Ti “Holocaust”​​—Apay nga Impalubos ti Dios Dayta?

TI “Holocaust” ket addaan iti makariribuk nga epekto iti pammati dagiti adu. Dagiti Judio ken saan a Judio nga agpadpada imtuodenda dagiti saludsod a, No adda Dios, apay nga impalubosna dayta? Umdas kadi ti panangipabiang iti dayta iti ‘kinadawel ti tao’? Wenno adda kadi dadduma pay a bambanag a mangilawlawag no kasano a dagiti lallaki ken babbai manipud kadagiti “sibilisado” a nagtaudan ket palugodanda, isuroda, palubosanda, wenno aktibo a makipasetda iti inanamongan ti Estado a panangpapatay ken panangpukaw iti rasa?

Ti Judio a Konserbatibo a komunidad idiay Estados Unidos nabiit pay a nangipablaak iti maysa nga “Statement of Principles of Conservative Judaism,” a sadiay kinunada: “Ti kaadda iti kinadakes ket kankanayon a nangipaay iti keseseriosuan a lapped iti pammati. No maaddaan iti pagam-amkan a kas iti kadakkel iti nairepresentar idiay Auschwitz ken Hiroshima, daytoy a parikut addaanen iti baro, nakabutbuteng a kinapudno iti kaputotantayo. Ti saludsod a no kasano a ti nalinteg ken mannakabalin a Dios ipalubosna ti pannakapukaw dagiti nakaad-adu nga awan basolna a biag ti mangriribuk ti relihiuso a konsiensia ken mamagpigerger iti kapanunotan.”

Dagiti Saksi ni Jehova, agraman dagiti minilion a dadduma pay, ket interesadoda iti dayta a saludsod, ket kaawatan a kasta, ta adu kadagiti padada a manamati ti napukaw kadagiti kampo konsentrasion a Nazi. Apay ngarud, a pinalubosan ti Dios ti kinadakes?

Siwayawaya a Pagayatan ken ti Isyu

Ti immunan a nadakamat a publikasion a Judio mangipaay iti paset ti sungbat iti saludsod, a kunkunana: “Babaen iti panangparsuana kadagiti tattao nga addaan iti siwayawaya a pagayatan, ti Dios, nasken, a limitaranna ti saklawen ti panagtignayna iti masanguanan. No awan ti posibilidad iti di umiso a panagpili dagiti tattao no mapasanguanda iti naimbag ken dakes, ti intero a kapanunotan iti panagpili ket awan pategna. Ti panangipaay iti sangatauan iti siwayawaya a pagayatan ket makita iti panagtignay iti nadiosan nga ayat isu a mangipalubos kadatayo a maaddaan iti bukod a kinatarnaw ken panagrang-ay, uray pay no dagiti pangngeddengtayo ket mangiyeg met ti dakkel a ladingit.”

Daytoy a kapanunotan maitunos iti rekord iti Hebreo a Kasuratan. Manipud idi punganay, ti sangatauan addaan ti wayawaya nga agpili​—uray pay no pilien ni Adan ken ni Eva ti agsalungasing iti Dios (Genesis 3:1-7) wenno pilien ni Cain ti mangpapatay iti kabsatna a lalaki a ni Abel. (Genesis 4:2-10) Dagiti Israelitas idi ugma pinasanguan met ida ni Jehova iti panagpili: “Kitaem, inkabilko iti sangom ita nga aldaw ti biag ken ti imbag, ti patay ken ti dakes. . . . Isu ti gapuna a piliem ti biag tapno agbiagka, sika ken ti putotmo.”​—Deuteronomio 30:15, 19.

Ngem adda maysa a napateg a banag a di inkankano ti Judio a sasao. Daydiay immalsa a mismo iti Dios ken kalpasanna nangpataud iti panagsagaba ni matalek a Job ket aktibo pay laeng, a mangbalballikog iti is-isip dagiti tattao nga addaan iti dinidiablo a pili a nangiturong iti dadduma a kaso kadagiti kampo konsentrasion, panangtutuok, ken ti panangpapatay iti kaaduan. Dayta ket nalawag a nailasin iti libro ni Job a kas maysa a managalsa nga angheliko nga anak ti Dios, ni Satanas, ti Kabusor.​—Job 1:6; 2:1, 2.

Ti impluensia ni Satanas ken ti panagpili nga itukonna sinaknapanna ti lubong itatta, a nangiturong iti kinaranggas ken ti pananglais iti biag ken kadagiti moral nga ipatpateg. Aniaman a mangisiasi iti atension ti sangatauan manipud iti namnama iti panangituray iti Pagarian ti Dios, napolitikaan man a pilosopia, panagsisina ti rasa ken relihion, panangabuso ti droga, aglablabes a ragragsak, panangdayaw ti tao​—amin dagitoy agserbida iti panggep ni Satanas. Awan duadua ngarud nga impadto ti Biblia nga idi naitappuak daytoy iti kaparanget ti daga, dayta kaipapanannanto ti “rigat ditoy daga ken iti baybay, agsipud ta ti Diablo immulog kadakayo nga addaan iti dakkel a pungtot, nga ammona a bassiten ti tiempona”! Nanipud 1914 agbibiagtayon iti panawen dayta a narungsot a pungtot.​—Apocalipsis 12:12.

Ti sangatauan naaddaanen, ken addaan pay laeng, ti panagpili nga agpaituray iti Dios wenno iti Kabusorna, ni Satanas. Daytoy a panagpili a mismo ipamatmatna ti nakabaybayagen nga isyu iti nagbaetan ti Dios ken ni Satanas nga agsubli iti agarup 6,000 a tawtawen. Ngem ipamatmat ti Biblia a ni Jehova a Dios inkeddengnan ti pagpatinggaan iti panangrisot itoy nga isyu​—ket nanipud 1914 ti sangatauan agbibiagen iti tiempo ti panungpalan daytoy sistema nga iturturayan ni Satanas.​—2 Timoteo 3:1-5, 13.

Ti turay ti Pagarian ti Dios mabiiten a dadaelenna ti isuamin a kinadakes ken dagidiay a mangaykayat iti dayta. Dagidiay a mangpili nga agaramid iti naimbag a pagayatan maikkandanto iti biag nga agnanayon iti panagpaiturayda iti Dios iti maysa a naan-anay, awan mulitna a daga.​—Apocalipsis 11:18; 21:3, 4.

“Adtoy! Pagbalinek dagiti Isuamin a Bambanag a Baro”

Ti masanguanan a pinanggep ti Dios a maipaay itoy a daga ken kadagiti natulnog nga agnaed iti dayta ikkatennanto ti dadagsen iti napalabas manipud iti pakalaglagipantayo: “Dagiti immuna a bambanag saandanto a malagipen, didanto mapanunoten.”​—Isaias 65:17, Tanakh, A New Translation of the Holy Scriptures According ti the Traditional Hebrew Text.

Gapuna inton agsaknapen ti panangituray ti Dios iti isuamin a daga, aniaman a panagsagaba a napadasan ti tao mapukawton iti is-isipda kamaudiananna. Iti dayta a tiempo ti rag-o lapunosennanto dagiti amin a napalabas a nakaam-amak a pakalaglagipan, ta ikari ti Biblia, ti Dios “punasennanto ti lulua kadagiti matada, ket awanton ni patay, awanton ti sangsangit wenno rigrigat. Dagiti immuna a bambanag napalabasdan.”​—Apocalipsis 21:4, 5.

Nalawag ti panangipakita ti Biblia nga asidegen ti tiempo a panangusarton ti Dios iti mannakabalin-amin a bilegna a mangpukaw kadagidiay a mangpatpataud iti panagsagaba, tattao man wenno dagiti demonio. Kunaen ti Proverbio 2:21, 22: “Ti nalinteg tawidennanto ti daga, ket ti awan basolna agtalinaedto kenkuana. Ngem dagiti nadangkes magudasdanto ditoy daga.” (Tanakh) Wen, ti Dios “dadaelennanto dagidiay a mangdaddadael iti daga.” (Apocalipsis 11:18) Dayta iramanna met, kamaudiananna, ni Satanas a Diablo.

Ti Dios dinanton palubosan ti nadangkes nga agpaut pay a mangmulit iti daga; ket dinanto palubosan dagiti dakes a tattao a mangtutuok, mangparparigat, ken mangibalud iti padada a tao. Asinoman a mangpili a saan a makitunos iti nalinteg a linlintegna ket saanto a mapalubosan nga agbiag. Dagidiay laeng mangraem iti pagayatan ken linteg ti Dios ti agtultuloy nga agbiag.

Nasurok a 4,000 a tawenen ti napalabas, ti Dios “nakitana a ti kinadakes ti tao dakkel iti daga, ken isuamin a panggep a pinanggepna dakes la a kankanayon.” Isut’ nagtignay babaen ti panangipaayna iti dakkel a Layus. (Genesis 6:5, Tanakh) Ad-adda pay ngarud ti rason iti panagtignay manen ti Dios. Ngem no ipaaytayo ti maitutop a dayaw iti Dios itan, ti biag nga agnanayon isu ti mabiiten a gunggonatayo.​—Isaias 65:17-25; Juan 17:3; 1 Timoteo 6:19.

Nupay kasta, dagiti ngay minilmilion a natay nga adda kadagiti tanem, agraman dagiti biktima iti Holocaust? Ania a namnama ti adda a maipaay kadakuada? Malipatandanton aya?