Ti Awan Pagtaenganna​—Adda Aya Namnama?

“TI PAGLINONGAN, ket maysa a natauan a kasapulan a mairanggo ti kinapategna iti taraon ken danum ket ti pagtaengan isut’ maysa a nasken a kasasaad iti sibilisado a panagbiag. Oras a makitan dagitoy a kinapudno, ti kinaawan pagtaengan ket mabigbig ti kinaisuna: maysa nga insulto iti natauan a dignidad ken panangilibak iti kangrunaan a natauan a kalintegan.”​—Lord Scarman, presidente ti United Kingdom Council for the International Year of Shelter for the Homeless.

Dagiti panagbitla a kas iti daytoy ipakitana a silalawag a dagiti opisiales ken dagiti gobierno pagaammoda unay ti pannakasapul ti ad-adu ken nasaysayaat pay a pagbalayan, ket dagiti panagregget maiturturongda a mangpunno iti dayta a pakasapulan. Ti saludsod, nupay kasta, ket: Kasano kaepektibo dagitoy a panagregget? Usigentayo ti sumagmamano a pangarigan.

Surbey kadagiti Agdama a Panagregget

Tapno maipaay dagiti kasapulan ti dumakdakkel a populasion ti Bombay, inreport ti The Times of India, a 125 a baro a balbalay ti kasapulan tunggal aldaw. Nupay kasla saan unay a dakkel a bilang daytoy, daytat’ agdagup iti nasurok a 45,000 units iti makatawen, ket dayta laeng ti manglaon iti panagdakkel. Ngem kasano met ngay ti nasursurok ngem 800,000 a nababbaba ngem ti estandarte, saan a nadalus a kalkalapaw kadagiti napanglaw a disso idiay siudad? Tapno masukatan dagita iti 20 a tawen, ti sabali pay a 110 nga units ti kasapulan a maipatakder iti inaldaw. Dayta ti mangiyeg iti dagupna a nasurok a 85,000 units iti makatawen. Tapno maaramidan dayta, “ti partak ti produksiontayo ti masapul a lumagto iti mamimpat a daras,” kuna ti report. Umas-asping iti dayta, iti nagbaetan ti 1961 ken 1981, idiay New Delhi, ti kabisera ti India, ti nakaragpat laeng ti kurang pay ngem maysa a kakapullo iti kalatna a mangibangon iti 450,000 units a pagtaengan.

Idiay Africa dagiti gobierno ket marigrigatanda iti krisis ti mapagtaengan gapu iti idadarup ti populasion nga aggapu kadagiti aw-away nga agturong kadagiti siudad. Iti sumagmamano a pagilian, “dagiti awan panggedanda nga agtataeng iti siudad ket mapasublida lattan kadagiti aw-away,” kuna ti The Star, maysa a periodiko idiay Johannesburg, Sud Africa. Kadagiti dadduma, dagiti laeng establisado nga agtataeng iti siudad ti mapalubosan nga agtrabaho sadiay. Agpapan pay iti internasional a panangipukkaw iti panangidumduma, nangnangruna idiay nairaman iti rasa, nagballigi kadi dagiti kakasta a nainget a pamay-an? “Ti problema ti panangted kadagiti trabaho ken pagtaengan nga agpaay kadagiti taga aw-away a nagkamang isut’ maysa a mamagpeligro a di mamedmedan iti kaaduan iti Africa​—ken pudno unay, iti intero a Maikatlo a Lubong,” kuna ti report. “Adda a naipadles a dagiti kangrunaan a siudad ti Africa maipasangonto iti pannakarpuog dagiti sosial ken edukasional a sistemada ken ti serbisioda a maipaay iti danum, koriente ken pagibellengan ti rugit nga imburnal.”

Idiay Britania ti balay nga agpaay kadagiti napanglaw ken ti panangtarimaan wenno panangsukat kadagiti agrakrakayan a pagtataengan ket dua kadagiti kangrunaan a problema nga umaw-awag iti naganat a panangasikaso. “Kaskasdi maigiddato iti dayta maibagbaga kadatayo a kas maysa a nasion ‘ditayo kabaelan’ ti mangbusbos ti kuarta a mangparmek kadagitoy nakakigkigtot a problema, awan aniaman a kita ti restriksion iti tulong a pagbaybayadtayo kadagiti tattao a gumatgatang kadagiti balbalayda,” kuna ti Catholic Herald. Gaput’ pannakakissay ti pundo kadagiti nababa ti nginana a pagtaengan, bimmaba ti panagbangon iti basbassit pay ngem kakalima iti rukodna iti napalabas a sangapulo a tawen. Mainayon iti dayta, “addaantayo met ti nagdakkelan a babayadan iti panagtarimaan, agpadpada agpaay kadagiti pagtataengan a publiko ken pribado, a napattapatta iti £50 milion,” kuna ti report. No kasano ti plano ti gobierno a mangtaming kadagitoy a paggastuan ket saan a nalawag.

“Ti problema iti kinaawan pagtaengan idiay America ti nakarkaro ngem ti problema a mangpaadda iti pagtaengan kadagiti desperado ken kadagiti awan kabaelanda,” kuna ti editorial iti New York Post. Kas pangarigan, ti siudad iti Nueva York agbaybayad ti promedio a $1,800 iti makabulan tapno mataginayon ti maysa nga awan pagtaenganna kadagiti otel ti welfare, ket ti tinawen a gastos iti daytoy a serbisio ket dumteng iti $125 milion. Mainayon pay, daytat’ mangbusbos iti $250 milion iti makatawen a mangpapaandar kadagiti 28 a paglinongan ti publiko. Kaskasdi, ti bilang dagiti awan pagtaenganna a tattao iti siudad ti agtultuloy nga agpangato. Apay? “Awan ti makaammo no kasano ti kasayaatan a panangdanon kadagiti awan pagtaenganna,” kasta ti panagserra ti maysa a naisangsangayan a report maipapan kadagiti awanan pagtaengan iti U.S.News & World Report. “Dagiti nasaysayaat a pagtaengan, ti ad-adu pay a panggedan ken ti nalaka a pannakagun-od kadagiti selio ti taraon ti saan a makatulong kadagidiay nadadael ti isipna wenno nakemmeg iti droga wenno alkohol.”

Ti Panangagas kadagiti Sintomas

Nalawag, ti panangsolbar kadagiti problema ti pagtaengan itatta ken ti panangsaranget kadagiti kasapulan ti pagtaengan inton bigat ti nagbalin a maysa a nagdakkelan a trabaho nga agpaay kadagiti gobierno iti intero a lubong. Apay? Agsipud ta ti problema iti kinakirang ti pagtaengan ken kinaawan pagtaengan ket saan a maysa a naiputputong nga isyu. Dayta ti nauneg pannakailagana kadagiti dadduma pay a dadakkel a problema, kas iti kasta unay a panagadu ti populasion, kinapanglaw, kinaawan panggedan, ken ti implasion. No awan ti naballigi a panangparmek kadagiti dadduma a problema, nalabit awan ti dakkel a panginanamaan maipapan iti pagtaengan. Ngem adda aya nasion ditoy daga itatta a siwayawaya manipud aniaman kadagiti problema a nadakamat? Kinapudnona, adda aya gobierno nga addaan ti pudpudno a panagballigi a mangtaming kadagitoy a problema? Awan.

Iti lawag daytoy, dagiti panagregget a maipapaay a pangsolbar kadagiti problema ti kinaawan pagtaengan ti mabalin a maiyarig iti panangtapal kadagiti rekka wenno berri ken kadagiti agtedted iti marmarpuogen a balay. Nupay dagiti ranta ket mabalin a nadayaw, ti epektona ket panangag-agas laeng kadagiti sintomas. Ti kasapulan isu ti panangrebba iti nabuloken a patakder ken ti panangibangon ti baro a balay manipud ti pundasion nga agpangato.

Daytoy a panangmatmat ket saanen a baro. Daytat’ naisuron 19 a siglo ti napalabasen, ket dayta ti nakaad-adelantado iti panawen a dagiti naigaloten kadagiti tradision a papangulo kadagidiay nga al-aldaw nakitada a narigat nga akseptaren dayta. “Awan ti mangtakup iti daanen a bado babaen iti baro a lupot, ta ti baro a takup kumsen ket dakdakkelto pay ti abut ti daan a pagan-anay,” kuna ni Jesu-Kristo. (Mateo 9:16, Today’s English Version) Aniat’ adda a pampanunotenna?

Ti Permanente a Solusion

Imbes nga ag-agasan laeng dagiti sintomas, tinaming ni Jesus ti makagapu manipud ramut. Sinursuruanna dagiti adalanna a kumita iti Pagarian ti Dios a maipaay iti permanente a solusion saan laeng a kadagiti parikut ti pagtaengan no di ket kasta met amin dagiti an-anayen a nangsaplit iti sangatauan itatta. “Umay koma ti pagariam. Maaramid koma ti pagayatam, kas sadi langit, kasta met ditoy daga,” ingunamgunamna kadakuada a kararagen. (Mateo 6:10) Dayta a Pagarian, nga isunto ti mangitungpal ti panggep ti Dios ditoy daga, saannanto laeng a takupan ti narunoten ken nadadaelan a sistema dagiti bambanag. Daytantot’ mangsukat iti dayta.

Aniat’ kaipapanan amin daytoy kadakayo? Denggenyo ti naipaltiing a kinuna ni Isaias a maysa a Hebreo a mammadto idi ugma: “Ket isuda bangonendanto dagiti balbalay ken agtaengdanto kadakuada, agmuladanto kadagiti kaubasan ket kanendanto ti bungada. Isuda didanto mangbangon ket sabali ti agnaed, didanto agmula ket sabali ti mangan. Ta kas kadagiti al-aldaw ti maysa a kayo, kastadanto dagiti al-aldaw ti ilik ket dagiti pinilik agragsakdanto iti mabayag iti aramid dagiti im-imada.”​—Isaias 65:21, 22, The Jerusalem Bible.

Nadlawyo aya a ti panangipaganetget ket saan a ti basta panagbangon ti ad-adu a balay? Imbes ketdi, daytat’ adda iti kinalinteg, panagpapada, ken kinahustisia. Dikayo aya iliwen ti agbiag iti sidong ti kasta a gobierno? Saankayto laeng a maaddaan ti maysa a balay a kabukbukodanyo, a daytat’ nasursurok ngem iti inanamaen ti kaaduan a tattao a maadda kadakuada, ngem agbiagtayto met kadagiti natalna nga aglawlaw, nga addaan nawadwad a taraon, nadalus nga angin ken danum, ken naimbag a kakaarruba. Amin dagitoy, ken ad-adu pay isuda dagiti bambanag a maaramidanto ti nalinteg nga administrasion ti Pagarian ti Dios.

Kas panagtulnog iti bilin ni Jesus, dagiti Saksi ni Jehova itatta ti mangibagbaga kadagiti tattao iti uray sadino maipapan iti “daytoy naimbag a damag iti pagarian.” (Mateo 24:14) Babaen kadagiti pinanid daytoy a magasin ken ti kaduana, Ti Pagwanawanan, agraman ti personal a panagsarungkar, pagregreggetanda nga iyeg iti atensionyo dagiti nakaskasdaaw a panginanamaan nga adda iti masanguanan. Igunamgunammi ti panangalayo iti panawen a mangammo no kasano a maysakayonto met kadagidiay agnaed iti sidong dayta nalinteg a gobierno a mangisubli iti intero a daga nga agbalinto nga agnanayon a Paraiso a pagtaengan ti sangatauan.

[Blurb iti panid 12]

“Bangonendanto dagiti balbalay ket agtaengdanto kadakuada.”​—Isaias 65:21, JB