“Kas kadagiti Bitbituen ti Langit”
“PAADUEKTO ti putotmo kas kadagiti bitbituen ti langit ken kas iti darat nga adda iti igid ti baybay.” (Genesis 22:17) Kasta ti inkari ti Dios ken ni patriarka Abraham. Ti nabiit pay a bilang iti publikasion iti Bible Review, nupay kasta, itudona ti kasla parikut iti daytoy a teksto.
Sientipiko nga umiso ti Biblia iti panangidiligna ti bilang dagiti bitbituen iti langit kadagiti binilion a darat iti igid ti baybay. Nupay kasta, dagiti bitbituen nga agbilang iti binilion ti nalawag a di pay naammuan idi ugma. Ilawlawag ti Bible Review: “Pudno nga awan ti kasta a kaadu dagiti bitbituen iti langit a makita ti awan tulongna a mata. Ibaga dagiti astronomo kadatayo a no awan ti maysa a kita ti teleskopio, makakitatayo laeng iti nagbaetan ti 2,000 ken 4,000 a bitbituen. Uray pay iti napintas a rabii.” Kuna ti The World Book Encyclopedia nga “agarup 6,000 a bitbituen ti agsilnag a nakalawlawag unay tapno makita uray awan ti teleskopio.”
Kasano, ngarud, nga ilawlawag ti maysa ti nakaskasdaaw a kinaumiso ti Biblia iti panangaramid iti daytoy a panangidilig? Ti maysa a panangilawlawag ket ti Biblia ti “impaltiing ti Dios.” (2 Timoteo 3:16) Ti artikulo iti Bible Review, nupay kasta, inkagumaanda ti nangsukimat iti daytoy a konklusion babaen ti panangisingasingda a nalabit ni Abraham ket maysa nga astronomo! Daytoy kasla nakaskasdaaw a kapanunotan ti sinaruno ti saludsod a: “Mabalin kadi a dagiti tattao idi ugma addaanda kadagiti teleskopio a mangipalgak kadagiti bitbituen a mabalin a saan a makita ti mata laeng?” Tapno mapasingkedan daytoy a teoria, ti artikulo insitarna ti pammaneknek a dagiti kristal a nadiskubre idiay Ninive ken dagiti dadduma a luglugar idi ugma ti mabalin a nagserbi a kas lente a kadaanan.
Nupay kasta, awan ti pammaneknek a dagiti tattao idi ugma inusarda dagita a lente a maipaay iti panangkita kadagiti bitbituen. Ket uray pay no adda dagiti teleskopio idi ugma, ania ti adda a pammaneknek a ni Abraham wenno ti nangisurat iti Genesis ket addaan ti maysa? Kinapudnona, ti kari ti Dios ken ni Abraham ket maysa laeng kadagiti nagadu nga ulidan iti sientipiko a kinaumiso ti Biblia. Nalawag nga awan ti tulong ti teleskopio nga impadamag ni mammadto a Jeremias ti kasta met laeng nga umiso a kapaliiwan: ‘Ti buyot idiay langit a saan a mabilang, kasta met ti darat ti baybay a di masukat.’—Jeremias 33:22.
[Picture Credit Line iti panid 25]
Ladawan ti NASA