“Ti Kadadakkelan a Sagut”
DAGITI nagannak a mangaramid iti amin a kabaelanda a mangpadakkel kadagiti annakda nga agbalin a desente, managtungpal-linteg, ken managbuteng-Dios maay-ayoda unay no dagiti annakda iyebkasda ti panangapresiar iti panangikagumaanda. Pudno daytoy nangnangruna kadagitoy “maudi nga al-aldaw” a ti maysa a pagilasinan iti tiempo isu ti ‘kinasukir kadagiti dadakkel.’—2 Timoteo 3:1, 2.
Ni Nancy, maysa a 15-años nga estudiante iti high school, pinadakkel dagiti nagannak a Saksi ni Jehova. Maysa nga aldaw ti mannursurona iti Ingles nangted iti klase iti maysa nga assaimen a mangisurat ti maipapan iti kadadakkelan pay laeng a sagut a naawatda. Ti sumaganad isut’ inted ni Nancy iti mannursurona, iti sidong ti paulo a “Ti Kadadakkelan a Sagut”:
“Adda adu a kita ti sagut ken mangisagsagut. Addada sagsagut iti ayat, gagayyem, ken talento. Kasta met, addada dagiti sagsagut a dika kayat, kas iti gura ken kinapanglaw. Adu dagiti manangisagut. Dagidiay a siaagum a mangipaay ken dagidiay a mangipaay gapu ta kayatda ti mangipaay. Ti kasayaatan pay laeng a sagut a naawatko isut’ inted ni tatangko, ti sagut a pannakaammo maipapan iti Dios.
“Daytoy a sagut ket maysa nga agpaut iti inggat’ tungpal-biag, saan a kas kadagiti dadduma a sagsagut a maibellengton kalpasan a narunoten. Dagiti bambanag a nasursurok paregtaennak iti intero a panagbiagko ken impluensiaanna ti isuamin a banag nga innak aramiden. Babaen iti panagadal maipapan iti Dios iti Biblia, isut’ personal a naam-ammok, kas maysa a gayyem a daydayawek ken pagraemak.
“Agingga iti ipapatay ni tatangko itoy a tawen, nagpannurayak kenkuana no kasapulak iti panangiwanwan. Dadduma kasta met ti aramidenda. Masansan diak makita ni tatangko no agawid nga aggapu iti trabaho agsipud ta okupado a bumisbisita ken mangipapaay iti tulong kadagidiay adda iti ospital. Itan mabigbigkon no kasano ti kinamanagparabur unay ni tatangko iti tiempona. Nupay no saanko a kadua a mangipaay itan iti tulong ken panangiwanwan a kasapulak, mabalinko ti agpannuray iti nailangitan nga Amak maipaay kadagiti bambanag a kasapulak iti intero a panagbiagko.
“Apresiarek unay daytoy a sagut, ket agyamanak iti Dios iti panangipaayna iti kasta a nakabilbileg ken matalek nga ama. Ti ulidanna addaanto iti agnanayon nga epekto kaniak. Inanamaek, a mabaelakto nga ipakita ti panangapresiarko bayat a tumataenganak ken suroten ti ulidan nga impasdek ni tatangko para kaniak.
“Ti pannakaammo iti Dios ket kankanayonto nga agbalin a kapapatgan a sagut kaniak, ket agyamanak agpadpada kadagiti dadakkelko iti panangipaayda itoy a sagut. Ti nagsayaatan nga ulidanda iti kinamatalek kankanayonto nga agtalinaed kaniak.”
Daytoy a salaysay ket inapresiar ti mannursuro, isu a nagkuna a nangsair iti kasta unay kenkuana, ket binasana dayta iti klase. Minarkaanna ti papel iti dua nga A-pluses, ti maysa maipaay iti linaonna, ket ti maysa maipaay iti grammar ken ti puntuasion.
Inapresiar met ti nanang ni Nancy ti salaysay. Kinunana: “Maay-ayoak unay. Gaput’ pudno a diak ammo no kasano ti pudno a panagrikrikna dagiti annak iti amin a tiempo, daytoy tinulongannak a mangawat a rumangrang-ay ni Nancy ket aw-awatenna a naimbag dagiti bambanag maipapan iti ipapatay ni tatangna agingga iti kabaelanna.”