Ti Managalsa nga Arsobispo
TI PRANSES a periodista limmugan iti maysa a taxi idiay Roma ket dinawatna ti pannakaitulodna iti Rospigliosi-Pallavicini Palace. Ti tsuper iti taxi ti nangmatmat kenkuana a buyogen iti pannakaammo ket kinunana “Si,” (Wen) itulodna iti “il vescovo ribelle!” (ti managalsa nga obispo).
Bayat dagiti adu nga al-aldaw tunggal maysa nga addaan iti pannakabigbig idiay Roma ti masmasdaaw. Iti dakkel a pannakapungtot dagiti autoridad iti Vaticano, ni Princesa Elvina Pallavicini, miembro iti maysa kadagiti kangrunaan a mabigbigbig a pampamilia iti Roma, ti immanamong a tumulong iti bumusbusor a Pranses a Katoliko nga arsobispo a ni Marcel Lefebvre a mangipakaammo kadagiti kapanunotanna idiay Roma, a nangibaon pay kadagiti ginasgasut nga imbitasion iti kasla pribado a kumperensia iti pagiwarnak. Impaayna nga usaren ni Lefebvre ti palacio ti pamilia a nagnaedan ti maysa a papa ken sumagmamano a kardinal nga inapona. Ti mangpakaro pay kadagiti bambanag, pinalubosanna (ti arsobispo) a mangaramid iti kumperensiana iti kuarto ti papa iti babaen ti nagdakkelan a kulandong ni Papa Clemente IX.
Nupay no adda ti kasta a panangparigat dagiti natatan-ok iti Vaticano kenkuana, nagtakder a sititibker ti princesa iti pangngeddengna. Ti pagiwarnak a Romano naan-anay nga impadamagna ti maipapan iti daytoy a gimong, a maibilang a “pananggargari” iti mismo “a ruangan iti Vaticano.” Ti tsuper iti taxi nalawag nga adelantado kadagiti lokal a damdamag!
Ti Iglesia “Saanen a Katoliko”
Ni Princesa Pallavicini inkalinteganna ti pangngeddengna, a kunkunana a ti Iglesia Katolika ket nabingaybingay ket ti kasta a “serioso a parparikut saan a marisot babaen iti mapagduaduaan a kinaulimek ngem marisot laeng babaen iti natured a nalaka a pannakaawat iti dayta.” Babaen iti panangitukon ni Arsobispo Lefebvre iti gundaway a mangiyebkas iti kapanunotanna, inanamaenna ti mangitandudo iti “talna ken kinakalma iti uneg ti lubong dagiti Katoliko.” Ti obispo nagyaman iti nangsangaili kenkuana ket binendisionanna ti babai ken ti sangakabbalayanna, ket pinadayawanna ida iti “panangtaginayonda iti tradisional a pammati.”
Agarup sangaribo a tattao ti nagatender iti gimong, a kangrunaanna dagiti tradisionalista a Katoliko a mangibagbagi kadagiti sumagmamano a pagpagilian, agraman ti adu a periodista iti pagiwarnak ken iti TV. Ti arsobispo inyebkasna ti kasta unay a dina pannakianamong iti opisial a polisa ti iglesia nanipud idi Maikadua a Konsilio ti Vaticano (1962-65). Ti Pranses nga inaldaw a pagiwarnak a Le Monde nagkomento: “Iti ngangngani dua nga or-oras ni [Arsobispo Lefebvre] inyebkasna dagiti sakit ti nakemna a maibusor iti baro nga Iglesia ‘a saanen a Katoliko.’ Awan ti inlaksidna: ti katekismo, dagiti seminario, ti Misa, ekumenismo, a din dakdakamaten ti ‘panamagtitipon kadagiti sakramento’ ken dagiti ‘naadalan-Komunista a kardinal.’”
Nagserra ni Arsobispo Lefebvre: “Ti kasasaad ket nakalkaldaang. Ti Iglesia agturturongen iti maysa a direksion a saanen a Katoliko ket dayta ti mangdaddadaelen iti relihiontayo. Agtungpalak kadi wenno agtalinaedak a Katoliko, maysa a Romano Katoliko, Katoliko iti ingganat’ tungpal-biag? Naaramidkon ti pilik iti imatang ti Dios. Diak kayat ti matay a kas Protestante.”
Ni Cardinal Poletti, ti vicario ni Paulo VI iti diocese ti Roma, kunana a babaen iti panangorganisarna iti daytoy a kumperensia idiay Roma, ni “Monsignor Lefebvre sinaktanna ti pammati, ti Iglesia Katolika, ken ti nadiosan nga Apo Jesus [ken] personal a sinaktanna ti papa, inabusona ti anusna ken inkagumaanna ti mangpataud iti riribuk iti uneg ti apostoliko a seseda.”
No Kasano a Nangrugi ti Iyaalsa
Dayta a kumperensia ket naaramid idi Hunio 6, 1977. Ngem uray nasapsapa pay ngem idi 1965, sakbay a nagpatingga ti Maikadua a Konsilio ti Vaticano, addan naipadpadamag a “panagsisina” iti uneg ti Iglesia Katolika. Adu a konserbatibo a Katoliko ti makarikna a ti Vatican II ket mangiserserrek kadagiti reporma a nangliput iti tradisional a Katolicismo.
Ni Arsobispo Lefebvre, dati nga arsobispo iti Dakar, Senegal, ken obispo iti Tulle, iti makintengnga nga abagatan a Francia, ket nakipaset iti Maikadua a Konsilio ti Vaticano. Idi 1962 isut’ nabotosan a superior general iti “Holy Ghost Fathers” idiay Francia. Ngem ti kumarkaro a di pannakitunos kadagiti polisa iti Vatican II a maiyap-aplikar iti uneg ti Iglesia Katolika ti nangiyeg iti panagikkatna manipud iti dayta a saad idi 1968.
Idi 1969 maysa nga obispo a Sueko a Katoliko ti nangipalubos iti bumusbusor nga arsobispo a manglukat iti maysa a seminario a tradisionalista iti uneg ti diocese iti Fribourg, Switzerland. Iti sumaganad a tawen, ni Arsobispo Lefebvre imbangonna ti inawaganna iti “Saint Pius X Sacerdotal Fraternity” ket linukatanna ti maysa a seminario idiay Ecône idiay Sueko nga ili iti Valais. Inaramidna daytoy babaen iti pananganamong iti Katoliko nga obispo iti Sion.
Tapno pangrugian, daytoy a seminario ket maipaay a nangnangruna kadagiti bumusbusor. Dagiti seminarista, siempre, mangisuotda pay laeng kadagiti nangisit a kapa ket naan-anay nga umawatda ti edukasion iti tradision. Maaramid dagiti Misa iti Latin, ngem impakaammo ni Papa Paulo VI a ti rebisado a Misa ti masapul a maaramid iti gagangay a pagsasao. Ngem ti seminario ket pinalubosan dagiti opisial nga autoridad iti iglesia gapu ta ni Arsobispo Lefebvre dina insingasing ti panangsanayna kadagiti masanguanan a papadi agingga iti pannakaordinda iti dayta a tiempo. Ninamnamana a makompletodanto ti edukasionda idiay ibilangna a dua laengen a nabati a mangikalintegan iti tradisional a Katolicismo, ti Latran Pontifical University idiay Roma, ken ti Fribourg University idiay Switzerland.
Ti parikut pudno a nangrugi idi kinuna ni Arsobispo Lefebvre nga uray dagitoy dua a Katoliko nga universidad ket saan a mapagtalkan a mangsanay kadagiti masanguanan a papadi iti ibilangna a pudno a tradision a Katoliko. Inkeddengna nga isu a mismo ti mangordin kadagiti papadi iti masanguanan a masanay idiay seminario ti Ecône. Ti mamagbalin pay a narikrikut kadagiti bambanag, idi 1974 isut’ nangipablaak iti maysa a manifesto a nangiyebkas iti nakaro a panangbusor iti kaaduan a reporma iti Second Vatican Council. Idin ti Ecône addaanen iti nasurok a sangagasut a seminarista a sinanay ti maysa a grupo dagiti propesor a tradisionalista.
Idi 1975, nagtignay babaen iti lokal nga obispo a Sueko, ti Vaticano inikkatna ti autorisasionna manipud iti seminario iti Ecône. Dina inkankano daytoy, ni Arsobispo Lefebvre intultuloyna ti nangordin kadagiti kabbaro a papadi bayat ti pannakakompletoda iti panagadalda. Maipaay iti daytoy, idi 1976 ni Papa Paulo VI ti nangsuspender kenkuana manipud kadagiti amin nga ar-aramid iti kinapadi agraman ti panangipaay iti Misa, panangimaton iti umuna a komunion, panangaywan kadagiti sakramento, ken, kas obispo, a mangordin kadagiti papadi. Agsipud ta nagtultuloy ti Ecône nupay kastoy ti kasasaad, daytoy ti nangiyeg iti mapagduaduaan a kasasaad iti nakaro ti Kinakatolikona a seminario a mangpatpataud kadagiti nakaro ti panangitandudona ti tradision a papadi a Katoliko nga inordinan ti saan a mabigbigbig nga obispo nga ad-adda a Katoliko ngem ti papa!
Ti Kasaknap ti Iyaalsa
Ti iyaalsa daytoy a Pranses nga arsobispo ket di maitutop a sawenen no dayta ket limitado laeng iti seminario idiay sakaanan iti Sueko nga Alps. Ngem ni Arsobispo Lefebvre dagus a nagbalin a pakatignayan iti maysa a mabigbigbig a paset iti Katolicismo iti isuamin a lubong. Iti librona a L’Église Catholique 1962-1986—Crise et renouveau (The Catholic Church 1962-1986—Crisis and Renewal), ti autor a ni Gérard Leclerc nagsurat: “Ti suppiat dagiti tradisionalista dina iparangarang ti pagannayasan ti bassit a minoridad. Dayta iyebkasna ti dakkel a paset dagiti matalek a Katoliko.”
Ni Arsobispo Lefebvre inawatnan ti pinansial a panangsuportar iti adu a konserbatibo a Katoliko iti intero a lubong. Daytoy ti nangipaay kenkuana iti nasaknap a panagdaliasat, a masansan iti panangawis dagiti mangitantandudo iti tradision a Katoliko. Binabalawna ti Vatican II iti imatang dagiti adu a nagdengngeg kadagiti adu a pagpagilian, ket mangaramid iti Misa sigun iti ugali ti Konsilio iti Trent a Latin idi maika-16 a siglo, a maawagan Tridentine, wenno ritual ni Pio V. Dagitoy a gimgimong ti tradisionalista ti maaramid no dadduma iti saan a kadawyan a luglugar, a kas dagiti saan a maus-usar a supermarket iti amianan iti Londres, Inglatera.
Daytoy a nasaknap a pinansial a suportar ti namagbalin iti managalsa nga arsobispo a manglukat kadagiti kanayonan a seminario a maipaay a pangsanayan kadagiti tradisionalista a papadi a Katoliko idiay Francia, Alemania, Italia, Argentina, ken ti Estados Unidos. Idi Pebrero 1987, ti inaldaw a pagiwarnak a Pranses a Le Figaro ti nangipadamag a dagitoy nga institusion ti mangsansanayen kadagiti 260 a seminarista. Ni Arsobispo Lefebvre mangor-ordinen iti nagbaetan iti 40 ken 50 a papadi iti tinawen manipud kadagiti adu a paspaset iti lubong, agraman iti Africa.
Adu kadagitoy a tradisionalista a papadi ti mangimatmaton kadagiti 75 a “monasterio” nga impasdek ti “Fraternidad” ni Arsobispo Lefebvre kadagiti 18 a pagpagilian iti Norte ken Sud America, Europa, ken Africa. Dagitoy a papadi selebraranda ti Misa iti Latin a maipaay kadagiti konserbatibo a Katoliko kadagidiay a pagpagilian.
Dagiti tradisionalita a serbisio ket masansan a maaramid kadagiti naisangsangayan ti pannakapataudna a kapilia. Ngem umad-adu nga uman-anamong a Katoliko ti makidangdangadang iti orthodox a herarkia Katoliko tapno makagun-odda iti kalintegan a mangusar kadagiti kadawyan a simbaan a Katoliko a maipaay kadagiti serbisioda. Daytoy ti nangipaay iti kasasaad a nakaro a mangriro kadagiti adu a napasnek a Katoliko.
Pannakidangadang Maipapan kadagiti Simsimbaan
Nanipud pay idi 1969, idi impakaammo ni Papa Paulo VI ti baro a Misa a mangiraman iti pannakausar iti gagangay a pagsasao ken dagiti dadduma pay a reporma, dagiti tradisionalista a Katoliko nangorganisarda iti pribado a Misa a mangus-usar iti daanen a Latin a ritual. Idiay Paris, Francia, ginasgasut kadakuada ti agtitipon idiay Wagram Hall, iti asideg iti Arc de Triomphe. Agsipud ta ti baro a ritual ket kapilitan iti dayta a tiempo, ti lokal a Katoliko nga obispo agkedked a mangipalubos kadakuada a mangusar iti maysa a simbaan.
Kamaudiananna, idi Pebrero 27, 1977, dagiti tradisionalista nagtignayda a bukodda ket, babaen ti panangidaulo iti maysa a konserbatibo a padi, kapilitan nga inusarda ti simbaan ti Saint-Nicolas-du-Chardonnet, iti Latin Quarter. Dagiti natudingan a padi a Katoliko ken dagiti paspasurotna ti nakasarak kadagiti bagbagida a napapanaw manipud iti simbaanda a mismo. Idi pinadasda ti mangaramid iti Misa iti uneg ti simbaan kalpasan ti sumagmamano nga aldaw adda ti panagdadangadang. Maysa a padi ti masapul a maipan iti ospital, ket dagiti dadduma nagkamangda iti asideg a presbiterio.
Ita, sangapulo a tawenen kalpasanna, ti Saint-Nicolas-du-Chardonnet ti us-usaren pay laeng dagiti tradisionalista a Katoliko, nupay addan ti dua a bilin ti korte a mangparparuar kadakuada. Agarup 5,000 a tattao ti timmabuno iti lima a Latin a Misa a maaramid iti tunggal Domingo. Dagiti serbisio ti imatonan ti maysa a padi nga inordinan ni Arsobispo Lefebvre idiay Ecône, ket ti “managalsa nga obispo” kankanayon nga umay itoy a simbaan a maipaay iti panagkompirma dagiti tradisionalista nga ubbing a Katoliko.
Sumagmamano a bulbulan kalpasan ti damo a panangusar dagiti tradisionalista iti Saint-Nicolas-du-Chardonnet, sumagmamano a gasut a progresibo a Katoliko ti nangaramid iti gimong iti protesta a maibusor iti pilit a panangusarda itoy a simbaan. Sumagmamano a papadi ken propesor a Katoliko manipud Sorbonne ken ti Institut Catholique de Paris ti nakipaset. Ket kellaat, maysa a grupo dagiti tradisionalista nga agtutubo a Katoliko ti simrek iti pasilio ket winarawarada ti gimong, a nangusarda kadagiti bareta a landok ken smoke bomb. Sumagmamano a tattao ti nasugatan, ket maysa a propesor a Katoliko ti naipan iti ospital.
Ti Katoliko nga obispo iti Strasbourg iti makindaya a Francia ti riniribuk dagiti tradisionalista a Katoliko idi pinadasna ti sumrek iti maysa a simbaan nga inusarda tapno mangaramidda iti Misa a Latin. Idiay Paris dagiti “commandos” iti tradisionalista a Katoliko ti simrek kadagiti simsimbaan a Katoliko tapno pasardengenda dagiti serbisio. Inaramidda daytoy agsipud ta maus-usar ti maysa a babai a mangbasa iti ebanghelio bayat ti Misa wenno agsipud ta dagiti ministro a Protestante ken Orthodox addada a maipaay iti ekumenikal a serbisio.
Idi Marso 1987 maysa a tradisionalista ken gagangay a Katoliko ti ngangngani nagdinnanog idiay Port-Marly, iti laud laeng iti Paris, ket kasapulan a pagsinaen ida ti polis. Ti panagdangadang ket maipapan iti no asino ti mangusar iti simbaan a Katoliko iti Saint Louis. Iti sumaganad a bulan dagiti tradisionalista a Katoliko inusarda ti battering ram wenno makina a pagbarena a mangdadael iti pader ket sumrekda iti maysa a simbaan tapno agrambak iti Misa iti Domingo Ramos iti Latin. Ti The Times iti Londres, Inglatera, impadamagna daytoy iti paulo a “Gubat iti St Louis—dagiti rebelde a Pranses a Katoliko nagsublida iti mapagsusuppiatan a simbaan.” Maaramid ti Misa a Latin a maipaay kadakuada babaen ti maysa a padi nga inordinan ti rebelde nga arsobispo a ni Lefebvre.
Maysa a Sugat iti Dasig iti Iglesia
Ti autor a Katoliko a ni Gérard Leclerc nagsurat: “Nasurok a 20 a tawtawen kalpasan ti [Vatican] Council, dagiti tradisionalista a bumusbusor nagtalinaedda a silulukat a sugat iti dasig ti Iglesia.” Ket iti libroda a Voyage à l’intérieur de l’Église catholique (A Journey Inside the Catholic Church) da Jean Puyo ken Patrice Van Eersel kunada: “No ti Roma maupay iti kasta unay gapu iti ar-aramid ni Monsignor Lefebvre, dayta ket gapu ta isut’ mangsalsaludsod kadagiti kangrunaan a salsaludsod. Ni Obispo Mamie iti Fribourg ken Geneva, napilitan a mangkondenar iti ar-aramid iti managalsa a kaduana, ti nangibaga kadakami a sipaprangkesa: ‘Ti rigat dagidiay matalek a simmurot kenkuana ket saan nga awan ti pamuonna. Ti sangaribo-tawen a doktrina iti Iglesia ket agpegpeggad iti ipapatay.’”
Gapuna, manipud kadagiti nababaknang a natatan-ok a tattao idiay Roma agingga kadagiti minilion nga agtataeng kadagiti nababa laeng a pagtaengan iti isuamin a lubong, adu a napasnek a Katoliko ti nakaro ti pannakasdaawda. Agim-imtuodda: “Apay a nabingaybingay ti iglesiak?” Ti rason no apay, ken no ania ti ar-aramiden dagiti dadduma a Katoliko maipapan iti dayta, ti mausigto iti sumaganad.
[Ladawan iti panid 6]
Arsobispo Marcel Lefebvre
[Credit Line]
UPI/Bettmann Newsphotos
[Ladawan iti panid 7]
Ecône, ti tradisionalista a seminario ti managalsa nga arsobispo idiay Swiss Alps
[Ladawan iti panid 9]
Simbaan iti Saint-Nicolas-Chardonnet, idiay Paris, a saan a legal nga inusar dagiti tradisionalista a Katoliko bayat iti napalabas a sangapulo a tawtawen