Manipud Managbasatayo
Nagdumaan ti Kultura
Agyamankam iti kasta unay iti artikulo a “Marangtayan Aya ti Nagdumaan iti Kultura?” (Agosto 22, 1988) Tallo ket kagudua a tawenen a napalabas immakarak manipud iti maysa a pagilian a Makinlaud a napan iti Adayo a Daya, ta ti asawak tarigagayanna ti agsubli iti daga a nakaiyanakanna. Manipud iti kapadasak makunak a tunggal sao iti artikulo ket pudno. Nasdaawak iti nagsayaatan a pannakaisalaysay dagiti parikut a tumaud iti nagbaetan dagiti nagduma a kultura. Ti balakad a naited ket praktikal ken epektibo. Ti artikulo insuronak a mangliklik kadagiti panangidilig iti dati a wagas iti panagbiag.
A. D., Indonesia
Panagsolsolo
Maysaak a 17 años ken maysa a kankanayon a managbasa iti serie dagiti “Agimtuod dagiti Agtutubo . . . ,” nga agingga itatta kankanayon a nakasarakak kadagiti pudno a nagsayaatan a pamay-an. Ngem ti artikulo a Napauluan “Kasano a Magun-odak ti Ad-adu a Panagsolsolo?” (Oktubre 8, 1988) ket dakkel a nakaupayak. Insingasingyo a no dagiti dadakkelko mangaramidda kadagiti diak kayat a panagbisita iti kuartok wenno siripenda ti diary, aramidenda dayta agsipud ta ay-ayatendak. Basta diak makita a kasta. Masapul a talkendak dagiti dadakkelko a ‘saandak a kankanayon a sipsiputan’ ken suksukimaten. No kitaenda ti diary, diakto ida pakawanen. Diakto talken idan wenno maibagan kadakuada dagiti bambanag. Ti diary isu ti pangisursuratak kadagiti personal a parparikutko ken rikriknak. Aniaman ti kayat a maammuan dagiti dadakkelko, ibagak kadakuada, ket mapnekda.
S. F., Pederal a Republika iti Alemania
Ti artikulo saanna a konkonsintiren wenno irekrekomendar ti aramid (a bassit laeng ti maaramidan ti agtutubo a mangtengngel iti dayta) ngem basta tultulonganna laeng dagiti agtutubo a mangawat no apay a dadduma a nagannak aramidenda daytoy—a saan a basta pannakibiang.—ED.
Maysaak a 12-años. Sakbay la unay ti pannakairuar ti artikulo a panagsolsolo, nasarakan ni nanangko dagiti sumagmamano a sursuratko, ket binasana ida. Diak naawatan idi no apay, ngem ti artikulo tinulongannak!
A. B., Estados Unidos
Nasarakak a napno ti impormasion ti artikulo, ket aduan kadagiti nagsasayaat a balakad. Ngem naglidem idi nabasak ti pangarigan ti maysa nga ubing a babai a riawan ti inana tapno baybay-anna a silulukat ti ruangan ti kuartona no adda lalaki a kaduana. Ania ti panggep ti maysa nga agtutubo a lalaki iti kuarto ti maysa nga agtutubo a babai, a gagangay a maysa a kuarto a pagturogan? Awan! Ni nanangko pulos a dina palubosan dayta. Ti salas, ti kuarto ti pamilia, wenno ti kusina, a sadiay adda iti asideg dagiti dadduma, isut’ nainsiriban a lugar a pagawatan ti bisita wenno pagadalan dagitoy a tin-edyer. Dadduma a tin-edyer a mangbasbasa iti dayta a paset ti artikulo ti mabalin a maallilaw!
J. J., Estados Unidos
Maawatan a naimbag dagiti pakaseknan ken singasing ni J.J. Ti serie dagiti “Agimtuod dagiti Agtutubo” ket naisuratda a maipaay iti pangkaaduan a managbasa. Ti artikulo ipakpakitana laeng no kasano nga uray dagiti tattao a saan nga agbibiag a maitunos kadagiti pagalagadan iti Biblia ket matmatanda dagiti bambanag. Kadakuada, ti panangbaybay-a a nakalukat ti ridaw ket maysa a panagannad.—ED.
Tarigagayak laeng ti agyaman kadakayo maipaay iti artikulo nga “Apay a Diak Maaddaan iti Ad-adu a Panagsolsolo?” (Hulio 8, 1988) Maysaak a 13 años. Di pay nabayag a sinaludsodko dayta a saludsod maipapan iti panagsolsolo. Dagiti dadakkelko ken siak naaddaankami iti isu met laeng a panagsuppiat maipapan iti kaadda ti TV iti kuartok kas napasamak ken ni Keith ken dagiti dadakkelna. Nupay no diak nakagun-od iti TV, maawatak no apay a dagiti dadakkelko maseknanda maipapan iti buybuyaek.
S. H., Estados Unidos