Pannakaawat kadagiti Bitbituen

DAGITI amarilio a babassit, nalabaga a nagdadakkelan, napudot nga asul a bitbituen, mangipaay amin iti makaawis nga agbaliwbaliw a nailangitan a buya. Ngem, malaksid pay iti kinaraniagda, kaaduan kadatayo masarakanna a narigat nga ilasin ti aniaman a nagdudumaan iti maysa a bituen iti sabali. Ania ti makita dagiti astronomo a ditay makita?

Uray pay ti kalalainganna ti kadakkel a teleskopio dina ipalgak ti kolorda. Nupay kasta, ti kolor adda sadiay. Kas kinuna ti Biblia dua a ribo a tawenen ti napalabas, “ti maysa a bituen naisupadi ti dayagna iti sabali” ken siempre, ti kolor.​—1 Corinto 15:41.

Gapuna apay a ditay makita dagiti nagduduma a kolor dagiti bitbituen? Nupay dagiti matatayo mairuamda iti sipnget kalpasan ti sumagmamano a minutos, kasapulanda ti bassit a lawag tapno makita ti kolor, ket ti lawag ti bituen saan a kasta ti kapigsana. Gapuna, nupay no makitatayo dagiti bambanag nga adda iti adayu, kaskasdi a marigatantayo a mangilasin iti kolorda.

Ti astronomo risotenna daytoy a parikut babaen ti panangusarna iti sensitibo a potograpiko a plato agraman dagiti nabibileg a teleskopio. Ti ladawan a nabannayat ti pannakaretratona nga adda iti kanawan ipakitana a silalawag dagiti nadumaduma a kolor dagiti dadduma a bitbituen iti Makin-abagatan a Hemispero bayat ti panagrikosda iti langit iti rabii. Anian a nagpintasan a pammaneknek iti mangnibinibi nga aramid ti Dios!​—Salmo 8:3

[Picture Credit Line iti panid 31]

David Malin, Anglo-Australian Telescope Board