Pudno nga Adda Mensahe Dagiti Bituen Kadakayo!
KAS naipakita kadagiti immunan nga artikulo, nupay mangiparangarang dagiti bituen iti dayag, nairanta nga ibilang ti tao ida sigun iti kasasaadda—awan biagna a bambanag nga inkabil ti Namarsua iti langlangit nga agpaay iti panggepna. Saanda a maikanatad a daydayawen. Kas nasken a paset ti nakaskasdaaw a panamarsua ni Jehova nga iturayan dagiti lintegna, dagiti bituen rumbeng nga ‘iwaragawagda ti dayag ti Dios’ ket maigiddan iti dayta agserbida a gubuayan iti lawag agpaay iti tao bayat ti panangibanagna iti panggep ti Namarsuana agpaay kenkuana.—Salmo 19:1; Deuteronomio 4:19.
Mabasatayo idiay Biblia: “Awanto ti masarakan kenka, uray maysa a . . . mangaramat iti panagpadpadles, maysa a mammuyon, wenno maysa a managsalamangka, wenno managanito, wenno maysa a manangilabeg, wenno mannakiuman kadagiti mangkukulam, wenno maysa nga asuang, wenno maysa nga adda karkaradingna. Ta siasinoman a mangaramid kadagitoy isu ti makarimon ken Jehova.” (Deuteronomio 18:10-12) Kinuna ni Isaias: ‘Tumakder koma ita a mangisalakan kenka kadagiti bambanag a dumtengto kenka [dagiti manangbalakadmo], dagiti astrologo, dagiti agpaliiw kadagiti bitbituen . . . Adtoy! Kasdanto la punget.’—Isaias 47:13, 14.
Aniat’ Masursurotayo Kadagiti Bituen
Nupay kasta, dagiti awanan biag a bituen adda maibagada kadatayo no situtuloktayo a dumngeg. Insurat ni Edwin Way Teale: “Dagiti bituen saritaenda ti kinaawan ti mamaay ti tao iti kawatiwat ti tiempo.” Wen, no mabigbigtayo a ti kaaduan kadagiti bituen a makitatayo a mismo iti naraniag a rabii ket nakita idin dagiti inapotayo adu a siglo ti napalabasen, saan kadi a pagpakumbabaennatayo? Ditay kadi makarikna iti panangidayaw iti Daydiay Katan-okan a nangparsua kadakuada “idi punganay” ken nangpaadda iti sangatauan? Sidadayaw a nagsurat ni Ari David iti Israel: “No imutektekak dagiti langlangitmo, ti aramid dagita ramaymo, ti bulan ken dagiti bitbituen, isuda nga insaadmo, ania ti tao, tapno sipapanunotka kenkuana, ket ti anak ti tao, tapno sumarungkarka kenkuana?” Ti langlangit rumbeng a pagpakumbabaendatayo ken gutugotendatayo a mangimtuod no ania ti ar-aramidentayo iti biagtayo.—Genesis 1:1; Salmo 8:3, 4.
Iti naminsan nagkararag ni David: “Isuronak a mangtungpal ita nakemmo, ta sika ti Diosko.” (Salmo 143:10) Ipamatmat ti panagbiag ni David a nasungbatan ti kararagna. Nasursurona nga aramiden ti pagayatan ti Dios kas nailanad iti Lintegna. Nasursurona met ti panggep ti Namarsua agpaay iti sangatauan, ket nagsurat maipapan iti dayta. “Ta bassit pay a darikmat, ket ti nadangkes maawanton . . . Ngem dagiti naemma tawidendanto ti daga, ket maay-ayatandanto iti kinaruay ti talna. . . . Pagtalawam ti dakes ket agaramidka iti naimbag, ket agtalinaedka nga agnanayon. . . . Ti sililinteg tawidennanto ti daga, ket agtaengto kenkuana nga agnanayon.” Babaen ti pannakaammo iti dayta a panggep adda ti rebbengen: “Pagtalawam ti dakes ket agaramidka iti naimbag.”—Salmo 37:10, 11, 27-29.
Dagiti bituen addaanda iti isu met laeng a mensahe agpaay iti amin a sangatauan. Uray no ditay daydayawen ida wenno “konsultaen” ida, makitatayo ti ayat, kinasirib, ken pannakabalin ti Namarsua a naiparangarang kadakuada. Ti panagadal iti astronomia, a maisupadi iti astrolohia, ipasagepsepna koma ti panagdayaw iti pusotayo. Ngem ad-adda pay, saan kadi nga ipasagepsepna kadatayo ti tarigagay a makaammo iti ad-adu pay maipapan iti Dios? Impaayna ti Saona, ti Biblia, agpaay iti dayta a panggep. No naawatanyo daytoy a mensahe manipud kadagiti bituen, maammuanyo no ania ti insagana ni Jehova agpaay iti sangatauan ken, napatpateg pay, no kasano a makiramankayo kadagiti bendision nga insaganana agpaay kadakuada. No adda dagiti saludsodyo maipapan iti Dios ken ti panggep ti biag, siwayawayakayo a makiuman kadagiti Saksi ni Jehova iti lugaryo, wenno agsurat iti kaasitgan a direksion a naipakita iti panid 5.
[Ladawan iti panid 8]
Dagiti bituen isuroda kadatayo ti kinapakumbaba