

Ti Biblia, nupay kasta, mangitukon iti praktikal a panangmatmat iti panagliday. Aminentayo, a ti panagliday ket mabalin a nasaem, ngem ti panagwaywayas ket saan a kanayon a dakes. Ni Jesu-Kristo ket masasao a nangtagiragsak iti apagbiit a kanito iti panagsolsolo. (Mateo 14:13) Imbes nga agbalin a naliday ken naadayu, inusarna dagita nga okasion a maipaay iti kasapulan a panaginana ken panagkararag.​—Marcos 6:31; Lucas 9:18.

Ti leksion? No masarakanyo ti bagiyo met laeng nga agsolsolo, saan a masapul nga aglidaykayo! Pudno, ti panangmatmatyo iti panagsolsolo ket ad-adda a gapu iti panagrikriknayo ngem ti kinapudno ti panagsolsoloyo. Gapuna kasano ti panangusaryo iti tiempoyo no agsolsolokayo? Addada adu a napapateg nga ar-aramid a mabalinyo a tagiragsaken nga agsolsolo, kas iti panagimdeng iti musika wenno panangaramid iti nabayagen a naitantan a trabaho iti balay. Ti panagbasa iti Sao ti Dios ti mabalin a nangnangruna a makagunggona. Dayta ti “nabiag ken napigsa” ket maikkatna ti panangpanunottayo iti bagitayo met laeng. (Hebreo 4:12) No umiso ti pannakausarna, dagiti kanito iti panagsolsolo ti mabalin a makatulong kadakayo a maparegta​—iti pisikal, emosional, ken iti naespirituan.

Ti Nasayaat a Relasion kadagiti Dadduma

Addada tiempo, nupay kasta, a tarigagayanyo ken kasapulanyo ti pannakikadua kadagiti dadduma. Saan ngarud a nakaskasdaaw, ti Biblia ket addaan met iti balakad maipapan iti panangsukay iti makapnek a pannakirelasion kadagiti dadduma a tattao. Ti Proverbio 18:24, kas pangarigan, kunaenna: “Adda gayyem a nadekdekket ngem kabsat.” Ngarud saan a kanayon a nasken ti maaddaan iti adu a gagayyem tapno malapdan ti panagliday. Mabalin a maaddaankayo iti sumagmamano a nasinged a pannakipagayam.

Dagiti naliday a tattao, nupay kasta, masansan a masarakanda a narigat ti makipagayam. Ngem napaliiw ti manangbalakad iti pamilia a maysa a taga Canada: “Dagiti naliday a tattao, nangnangruna dagidiay adda kadagiti edad a 20, manginanamada iti adu unay, ngem dida kayat ti mangipaay iti aniaman a banag.” Ti Biblia kunaenna met a ‘ti suminsina birukenna ti tarigagayna met laeng.’​—Proverbio 18:1.

Gapuna no agsagsagabaka iti panagliday, mabalin a mangipakitakayo iti ad-adda a panaginteres kadagiti dadduma. No makasabetkayo kadagiti mabalin a kabbaro a gagayyem, mangipakpakitakayo kadi iti panaginteres kadagiti pakaseknanda wenno iturongyo kadi ti panagsasarita iti bagiyo met laeng? Tapno maikkat ti panagliday, masapul a ti maysa ket mangipaay.

Idiay Filipos 2:4 nangparegta ni apostol Pablo kadatayo a ‘saan a kitaen ti tunggal maysa kadakayo ti kukuana laeng, no di ket tunggal maysa kitaenna met koma ti kukua dagiti sabsabali.’ Kasano a maagasan dayta a balakad ti panagliday? Iti orihinal a pagsasao ti Biblia, ti berbo a naipatarus a “kitaen” ipamatmatna ti ‘panangpanunot’ wenno ‘panangsukimat’ a maipaay iti panggep a panangikeddeng iti kasayaatan a tiempo a panagtignay. Gapuna kitaenyo ti aglawlaw ket kitaenyo no siasino ti makasapul iti tulong, no siasino ti makasapul iti gayyem. Apaman a makakitakayo iti kasta a tao​—agtignaykayo! Adu a tattao ti mangkitkita laeng kadagiti bagbagida; dagiti dadduma ket maud-udi, no maaramid pay. Ti Biblia irekomendarna ti kasupadi: Umuna a kitaenyo dagiti dadduma.

Gapuna, tapno maaddaan kadagiti gagayyem, masapul a makigayyemka nga umuna! Kuna ti Biblia: “Mangtedka, ket maikkankayto.” (Lucas 6:38) Malaksid pay iti dayta, “naragragsak ti mangted ngem ti umawat.”​—Aramid 20:35.

“Saanak nga Agmaymaysa”

Ti natauan a relasion, nupay kasta, pulos a dina mapnek nga interamente dagiti kasapulantayo. Ti makagapu ket naparsua ti tao a makasapul iti nasinged a pannakikadua iti Namarsuana. (Idiligyo iti Mateo 5:3.) Ti pannakipagayam iti Dios mabalin a mapaneknekan a natalged, uray pay no ti natauan a pannakipagayam ket saan nga agballigi. Naminsan kinuna ni Jesu-Kristo kadagiti adalanna: “Adtoy! umay ti oras, ket dimtengen, a maiwarwaraskayto ket tunggal maysa mapanto iti dissona ket baybay-andakto a maymaysa.” Anian a makapaleddaang! Ngem mabalin nga ikuna ni Jesus: “Ngem saanak nga agmaymaysa, ta ni Ama adda kaniak.”​—Juan 16:32.

Ti pannakipagayam iti Dios ngarud isu ti kasayaatan nga agas iti panagliday. Gapuna mangipaaykayo iti tiempo a mangammo kenkuana. “Nanamenyo ket kitaenyo ta ni Jehova naimbag” babaen ti panangirugiyo iti panagadal iti Biblia. (Salmo 34:8; Juan 17:3) Ngem saan a masapul nga agmaymaysakayo.

Ti Dios nangala “kadagiti tattao a maipaay iti naganna.” (Aramid 15:14) Nasurok a tallo a milion a tattao itatta ti makapagpannakkel nga agaw-awit iti dayta a nagan kas Saksi ni Jehova. Maay-ayoda a tumulong kadakayo a mangammo maipapan iti daytoy a Dios. Laglagipenyo ti naliday a lakay a nadakamat iti pangrugian? Sakbay ti panangpapatayna iti bagina met laeng, maysa a Saksi ni Jehova ti simmarungkar kenkuana. Tinulonganda a mangapresiar nga adda maysa a sibibiag a Dios a mangipatpateg kenkuana. (1 Pedro 5:7) Ti panagliday sinukatan iti rag-o bayat ti panangrugina a nagadal iti Biblia.

Makapainteres, ti pannakilangen kadagiti pudno a Kristiano lukatanna met dagiti gundaway a maaddaan kadagiti kabbaro a gagayyem. Gapu ta dagita a pannakipagayam naibatayda iti panagayat iti Dios, dagitoy ket agnanayon, napaut a relasion. Gapuna sapulenyo dagiti tattao ni Jehova. Babaen iti tulongda ken ti tulong ti Sao ti Dios, masursuroyo ti mangiwalin iti panangraut iti panagliday.​—Mateo 12:48-50; Juan 15:14.