Ti “Holocaust”—Dagiti Nalipatan a Biktima
“Ti pagalagadan dagiti Nazis a mangpukaw iti maysa a rasa ket nagbanag iti ipapatay iti agarup agpada a kaadu dagiti Gentil a Polako ken Judio a Polako, a mamagbalin kadakuada a pareho a biktima iti ‘Nalipatanen a Holocaust.’”—“The Forgotten Holocaust,” ni Richard C. Lukas
TI “HOLOCAUST”—ania ti kaipapanan dayta? Sigun kadagiti dadduma a diksionario, dayta ket maysa a panangpapatay dagiti Nazis iti maysa a rasa iti Judio iti Europa bayat ti Gubat Sangalubongan II. Daytoy ket nalaka laeng a mangipaay iti kapanunotan a dagiti laeng Judio ti nagsagaba ken natay iti im-ima dagiti Nazis. Kaskasdi, adda kadi kinahustisia ken kinapudno iti panangiyaplikar laeng iti “Holocaust” kadagiti biktima a Judio iti panawen ti panagturay ti Nazi?
Kunaen ni Richard Lukas: “Ti sao a Holocaust isingasingna kadagiti kaaduan a tattao ti didigra a napadasan dagiti Judio iti sidong dagiti Aleman bayat ti Gubat Sangalubongan II. Manipud iti sikolohikal a panangmatmat, maawatan no apay a dagiti Judio itatta kaykayatda a ti termino tukoyenna laeng ti kapadasan dagiti Judio . . . Ngem, babaen iti panangilaksid kadagiti dadduma iti pannakairamanda iti Holocaust, dagiti nakaam-amak a banag a sinagaba dagiti Poles, dadduma nga Slavs, ken dagiti Gypsies iti im-ima dagiti Nazis ket masansan a di maikankano, no di pay ket nalipatanen.”
Kunaen pay ni Lukas: “Kadakuada [dagiti historiador], ti Holocaust ket naipaay laeng kadagiti Judio, ket bassit laeng wenno awan pay ketdi ti maibaga maipapan kadagiti siam a milion a Gentil, agraman ti tallo a milion a Polako a [Gentil], a napukaw met iti kadadakkelan a didigra a naammuanen iti lubong.”
Ti Kinabuklis ni Hitler iti Lugar a Pagbiagan
Idi dagiti armada ni Hitler rinautda ti Poland idi Setiembre 1939, dagitoy ti nabilin a mangibanag kadagiti pagalagadan ni Hitler a manggun-od iti Lebensraum, lugar a pagbiagan, a maipaay kadagiti tattao nga Aleman. Kas kunaen ni Lukas Richard: “Kadagiti Nazis, dagiti Poles ket Untermenschen (nababbaba a tattao) a nangsakop iti daga a paset iti Lebensraum (lugar a pagbiagan) a maipaay iti natan-ok a rasa ti Aleman.” Gapuna, pinalubosan ni Hitler dagiti tropana a mangpapatay “nga awan asi kadagiti amin a lallaki, babbai, ken ubbing a kaputotan ti Polako wenno Polako ti pagsasaoda. Babaen laeng iti kastoy a pamay-an a makagun-odtayo iti lugar a pagtaengan a kasapulantayo.”
Nangrugi idi Setiembre 1939 ti awanan asi a pagam-amkan dagiti tattao a Polako. Kinuna ni Hitler: “Ti gubat ket masapul a pannakigubat a panangpukaw.” Kinuna ti taltalken ni Hitler a ni Heinrich Himmler: “Amin dagiti Poles masapul a mapukawda ditoy lubong. . . . Nasken a ti naindaklan a tattao nga Aleman ibilangda a kangrunaan a trabaho ti panangpapatay kadagiti amin a Poles.” Gapuna, ti Holocaust ket saan laeng a nairanta a maipaay kadagiti Polako a Judio; daytat’ nairanta a maipaay kadagiti “amin a Poles.”
“Naiyaplikar ti panangriribuk kadagiti amin a sinakopda a pagpagilian. . . . Ngem idiay Poland tunggal maysa ket biktima ti kasta a kinaranggas, ken ti kaaduan a panangpapatay a naibatay iti prinsipio iti pannakabasol dagiti isuamin ket ad-adda a masansan a mapasamak, agsipud ta tunggal tao a Polako, aniaman ti edad, sekso, wenno salun-atda, ket kameng ti nakondenar a nasion—kinondenar dagiti managaramid ti pagalagadan iti partido ken gobierno a Nazi,” kuna ni Catherine Leach, managipatarus iti libro a Polako a Values and Violence in Auschwitz. Kunaenna a ni Himmler minatmatanna dagiti Poles a kas nababbaba a rasa a masapul nga agtalinaed nga adipen.
“Uray pay idi simmukon ti Poland [Setiembre 28, 1939], ti Wehrmacht [armada nga Aleman] sigaganetget nga intultuloyna ti bilin ni Hitler idi Agosto 22, 1939, idi pinalubosanna ti panangpapatay ‘nga awanan asi kadagiti amin a lallaki, babbai, ken ubbing a kaputotan ti Polako wenno Polako ti pagsasaoda.’” Kasano a matignay ti armada nga Aleman ken ti SS a mangaramid iti kasta nga awanan asi a panangpapatay? Babaen ti pannakapunnoda kadagiti sursuro iti kinatan-ok ti rasa nga Aryan ken ti kinababa dagiti amin a dadduma a rasa. Gapuna, kas kunaen ni Lukas iti The Forgotten Holocaust: “Ti teoria ti Nazi a kolonial nga imperio idiay Poland ket naibatay iti panangikedked iti kinatao kadagiti Polako isuda a, sumaganad kadagiti Judio, ginura unay ni Hitler.”
Negatibo a Pagalagadan ti Panangbilang ti Populasion”
Iti introduksionna iti libro a Commandant of Auschwitz, kinuna ni Lord Russell iti Liverpool: “Bayat ti gubat nalabit di nakurkurang ngem sangapulo ket dua a milion a lallaki, babbai, ken ubbing manipud kadagiti naraut ken nasakop a teritoria ti pinapatay dagiti Aleman. Iti kalalainganna a pattapatta, walo a milion kadakuada ti natay kadagiti kampo konsentrasion. Kadagitoy, nakurkurang ngem lima a milion ti Judio. . . . Ti pudno a bilang, nupay kasta, ket saanto a pulos a maammuan.” Maibatay kadagitoy laeng a bilang, agarup pito a milion a biktima ti saan a Judio.
Ti sabali pay a pammaneknek isu ti pammaneknek ni Catherine Leach, isu a nagsurat: “Ti Poland isu ti immuna a pagilian a naikabil iti sidong ti ‘negatibo a pagalagadan ti panangbilang ti populasion,’ a ti panggepna isu ti panangisagana iti dakkel a teritoria iti ‘Daya’ a maipaay iti pannakaiyakar kadagiti Aleman, ket ti Poland nagsagaba iti kadadakkelan a pukaw a biag kadagiti amin a nasakop a pagpagilian—220 iti tunggal 1000 nga umili. Dagiti gubuayan a Polako kunaenda a nakurkurang ngem 6,028,000 nga umili a Polako . . . ti nakapukaw iti biagda.” Kadagitoy, 3,200,000 dagiti Judio. Dayta kaipapananna a ngangngani 50% kadagiti natay a Polako ket saan a Judio.
Di ngarud masuppiat, nga adda “Nalipatanen a Holocaust” dagiti minilmilion a saan a Judio a biktima, nangnangruna dagiti Slavic ti nagtaudanda. Dagitoy iramanna dagiti minilmilion a Russo a pinapapatay dagiti Nazis. Dagidiay a Russo awan ti pagpilianda. Gapu iti doktrina ti Nazi, dagitoy ket awan duadua a nakondenarda iti ipapatay.
Kaskasdi, dagitoy nga estadistika dida imbilang dagiti rinibo a saan a Judio nga Aleman a nagsagaba met kas biktima iti Holocaust gapu iti turedda a nangbusor ken ni Hitler ken ti pilosopiana a kinatan-ok ti rasana. Mairaman kadagitoy isu dagiti rinibo a Saksi ni Jehova a nagkedked a makikadua ken ni Hitler iti militaristiko a panagpampammarangna. Wen, naiwaras iti intero nga Alemania ken kadagiti sinakop ti Nazi a pagpagilian isu dagiti rinibo a tattao a nangaramid ti panagpili a nangiturong kadakuada kadagiti kampo konsentrasion ken iti ipapatay dagiti adu kas martir.
Gapuna, ti napateg a saludsod isu ti, Ania ti nagdumaan dagidiay a biktima iti Holocaust ken dagidiay a martir?
[Mapa/Dagiti ladawan iti panid 10]
(Para iti aktual a pannakaurnosna, kitaem ti publikasion)
Dadduma kadagiti konsentrasion a Nazi ken dagiti kampo a pagpapatayan iti intero nga Europa. Mainayon iti dayta, adda 165 a kampo dagiti inkapilitan a panagtrabaho
NORTH SEA
LATVIA
Riga
LITHUANIA
Kaunas
E. PRUSSIA
POLAND
Stutthof
Treblinka
Chelmno
Sobibor
Lublin
Skarżysko-Kamienna
Majdanek
Plaszow
Belzec
Auschwitz
GERMANY
Papenburg
Neuengamme
Belsen
Ravensbrück
Sachsenhausen
Oranienburg
Lichtenberg
Dora-Nordhausen
Torgau
Buchenwald
Gross-Rosen
Ohrdruf
Flossenbürg
Dachau
Landsberg
NETH.
Westerbork
Vught
BELG.
LUX.
FRANCE
Natzweiler-Struthof
SWITZ.
ITALY
AUSTRIA
Mauthausen
Sachsenburg
CZECHOSLOVAKIA
Theresienstadt
[Ladawan]
Kinuna ni Hitler: “Ti gubat ket masapul a gubat iti panangpukaw.” Mangpapataykayo “nga awanan asi kadagiti amin a lallaki, babbai, ken ubbing a kaputotan ti Polako wenno Polako ti pagsasaoda”
[Credit Line]
Libraria iti Kongreso
[Ladawan]
Kinuna ni Himmler: “Amin a Poles agpukawdanto iti lubong”
[Credit Line]
UPI/Bettmann Newsphotos