Dimo Liplipatan nga Ibaga ti Pagyamanan!
KAANO ti naudi a nakaawatka iti thank-you note? Sika ngay, kaano ti naudi a nangipatulodka iti kasta?
Ita ta gagangayen ti makikomunikar babaen iti Internet, manmanon ti mangaramid kadagiti mensahe ti panagyaman nga insurat ti ima. Ngem ti panangibaga iti “thank you” babaen iti surat ket espesial a pamay-an tapno maammuan ti dadduma nga ap-apresiarem ti kinaimbagda. Dagitoy ti sumagmamano a singasing no kasano nga aramiden dayta.
1. Sika a mismo ti mangisurat tapno mas espesial.
2. Dakamatem ti nagan ti patulodam.
3. No adda naawatmo a regalo, dakamatem dayta ken ti planom a pangusaran.
4. Ulitem ti agyaman iti maudi a paset ti suratmo.
Ti ababa a surat ti panagyaman ket makaparagsak la ketdi iti umawat.
Isu nga inton maminsan nga adda mangsangaili, agaramid iti naimbag, wenno agregalo kenka, ipakitam a tagipatgem dagiti panagreggetna. Dimo liplipatan nga ibaga ti pagyamanan!
[Kahon/Dagiti Ladawan iti panid 28, 29]
Dear Anti Mary, (2)
Pagyamanan unay iti intedyo nga alarm clock! (3) Managladladawak nga agriing isu a makatulong unay kaniak dayta. Napalalo ti ragsakko a nakakita kadakayo itay napan a lawas! Sapay koma ta sitatalgedkayo a nakaawid. Inanamaek nga iti di agbayag, agkikitatayto manen.
Ulitek ti agyaman iti naimpusuan a regaloyo! (4)
Toy kaanakanyo,
John
[Ladawan]
(1)
[Kahon iti panid 29]
SINGASING
● Dimo espesipiko a dakamaten no mano ti naited a kuarta. Kas pagarigan, imbes a dakamatem no mano, mabalin a kastoy ti ibagam: “Pagyamanan iti kinaparaburyo. Usarekto dayta iti . . . ”
● Dakamatem ti maipapan laeng iti regalo ken ti panangapresiarmo iti dayta. Saan a kasapulan nga idetalyem ti maipapan iti bakasionmo wenno ti nabiit pay a panagpadoktormo.
● Dika ibaga ti aniaman a problemam maipapan iti regalo. Kas pagarigan, saan a nasayaat nga isuratmo ti, “Pagyamanan iti bado—ngem nakalawlawa met kaniak!”
[Kahon iti panid 29]
Iparparegta ti Biblia ti kinamanagyaman. (Lucas 17:11-19) Balakadannatayo nga ‘agkararag a di agressat’ iti Dios, sana innayon: “Mainaig iti isuamin agyamankayo.”—1 Tesalonica 5:17, 18.