Panangresita iti 80 a Pagsasao
MAYSA a taga Canada a doktor ti pamilia ti nakapataud iti maysa a sistema a mamagbalin a posible para iti maysa a doktor a “mangresita ken mangagas kadagiti pasiente iti 80 a pagsasao nga awan ti pannakasapul iti mangipatarus,” kuna ti “The Medical Post.” Ti sistema ket maawagan MICS (Medical Information Cathering System). Dayta buklen ti maysa a kit dagiti 20-panid a manual, maysa a manual maipaay iti tunggal pagsasao. Tunggal manual “deskribirenna dagiti nasurok a 200 a medical a sintomas” a naisurat iti inaldaw-aldaw a sasao ken ebkas.
Ti damo nga addang isu ti panangipakita iti pasiente ti isu met laeng a sentensia iti nagduduma a pagsasao agingga a mailasinna ti bukodna. Ti sentensia ibagana kenkuana nga itudona dayta a pagsasao tapno maammuan ti doktor no ania ti pagsasao ti pasiente. Ti doktor mabalinna a pilienna ti umiso manual ti pagsasao.
Sumaganad isu ti panangusar iti manual iti dayta a pagsasao, nga usaren dagiti serie dagiti 15 a salsaludsod a makatulong iti panangikeddeng no ania ti marikrikna ti pasiente a parikutna. Daytoy ti makatulong a mangilasin iti pangkaaduan a kasasaad iti sakit. No ti pasiente mailasinna, kas pangarigan, ti sakit a gastrointestinal, maiturong ngarud iti maysa a paset nga addaan iti “agarup 15 nga adu a pagpilian a salsaludsod nga espesipiko a mainaig iti gastrointestinal system.”
Ti gagangay a pagsasao iti sistema panunotenna met dagiti panagduduma gapu iti panagduduma iti edukasion ken kultura. Kas pangarigan, kuna ti artikulo a ti “maysa a taga Canada mabalin a deskribirenna ti panagbakuar babaen ti panagkunana ‘Nasakit ti tianko,’ idinto ta ti maysa a taga Jamaica mabalin a kunaenna: ‘Dakes ti riknak.’”
Addada met Braille a bersion iti sistema a maipaay kadagiti bulsek. Ket ni Dr. Victor Kumar-Misir, ti nangpataud iti sistema, agtartrabahon iti maysa a bersion a mabalin a mangsungbat iti pakasapulan dagiti pasiente a di makaammo nga agbasa ken agsurat a makasapul iti serbisio ti maysa a doktor.
Kasla bendision ti MIGS kadagiti mangngagas ken pasiente iti umad-adun a dadakkel a siudad iti lubong bayat a dagita a siudad ket ad-addan a buklen ti adu a kultura ken adu a pagsasao. Kadagiti dadduma a kaso ti kasasaad iti nakaro ti sakitna wenno nasugatan a tao napagbalinen nga ad-adda a napeggad babaen ti di pannakabael ti doktor ken ti pasiente a makisao iti maysa ken maysa.
[Picture Credit Line iti panid 18]
Ti Clinical Center—NIH