Manipud Managbasatayo

Tulong a Maipaay kadagiti Addaan Lapped

Pudno nga inapresiarko ti makaparegta unay nga artikulo (Oktubre 22, 1988). Tapno maragsakan ti tao nga addaan lapped, saan a kanayon a masapul a matulongan. Naputed ti kanawan nga imak. Kankanayon a masipsiputan ti panaggarawko tapno matulonganak iti lamisaan a panganan. Maidasaran, maiw-iwa ti tinapayko ken maukisan ti prutasko, ket uray pay ti keso a kanek maisagana a maipaay kaniak. Siempre, daytoy ket maaramid gapu iti asi, ngem iti riknak, makarurodak kadagidiay addaan ti naimbag a panggep iti pagimbagak. Ket iti kamaudiananna, diak payen mangipaay iti panagyaman. No agsolsoloak, nakaskasdaaw a maragsakanak a mangar-aramid iti isuamin a bukbukodko. Agyamanak kadagiti alikamen a naipakita; pulos a diak pinampanunot nga adda dagita a bambanag. Simpleda, ngem pudno a makatulongda.

C. C., France

Agyamanak kadakayo a maipaay iti artikulo ti Agriingkayo! a “Pannakaawat ti Karit ti Agat-at” (Pebrero 22, 1987). Binasak nga inulit-ulit dayta, ta natignayak iti kasta unay, yantangay agsagsagabaak iti pannakaidumduma babaen kadagiti tattao a mangsursuron kaniak ken mangang-angaw kadagidiay agat-at. Naimbag laengen ta addaanak iti magasin a serioso ti panangtamingna iti parikut ket isaganana ti nagsayaatan a material maipapan itoy a narikut ken mammano a madakamat a tema. Manipud iti panangbasa iti material, naammuak ti maysa a doktor a paglainganna dagiti parparikut iti panagsao, ket ita maag-agasanakon babaen iti maysa kadagitoy. Pagarupek a ti kameng ti panagipablaakyo maikari iti premio iti literatura.

J. M. S., Brazil

Matmatay nga Ubbing

Apresiarek no kasano a ti artikulo a “Minilmilion nga Ubbing ti Matmatay” (Setiembre 22, 1988) intudona dagiti addang nga alaen dagiti nagannak tapno matulongan dagiti annakda nga agtalinaed a nasalun-at nupay no di nasayaat dagiti kasasaad. Pudno a ti panagpasuso ket addaan epekto a manglapped iti panagsikog. Maseknanak, nupay kasta, a dadduma a managbasa ket mabalin nga agkonklusionda a ti panagpasuso ket maysa a mapagtalkan a pamay-an ti pananglapped iti sikog. Iti kapadasak kas maysa a nars nga agpapaanak, nasarakak a dagiti inna nga agpannuray iti panagpasuso kas panglapped ti panagsikog ket masansan nga agsikogda.

A. S., United States

Ni A. S. ket umiso. Ti artikulomi ket kaaduanna naiturong kadagiti luglugar iti lubong a sadiay dagiti panglapped iti sikog ket masansan a di magun-odan. Basta naibaga laeng a ti panagpasuso “itantanna ti panangrugi ti panagkadawyan.” Dayta ket saan a pagtalkan unay.​—ED.

Rebbengen dagiti Nagannak

Para kaniak, kas maysa nga ina ken mannursuro, ti Agriingkayo! a Setiembre 8, 1988, ket dakkel a tulong. Natignayko ti interes iti prinsipal ti eskuelaan iti tema a “Nagannak​—Addaankay Met ti Rebbengen!” Iti maysa a gimong dagiti nagannak, indayawna ti material iti kasta unay ket inwarasna kadagiti nagannak dagiti papel a nangkopiaanna kadagiti adu a singasing a naaramid iti magasin. Kalpasanna impakitana kadakuada ti magasin, nga imbagana kadakuada no sadino ti nangalaanna iti material.

M. G. S., Brazil

Glaucoma

Ti artikulo (Mayo, 1988) ket nagsayaatan ti pannakaisuratna ken nagsayaatan ti pannakasukimatna. Iparangkonto iti linawas a gimong ti kamkameng, ket pakdaarak dagiti 31 nga empleado tapno maipakaammoda kadagiti pasientemi daytoy a nagsayaatan a paset ti artikulo.

D. D. S., MD, FACS, Director, Eye Center, Propesor ti Ophthalmology, United States