Ti Kinaubbaw iti Idolatria

Idi kalgaw ti 1986, ni William Murray, a mannurat para iti magasin a The New Yorker, ti bimmisita idiay Sperlonga, Italia, maysa a pagdakdaklisan a purok iti makinlaud a kosta ti Italia agarup 121 kilometro iti abagatan a daya ti Roma. Maysa nga agsapa, bayat a sitatakder ni Murray idiay kantina nga agkapkape, naam-ammona ti maysa nga edad-media a lalaki nga agnagan Fernando De Fabritiis. Bayat ti panagpatpatangda, ni Mr. Fabritiis, nga aggigianen idiay Sperlonga manipud pannakaiyanakna, ti nangistoria ti makapakatawa a banag a nangnangngegannan manipud pay kinaubingna.

“Maysa a tao ti addaan pagmulaan ti kaykayo a peras, ngem maysa kadagitoy a puon ti di nagbunga, gapuna daytat’ pinukanna ket inlakona iti maysa a karpentero,” kuna ni De Fabritiis. “Ti karpentero ti nangkitikit iti estatua ni San Jose manipud iti dayta ket sana inted iti lokal a simbaan. Ti tao a makinkukua ti kayo ti napan idiay simbaan maysa nga agsapa ti Domingo, a sadiay tunggal maysa ti agkarkararag iti estatua ni San Jose. Ngem ti tao ti madi nga agkararag. Ammona dayta a kayo. ‘Di pay makaipaay ti maysa a peras,’ kinunana iti tunggal maysa. ‘Kasano ngaruden a makapataud dayta ti milagro?”’

Ti salaysay ni Mr. De Fabritiis ti umas-asping unay iti ilustrasion nga inusar ni Jehova a Dios a pangisuro iti kadaanan nga Israel ti kinaubbaw iti idolatria. Apay a dikay alaen ti Bibliayo ket basaenyo dayta idiay Isaias 44:14-20?