Apay Iwaragawag ti “Marian Year”?

Babaen ti koresponsal ti Agriingkayo! idiay Italia

TI Planeta Nagkaykaysada ken Maria,” “Kadua ni Maria nga Agturong iti Tawen 2000,” “Ikarkararag ti Lubong ti Panagbiag,” isu dagita dagiti paulo dagiti damdamag nga agkomkomento maipapan iti pannakaiyallatiw babaen iti television ti lubong ti Panagrosario,a maysa kadagiti gagangayen a porma iti panagdayaw dagiti Katoliko. Dagiti timek dagiti rinibo a matalek nakikaduada iti timek ti papa iti panagkararag. Ngem apay a nakaad-adu a tattao ti makipaspaset iti daytoy nga okasion? Ania ti namagbalin iti Panagrosario a naisangsangayan unay? Apay a ‘ti lubong nagkaykaysa ken Maria’?

Babaen itoy a nakaskasdaaw a seremonia, intalek ni John Paul II ti sangatauan iti “Madonna,” a dawdawaten ti pannalaknibna. Iti panangaramidna iti kasta, linukatanna ti “Marian Year,” maysa a tawen nga indedikarna ken Maria.

Kas ti ninamnama, ti okasion ket nangpataud nga agpadpada iti pananganamong ken panangbabalaw. Dagiti tradisionalista a Katoliko sireregta a dineskribirda dayta a kas “makatignay ti rikna a pangarigan no kasano a ti moderno a teknolohia ket mabalin a mausar a kas napateg nga instrumento iti panagserbi iti maysa nga okasion a mainaig iti pammati.” Para kadagiti dadduma, agpadpada dagiti Katoliko ken dagiti saan a Katoliko, dayta ket maysa a panangsaysayang iti kuarta, maysa nga “aglablabes a panangipakita” iti mapagduaduaan a pagayatan. Adut’ mariribuk babaen iti kinapudno a ti maysa a relihiuso nga okasion ket sinuportaran ti “maysa a grupo dagiti nasaknap nga ahensia ti panagipakaammo,” a maipaay iti nagupgop a gastos nga agarup dua milion a doliar. Ket ni Giancarlo Zizola, managpaliiw iti Il Giorno iti Vaticano, ay-ayenna ti kinapudno a ti “multimilion a doliar a pabuya iti telebision a tipo-Barnum ket masapul a maipabuya, isu a nangipababa iti Madonna iti paset a manangsuportar laeng kadagiti naibelbelleng a tadem ti labahas, pluma ti ball pen, ken dagiti tights, ken maipaay iti relihiuso a panagdaydayaw iti ladawan nga awan ti patpatinggana.”

John Paul II​—“Papa ti Madonna”

Ania ti nangtignay iti kangrunaan a pannakabagi ti Katolicismo a mangiwaragawag iti maysa a “Marian Year”? Nagduduma a rason, sigun kadagiti managpaliiw iti Vaticana.

Dadduma ti mangitudo iti “kinapasnek [ni John Paul II] ken Maria.” Adu a Katoliko ti mangibilang kenkuana a “papa ti Madonna.” Inramanna pay, a nakalawlawag a makita, ti letra “M,” ti umuna a letra iti Maria, iti episkopal nga emblemana. Kas pagsasaona sinurotna dagiti sasao ni Louis-Marie Grignion de Montfort, maysa a maika-17 a siglo a mistiko a Katoliko, a naan-anay a nangipaay iti bagina iti “Madonna” babaen kadagiti sasao a Totus tuus (Amin kukuam). Indemostrana ti napasnek a debosionna ken Maria bayat dagiti panagbiahena idiay Mexico, Francia, Alemania, Poland, Brazil, Portugal, España, ken dadduma pay a pagpagilian, babaen ti panangbisitana kadagiti kalalatakan a santuario a naidedikar kenkuana. Sigun kadagiti managpaliiw, ngarud, ti panangiwaragawag iti maysa a “Marian Year” ket kanayonan pay a panangidemostra iti kinapasnek ti papa iti “espiritualidad ni Maria.”

Kasta met, iti nabayagen, kadagiti ad-adda a konserbatibo a gunglo dagiti Katoliko, adda ti pannakaseknan iti kinapudno a nagbalin a kasla nalidem ti panagdayaw ken Maria. Iti daytoy a siglo, a sibaballigi a dineskribir ni Papa Pio XII kas “ti tawen ni Maria,” ti klero a Katoliko nasaksianna ti kunaenda met laeng a “nakaro a krisis ti panagdayaw ken Maria.” Inanamaenda a ti “Marian Year” ket makatulongto iti “panagsubli manen ken Maria,” ket iti kasta maisubli manen ti panagdayaw kenkuana.

Iti kararag a naputar a maipaay iti pananglukat ti “Marian Year,” intalek ni John Paul II “ti intero a sangatauan, agraman dagiti inanamana ken pagam-amkanna,” ken Maria. Inaramidna daytoy iti dua a napalabas nga okasion, a kas met kadagiti dadduma a papa nga immun-una kenkuana. Agsipud ta dagiti napapasnek a managdaydayaw ken Maria makumbinsirda a ti “agdama a nakaskasdaaw a krisis iti pammati” ket maigapu met iti krisis iti panagdayaw ken Maria, kunaenda a no ti lubong ket agsubli ken Maria, dadduma kadagiti kadadakkelan a parikut ti lubong ket marisotto. “Ti Nakristianuan a panagbiag sukatannanto ti agdama a materialismo, addanto ti pannakakumberte dagiti ateista a nasnasion. Ket ti sangatauan addaandanto ti talna,” insurat ti periodiko a Katoliko nga Ecce Mater Tua.

Ni Maria ken ti Inanama iti Baro a Lubong

Kamaudiananna, inanamaen ti papa nga iti sidong ti panangiwanwan ti “Madonna” posiblento ti panangisagana iti tawen 2000, ti tawen a panginaigan dagiti papangulo a Katoliko iti dakkel a panangipateg. Sigun iti iglesia, ti panangisagana itoy a petsa ket nasken unay agsipud ta, kas kunaen ti periodiko a Katoliko a Verona fedele: “Iti pangnguduan daytoy a siglo, ti sangatauan masarakanna ti bagina saan laeng nga iti karirikutan nga oras, no di ket iti kasasayaatan nga oras iti historia. Nakagtengtayon iti nagsasangaan ti dalan: iti maysa a dasig, ti makita a posibilidad iti panangdadael ti bagi met laeng; iti kasumbangirna, ti pananginanama iti baro a panawen, iti maysa a baro a lubong. . . . No usarentayo ti maysa a termino ti Biblia, mabalin a kunaentayo nga addatayon ‘kadagiti maudi a tiempo,’ kayatna a sawen, dagiti tiempo a mangturpos iti atiddog ken nasaem a paset iti historia ti tao; ken kasta met dagiti tiempo nga agparang a manglukat iti sabali, nga ad-adda a natalna ken naragsak.” Gapu ngarud ti panangpabor iti panagsubli iti Dios iti kanito a maibilang a narikut nga intalek ti papa ti isuamin a lubong ken ni Maria.

Ngem iti kinapudnona, ania ti kaipapanan daytoy a panawen a manipud Hunio 7, 1987, aginngga iti Agosto 15, 1988, kadagiti Katoliko? Kasano a naselebraran ti Marian Year? Ania ti panagtignay dagiti dadduma a relihiuso a panagkumpesar iti panangikagumaan ti Iglesia Katolika?

[Dagiti Footnote]

[Picture Credit Line iti panid 4]

Akkub: Courtesy of the El Prado Museum, Spain