Ti “Marian Year”​—Nagduduma a Kapanunotan

Di mailibak ti panangiladawan ti Biblia ken ni Maria a kas matalek nga adalan ni Jesus. (Aramid 1:14) Bayat ti panangusigtayo iti kinapateg iti “Marian Year,” pudno nga awan ti panggeptayo a mangtagibassit iti pakasarsaritaanna wenno ti kinamatalekna. Nupay kasta, gapu iti kinapudno a ti tawen a naidedikar kenkuana ket maysa a relihiuso nga okasion a dakkel ti pategna, umiso laeng para kadagiti manamati nga imtuodenda kadagiti bagbagida met laeng: Anamongan kadi ti Dios ti panagdaydayaw a naipaay ken Maria? Ket ni kadi Maria ti sungbat ti Dios a maipaay iti krisis ti lubong?

DAYTOY a “Marian Year” isu ti maikadua a sinelebraran ti Iglesia Katolika. Ti immuna, manipud 1953 agingga ti 1954, ket inwaragawag ni Papa Pio XII a mangselebrar iti maika-sangagasut a tawen iti pannakaiwaragawag iti sursuro iti Imakulada Konsepsion. Daytoy ket sumagmamano laeng a tawen kalpasan ti panangirugi ti isu met laeng a papa ti sursuro nga Asuncion.a

Ti malaglagip dagiti dadduma a Katoliko maipapan iti immuna a “Marian Year” isu ti adu a bilang dagiti kabbaro a simrek iti kinapadi. Nalawag nga inanamaenda a daytoy ti mabalin a maulitto, gapu iti agdama a krisis ti bokasion. Adda, kinapudnona, ti kasta unay a pannakaseknan maipapan iti kinakurang dagiti papadi. Sigun ken Luigi Accattoli, eksperto kadagiti ar-aramid iti Vaticana maipaay iti Il Corriere della Sera, napattapatta a kadagiti 300,000 a komunidad a Katoliko iti lubong, “nasurok a kagudua ti awanan ti agnanaed a padi.” Ngarud saan a naiparparna laeng a maparegta dagiti matalek a kanayon a mapanda kadagiti santuario ni Maria, a dagitoy ti naikuna a “luglugar a maipaay a pakaparang-ayan ti bokasion.” Umdasto kadi ti “Marian Year” a mangipaay iti baro a biag iti bumasbassit a bilang dagiti klero a Katoliko?

Ni Maria, dagiti Bokasion, ken ti Ateismo

Dadduma ti makalagip ti nakatantan-ok a pannakaiparangarang iti debosion iti “Birhen” bayat ti immuna a “Marian Year.” Iti dayta nga okasion, uray pay ti puersa ti armada kadagiti sumagmamano a nasnasion ket nagtignayda a dagus nga agserbi. Idiay Loreto, Italia, pagtaengan ti madaydayaw a santuario ni Maria, adda ti makaawis a parada iti Italiano a puersa ti angin. Lima gasut a marino ti nagbiahe a mapan iti Lourdes, Francia. Idiay Ireland “dagiti paspaset ti armada ti nakonsagrar iti Madonna, nga iti okasion ket naiwaragawag a Mariskal iti armada,” kuna ti La Repubblica.

Ni Papa Pio XII, iti panangitedna iti anunsio iti 1953, ninamnamana a ti “Marian Year” ket makatulongto a mangbusor kadagiti amin a “mangikagumaan a mangikkat kadagiti karkararua ti pammati ken Kristo” ket mabalin a mangbusor kadagiti ateistiko a kapanunotanda. “Saan a panaglablabes ti panangibaga a ti “Marian Year” iti 1954,” patalgedan ti Avvenire, “nagun-odanna dagiti pudno a milagro iti di ninamnama ken tinartarigagayan a pannakakumberte.” Umasping iti dayta, itatta, kadagiti ummong a Katoliko, marikna a ti napabaro a kinapasnek ken ni Maria ket agserbinto a mangbusor kadagiti ateistiko a kapanunotan ken dagiti gobierno a mangparparang-ay kadakuada.

Ti The New York Times itudona a ni Juan Paulo II “imbagana iti publiko ti tarigagayna a bumisita iti Union Soviet no isut’ makapangasaba a siwayawaya sadiay.” Ket manamnama pay a ti 1988, “ti tawen ti pannakaselebrar ti maika-sangaribo a tawen iti Kinakristiano idiay Russia, ket maysanto met a tawen a ti Papa pabaruennanto ti nalawag a pannakakonsagrar [dayta] a Daga . . . a maipaay iti pannakakumbertena,” insurat ti teologo a Katoliko a ni René Laurentin idiay Avvenire.

Naisangsangayan a Panangtrato ken ni Maria

Dagiti nadumaduma nga ar-aramid ti naiplano a maipaay iti 14 a bulbulan a nagpatingga idi Agosto 15, 1988, ti maudi nga aldaw iti “Marian Year,” a ti amin ti nairanta a ‘mangidayaw iti Ina ti Apo’ ken mangbiag manen ti pannakadayawna kalpasan ti adu a tawtawen a pannakabaybay-ana. Nangipaulog ti papa ti maysa a surat a nalawag a naidedikar ken ni Maria, ken dagiti nadumaduma a kumbension a naiplano tapno mangusig iti kinapategna.

Dagiti Katoliko immawatda kadagiti umiso nga instruksion no maipapan iti “Marian Year.” Malaksid kadagiti dadduma a bambanag, sinelebraranda a sipapasnek dagiti amin a pipiesta ni Maria ken nangaramidda iti panagbaniaga a napan kadagiti simsimbaan a naidedikar iti “Madonna.” Mabalin met a magunggonaanda manipud iti “mabayadan nga indulhensia”b babaen iti sipapasnek a pannakipaset kadagiti pipiesta ni Maria ken dagiti ritual dagiti pipiesta wenno babaen ti sipapasnek a panangawat ti bendision ti papa nga ipaay ti obispo, uray babaen ti maysa a radio wenno brodkas ti telebision. Nabalakadanda a maipaay koma ti dakdakkel a pateg iti altar a naidedikar ken ni Maria iti tunggal simbaan a Katoliko.

Tignay ti Protestante ken Panangbusor ti Katoliko

Daytoy a panangidaulo ti Katoliko ti sipopositibo nga inawat dagiti Orthodox nga Ig-iglesia, isu a mangar-aramid met iti panangdayaw ken ni Maria, kas iti ninamnama, adda dagiti nagduduma a panagtignay manipud kadagiti relihiuso a grupo dagiti Protestante.

Ti herarkia Katolika, a pagaammoda unay ti kinapudno a ni Maria ket agtultuloy a mangirepresentar iti maysa kadagiti punto a di pakitunosan dagiti Protestante, ti nangpadasen a saan a mangpakaro kadagiti pagdumaan, nga inulitna a ti “Marian Year” “tignayennanto ti ekumenikal a panagsasarita.” Ngem ti isu met laeng a gubuayan a Katoliko bigbigenna a ti “Marian Year” nakapataud kadagiti ‘makapungtot a panagtigtignay,’ “ti ragup a panangbabalaw,” ken “adu a panagprotesta” kadagiti Protestante. Sigun iti periodiko a Vita pastorale, daytoy ti makagapu no apay a dagiti ekumenikal a grupo dagiti Katoliko ket mangar-aramidda iti “pananglapped iti nakaro a kinapanatiko, iti panangliklik iti aglablabes a sentimentalismo, iti panangbalbaliw ti panagdayaw iti ladawan” iti “Madonna.” Sumagmamano a periodiko a Katoliko ti mangipilpilit a dagiti mangselebrar ti “Marian Year” ‘masapul a pampanunotenda ti baro nga ekumenikal a panagpampanunot’ ket ipuerada dagiti nalablabes a ‘debosion ken bumusor iti panagkaykaysa a bambanag.’

Para kadagiti adu a Protestante, ti panagdayaw ken Maria ken dagiti ar-aramid a mainaig iti dayta ket idolatroso. Dagiti nadumaduma nga Italiano a Protestante a grupo ngarud insingasingda ti pananglapped ti amin nga ekumenikal a pannakilangen kadagiti Katoliko bayat ti “Marian Year,” ket ti synod iti Waldenses ken ti Iglesia a Metodista nangipaulogda kadagiti sasao a nakaro ti panangbabalawna iti panangidaulo ti papa, nga inawaganda dayta a maysa a “lapped iti pudno nga ekumenikal a panagsasabet.”

Kasta met, saan nga amin a klero a Katoliko ket makitunos iti panangidaulo ti papa. Nangpataud ti pannakatignay ti Katoliko a padi a ni Franco Barbero idi indeklarana iti publiko a pulos a saan a nagkarkararag ken ni Maria. Iti “Surat[na] ken Maria,” kuna ni Barbero nga isut’ maupay iti “sidong dagiti nakaad-adu a sursuro, ladladawan, panagdebosion, leyenda, ken an-anito.” Dayta met laeng a padi ti nagkuna nga uray ti “panangsarita iti maysa a ‘tawen ni Maria’ ket mabalin a makapataud kadagiti pudno a pannakariro.”

Ti Com-nuovi tempi, maysa a periodiko nga impablaak dagiti narang-ay a Katoliko, ti nagkuna: “Kasla ti ekumenikal a pangrugian ti Iglesia Katolika [kalpasan ti Maikadua a Konsilio ti Vaticana] ket makatulong iti saanen a panangulit iti daan a narelihiusuan nga ar-aramid a maipaay ken Maria nga addaan kadagiti sumagmamano laeng a nairamut iti gagangay a Nakristianuan a nagtaudan. Daksanggasat, dagiti selebrasion iti daytoy a tawen ni ‘Maria’ ket maibusor iti pagimbagan ti pannakaisubli . . . iti di naisina a Kristiano a pammati.”

Apay ngarud, a dagiti autoridad iti iglesia ken uray ti papa a mismo ipilitna ti panangikabil iti kasta unay a panangipaganetget iti ladawan ni Maria? Apay a dagiti “tattao [a Katoliko] ayatenda ni Maria sakbay nga ayatenda ni Jesus,” kas kinuna ni “Madre” Teresa iti Calcutta? Iti sabali a pannao, apay nga adda ti panagdaydayaw ken Maria?

[Dagiti Footnote]