Manipud Managbasatayo
Bulalayaw Ti artikuloyo a “Mangaramidkay ti Bukodyo a Bulalayaw” (Enero 8, 1989) ti nangpasiddaaw kaniak ta salaknibanyo ti pagarupyo babaen iti panagkuna, “Dadduma nga eksperto dida ibilang ti indigo.” Daytoy ket masapul koma a mabasa a “dagiti amin a pisiko.” Idi nasarakan ni Isaac Newton a mabalin a paglasinen ti puraw a lawag babaen ti maysa a prism, dinakamatna ti innem a kolor. Nagkedked ti simbaan, ta ti innem ket maysa a dakes a numero, ket naikunana a ti kapipintasan a pagilasinan nga inted ti Dios iti tao mabalin a pito a kolor, ta ti pito ket nasantuan a numero.
J. F., Scotland
Ti historikal a kapaliiwan ni J. F. ket makapainteres. Mabalin nga inayontayo a ti “The New Encyclopædia Britannica” (1987), a dagiti nangipaay iti tulong iti dayta iramanna dagiti pisiko, kunaenna a ti gagangay a bulalayaw ket addaan kadagiti arko a “violeta, indigo, asul, berde, amarilio, kolor kahel, ken nalabaga.”—ED.
Rebbengen dagiti Nagannak Kalkalpasko pay laeng a binasa ti “Nagannak—Addaankay Met ti Rebbengen!” (Setiembre 8, 1988) Kasapulak dayta nga artikulo. Maysaak a 27 años ket addaanak iti agtutubo a lalaki nga 4 ti tawenna. Dagiti nagannak no dadduma ket naigamerda iti kasta unay iti trabahoda ket awan ti umdas a tiempoda a makiay-ayam kadagiti annakda wenno basta mangbusbos iti tiempo a maipaay kadakuada. Ngem agyamanak iti artikuloyo, manipud itattan ken agtultuloyen determinadoak a mangipaay iti tiempo a maipaay iti anakko a lalaki. Uray pay no rugiak laeng babaen ti panangipaay iti sangapulo a minutos iti maminsan, ammok a dayta ket napateg—ti anakko ket napatpateg ngem dagiti amin a dadduma a banag.
A. F., Italia
Kas maysa a mannursuro, inapresiarko dagiti nagsayaatan nga artikulo. Dagiti mannursuro kasapulanda ti tulong dagiti nagannak iti panangdisiplina ket masapul a maammuanda a mannakitinnulongda. Kaaduan kadagiti nagannak ket okupadoda unay a maaddaan iti tiempo a makisarita kadagiti mannursuro. Inanamaenda dagiti mannursuro a mangaywan ti annakda a maipaay kadakuada ket masansan mapabasol dagiti mannursuro no adda mapasamak a dakes. Dagiti artikuloyo nangipaayda iti nasayaat a singasing no kasano a makatulong dagiti nagannak babaen iti pannakiramanda ket kangrunaan iti amin babaen ti panangipakaammoda iti ubing a maseknanda iti aramidna iti eskuelaan. Agyamanak manen iti panangiparangyo itoy a parikut ken ti solusionna kadagiti nagannak. Dagiti mannursuro kasapulanda ti tulongda!
R. N., Estados Unidos
Siak ti presidente iti La Cumbre Junior High School Parent-Teachers Association. Nangipablaakkayo kadagiti serie dagiti artikulo maipapan kadagiti eskuelaan, panangaywan kadagiti annak, kdp., a tarigagayak a magun-odan dagiti nagannaktayo. Adu dagiti masapul a makabasa iti daytoy a material.
G. B., Estados Unidos
Ladawan Ti ladawan a nagparang iti makin-uneg a paset ti akkub iti Hulio 8, 1988 nga Agriingkayo! ket pudno a mangisarming iti kinamanagparnuay ken nakaskasdaaw. Kas maysa nga artist, iti panangpalpaliiwko iti pannakabukel, dagiti kolor, ken disenio, makitak dayta a pudno a nakasaysayaat! Ti pannakailadawanna ket sigun iti uso. Ti ladawan makatulong kadagiti napnuan impormasion nga artikulo ket pudno a tignayenna ti panagregget. Kas iti kaso iti aniaman a makapaganas iti pannangan a putahe, ti mata ti umuna a “makaraman.”
E. S., Estados Unidos
Binasak ti paulo ti akkub (Agosto 22, 1988), nakitak ti mariribukan nga ubing a mangmatmatmat iti nuklear a pannakadadael, ket kalpasanna inukagko ti panid! Saanen a kasapulan dagiti sasao. Anian ti epekto dagiti dua a ladawan. Adtoy ti maysa a magasin a babaen laeng iti dua a ladawan makaipaay iti namnama, pudno a namnama, kadagiti adu nga ubbing.
V. K., Estados Unidos
Maysa a naladaw a panagyaman a maipaay iti artikulo nga “Iglesia Katolika iti India” iti Agriingkayo! a Setiembre 22, 1987. Iti dayta a tiempo an-anamongak pay laeng iti kasta unay ti simbaan, ngem idin simmarungkar dagiti Saksi, ket nangrugin nga agduaduaak. Dagidiay a ladawan iti artikulo ti pudno a nanglukat kadagiti matak. Itan mamatiakon kadagiti Saksi ni Jehova. Agyamanak unay.
A. L., Pederal a Republika iti Alemania