Kasapulan Dagiti Di nadanonan nga Ubbing ti Dungngo
ALAS tres idi iti agsapat’ Domingo. No aniat’ nakagapu iti nasapa unay a panagpasikal, diak ammo. Ngem ti atapko ket napalalon sa ti panangsangsangailik ti tattao. Aniaman iti rason, ti bassit nga anakko a lalaki ti umayen a maysa a bulan ti sapana.
Ti panagpasikal ti nagbayag ken saan nga agpapareho. Iti agmalmalem ti Domingo ken agpatpatnag iti Domingo, nagpasikalak a di met nagipasngay. Adu daras a ti ulo ti ubing ti makitkitan ti komadrona iti maysa a panagiddek (crowning, ti awagda iti Ingles) ket agawan met laeng a naan-anay a di magaw-at iti sumaruno. Iti alas kuatro iti agsapa ti Lunes, 25 oras manipud panangrugi ti panagpasikal, nadeterminar ti komadrona babaen iti panangdengngegna ti panagbitik ti puso ti ubing a ti ubing agpegpeggad. Ti komadrona ti nangted kaniak ti oksihena ket dagus nga inyegnak iti ospital. Tallo nga oras kamaudiananna, naiyanaken ni Danny.
Siak, ken ni Bill a lakayko, makitami nga isut’ marigrigatan nga umanges, ta dagiti barâna saanda nga agan-andar a nasayaat. Pinalubosandakami a nangubba kenkuana iti sumagmamano a segundo, ket kabayatan dayta, madlawmi ken ni Bill a ti panagangesna ti lumaglag-an bayat ti panangub-ubbami kenkuana ken pannakisarsarita kenkuana. Idi kuna dagiti taga ospital nga isut’ maikabil iti incubator, saan a nakasagana ti isipko a makirinnason kalpasan ti kasta a nagbayag, makariro a panagpasikal.
Iti alas 9:30 t.b. immay ti pediatrician a mangkita kaniak. Kunana a napanna kinita ti ubing ket kasla naimbag met ti kasasaadna; ti ubing ti paiyeg ti doktor tapno pasusuek. Ngem saan nga immay ti ubing. Alas dies, alas 11, alas 12, kaskasdi awan pay ni Danny. Kamaudiananna, iti panagligsay ti panagmatoonna, immay ti nars manipud iti nursery ket nangaramid ti makabigla a pakaammo: “Ti anakmo ket kumkumbet ken agseggar, ket masapul a maiyalis idiay isolette!” Iti kasta a tonada ken awan kanayonanen a panangilawlawag, pimmanawen.
Mailadawanyo siguro no aniat’ naaramidan dayta iti nakapuyen nga emosional a kasasaadko. Yantangay diak ammo no aniat’ kaipapanan ti “kumkumbet ken agseggar,” inayabak ti komadrona ket sinaludsodko no serioso dayta. “Wen,” kunana, “serioso unay. Daytat’ pagdandanaganda kadagiti ubbing a di nadanonan.”
“Aniat’ kayatmo a sawen?” insaludsodko: “Mabalin kadi a matay?”
“Mabalin,” kunana. Kunana kaniak nga ipilitko ti pannakakitak kenkuana.
Imbaga dagiti narses kaniak nga isut’ diak mabalin a makita agingga nga isut’ natsek ti doktoren. Iti dayta a punto agsangsangitak ti uray lan ken agarianggaak payen. “Isut’ anakko ket isut’ matayen ket diak pay mabalin a makita!” Insigida a nagtignayda ket impandak kenkuana. Uray no isut’ diak maubba, adda bassit nga abut iti sikigan ti isolette, wenno incubator, a mabalinko a pangilusotan iti imak ket
sinagidko.
Nakaayay-ay ti buya ni Danny. Dagiti piskel iti tianna bumbumsogda manipud panangpadpadasna nga umanges iti di umiso a pamay-an ket dagiti abut ti agongna dumakdakkelda agsipud ta di makaal-ala ti umdas nga oksihena. (Gapuna napataud ti sasao a panagkebbet ti barukongna ken panagseggar dagiti abut ti agongna.) Dagiti ima ken sakana nalitemda gaput’ kinakurang ti oksihena.
Inlusotko ti imak ket isut’ siinayad a minasahek manipud ulo ingganat’ ramramay ti sakana ket imbagak kenkuana nga isut’ inay-ayatko unay. Imbagak kenkuana amin maipapan ken papana ken ni manongna a Timmy, ket ti intero a pamiliana ken no kasanot’ panagayatmi amin kenkuana ket kayatmi nga isut’ makaawiden. Kayatna a mangngegan unay ti timekko, ket ti pannakamasahe ti nakatulong a nangpakalma kenkuana. Awan ti masapul a mangkumbinsir kaniak a nakaskasdaaw a bambanag ti maaramidan ti ayat. Nakitak a mismo iti dayta nga aldaw. Iti uneg ti kagudua oras, ti panagangesna ti interamente a normalen, ket dagiti im-ima ken saksakana ti rimmosas ti kolordan.
Ti nars nga agbambantay ti nagkuna: “Kasla diak patien! Kitaenyo! Nagsayaat panagangesnan, ken kitaenyo met dagiti im-ima ken saksakana!” Isut’ inruarna ket isut’ intedna kaniak a dinan inur-uray ti palubos ti doktor.
Napalabasen ti peggad. Natalgeden ni Danny. Daytat’ nasurok a pito tawen ti napalabasen. Agingga itoy nga aldaw, kaay-ayo a dengdenggen ni Danny ti estoria ti kapadasanna, ket kaykayatna nga ibagbagak dayta met kadagiti dadduma.—Kas insalaysay ni Mary Jane Triggs.