Ti Kinaragsak iti Panangited Maparang-ay Babaen iti Panangawat a Buyogen ti Panagyaman
SUBLIANYO a panunoten ti kakaskasar nga agassawa a nadakamat iti umuna nga artikulo. Makitayo kadi ida a mangreprepaso iti tunggal regalo nga inawatda, nga agkomkomento no kasano a ti tunggal banag nga inawatda ket isu dagiti kasapulanda? Makitayo aya ti nobia a siaannad a mangikabkabil kadagiti kubrekama ken supot ti pungan iti naisangsangayan nga aparador tapno nalaka nga alaen, dagiti plato iti estante, dagiti kubiertos kadagiti uyusen, ti toaster iti kusina tapno dagus a mausar nga inaldaw?
Agkaduada a nangibitin iti tunggal ladawan iti umiso a lugar, dagiti relo iti kasayaatan a lugarda. Inarkosanda ti segunda-mano a lamisaanda iti maysa kadagiti baro nga abbong ti lamisaan. Dagiti maibagay a napkins inkabilda iti pagikabilan iti napkins isu a manginayon pay iti buya ti kinapategna.
Pudno a maay-ayatanda iti daytoy a regalo—maysa a de koriente a paglukat. Ti nobia inanamaenna ti panangusarnanto iti daytoy a masansan a panglakagan iti trabaho. Dayta ti inted ti maysa nga ingungotenda a gayyem isu nga ammoda a saan a makagatang iti maysa a maipaay kenkuana a mismo. Ket daytoy a kubrekama, nga inaramid ti maysa a baketen nga ikitda nga addaan kadagiti im-ima nga agsakit iti arthritis. Mabalin nga inabutna ti adu a bulbulan a nangaramid iti dayta a nagpintas a ginansilio. Anian a trabaho iti ayat!
Impatpategda ti tunggal regalo. Alaenda ti maysa a banag ket isukatda iti sabali wenno iti kuarta? Saan a pulos! Ket adtoyen ti nakaay-ayat a paset kadagiti amin—ti panangiyebkasda iti panagyaman. Mangipaaydanto kadi ti tiempo a mangaramid iti dayta?
Nakaawatkayo kadin iti namaterialan a sagut, maysa a nangina wenno saan a nangina a sagut—maysa a bokey dagiti sabsabong, maysa a basket dagiti prutas, maysa a simple a mula iti balay nalabit? Dadduma kadi kadagiti ingungotenyo a gayyem ti nangdalus iti balayyo idi agsakitkayo wenno nagluto iti taraon a maipaay iti pamiliayo idi dikay mabaelan ti agluto? Nagyamankayo kadi kadakuada?
Anian a nakasimsimple a sao ti “agyamanak.” Babaen iti maysa laeng nga anges maisawang ti maysa dayta. Kaskasdi anian a masansan a ti panangiyebkas iti dayta ket di maikankano. Naminsan maysa a tsuper iti taxi ti nangisubli iti pitaka ti maysa a lalaki a nakaibati iti dayta iti luganna. Anian a sagut! Innala ti makinkukua ti pitaka nga awan ti uray maysa a sao. Panunotenyo laengen no kasano ti pannakapaay ti tsuper iti taxi gapu itoy a saan a kinamanagyaman. Isut’ nagsennaay, “No ti lalaki imbagana laeng koma ti ‘Agyamanak.’”
Maysa a ruar daytoy a magasin ti nangipadamag iti maysa a grupo dagiti ubbing a lallaki iti high-school a nangporma iti maysa a klab a maipaay iti panggep a tumulong kadagiti tattao. “Tulonganda dagiti madadaelan a motorista babaen ti panangtarimaanda kadagiti naplatan a goma, mangipaayda iti gas no dida ninamnama a naibusanda, ken tulonganda ida kadagiti dadduma pay a pamay-an,” kinuna ti artikulo. ‘Saanda nga agsingsingir iti kuarta a maipaay iti serbisioda. Dawatenda laeng kadagiti motorista a mangisuratda iti surat ti “panagyaman” a maipaay iti salansan iti klabda.’ Ania dagiti resulta? Ti pannakangiwat iti klab kinunana: “Ammoyo, agingga ita nakaawatkami laeng iti dua a surat, nupay no ti rekord ti klabmi nakatulongen kadagiti 150 a motorista iti uneg ti dua a tawen a pannakaorganisarmi.”
Kasano ti panagyamanyo iti kasta unay iti maysa a nakaisalakan iti biagyo? Panunotenyo laengen ti kasta a sagut nga impaay dayta kadakayo! Kaskasdi, maysa a lalaki ti nangirisgo iti biagna a mangisalakan kadagiti pasaheros iti lumlumned a barko, a nangiguyod pay iti 17 kadakuada manipud iti panangpetpet ni patay, a kalpasan dayta isut’ masapul a maawit a maiyawid a nabannoganen iti balayna. Idi napagsaludsodan adu a tawtawen kalpasanna no ania ti malagipna unay iti kasta a nakaturtured a panangalaw, isut’ simmungbat: ‘Daytoy laeng sir: Kadagiti sangapulo ket pito a tattao nga insalakanko awan ti uray maysa a nagyaman kaniak.’
Maysa kadi a pagilasinan iti kinakapuy ti panangibaga iti “agyamanak” a maipaay iti kinamanangngaasi, maysa a namaterialan a sagut, wenno sagut a biag? Dagitoyto kadi ti agyaman ken Jehova a Dios, ti Naindaklan a Mannangted-biag, a maipaay iti biagda a mismo? No saanda nga agyaman iti maysa a makitada, mainanamanto kadi nga agyamandanto iti Daydiay a saanda a makita?—1 Juan 4:20.
Pakasdaawan kadi nga adu kadagiti agtutubo itatta ti marigatan a mangiyebkas iti naimpusuan a panagyaman a maipaay iti regalo nga inawatda wenno ti kinamanangngaasi a naipakita? No dagiti nagannak dida ibaga ti “pangngaasim” ken “agyamanak,” dagiti annakda di met mainanama a mangaramid iti kasta.
Ti kinakurang iti panangapresiar ket maysa a pakailasinan nga agbibiagtayon “iti maudi nga al-aldaw.” Namakdaar ni apostol Pablo: “Kadagiti maud-udi nga al-aldaw umaydanto dagiti aldaw a napeggad. Ta dagiti tattao agayatdanto kadagiti bagbagida, . . . awan panagyamanda.”—2 Timoteo 3:1, 2.
No Kasano ti Mangipakita iti Panangapresiar
Ti panangdisenio ken panaglako kadagiti kard a “thank you” ket maysa a dakkel a negosio. Adu a kards ti mangiyebkas kadagiti rikna iti nakapimpintas a pamay-an. Nalaka ti gumatang kadagitoy ket ipatulod ida kadagidiay a nangited kadagiti sagsagut wenno nangipaay iti ar-aramid iti kinamanangngaasi. Ngem mainayon pay, saan aya a naayat ken naasi a banag ti manginayon iti personal a panagyaman, nga isuratyo kadakuada dagiti bukodyo a sasao iti panangapresiar iti bukodyo a surat—a nalabit inagananyo ti naawatyo a sagut ken no kasano ti panangapresiaryo iti dayta ken ti kinaragsak a naawatyo wenno inanamaenyo nga awaten manipud iti panangusaryo iti dayta?
Mairaman iti daytoy, no mabalin, saan kadi a ti naragsak nga ebkas iti panagyaman, maysa nga alamano, maysa a nabara a panangarakup, wenno dadduma pay a tignay iti panangipateg ti apresiaren ti nangited? No agreklamotayo nga awan ti tiempotayo a mangaramid iti kasta, ngarud panunotenyo ti tiempo, ti bannog, ken ti kuarta a binusbos ti nangited iti dayta a maigapu kadatayo. Ti ragsak iti nangited iti panangitedna ket maparang-ay pay babaen iti panangipakitatayo iti panangapresiar.
Nagsayaatan ti pananglagiptayo kadagiti sasao iti naindaklan kadagiti amin a manangipaay, ni Jesus: “Naragragsak ti mangted ngem ti umawat.” (Aramid 20:35) Din agbayag, iti umay a naindagaan a Paraiso iti kinalinteg, saan laeng nga inaldawto nga agyaman ti natauan nga agnaed iti daga ken Jehova a Dios a maipaay iti sagut iti biag no di ket mangipakitadanto met iti naayat a panangapresiar iti maysa ken maysa a maipaay kadagiti kinamanangngaasi dagiti kaarrubada. Sapay koma ta ipakitatayo itan ti panangapresiar ket makagun-odtayo iti anamong ni Jehova ken kadagiti kaarrubatayo.