Nagpipintas a Parke Ditoy Lubong

NEW ZEALAND

Ti Fiordland National Park, a kadaklan idiay New Zealand, napartuat idi 1904. Addaan nakaim-imnas a baybay, dagiti natayag a bantay, danaw, karayan, dissuor, bakir, ken yelo a bantay. Nadiskobreda ditoy idi 1948 ti di makatayab a takahe, nga impagarupda a naikisapen.

KENYA

Ti Nairobi National Park masarakan iti pagserkan ti kabisera ti nasion, sumagmamano la a minuto a biahe manipud sentro ti siudad ti Nairobi. Mabuya dagiti buffalo, zebra, giraffe, wildebeest, ostrich, rhinoceros, ken leon a matmaturog, a dida ikankano ti kaadda dagiti bisita.

E.U.A./CANADA

Ti Waterton Lakes National Park, nga agsabat dagiti tanap ken dagiti bantay, naipasdek idi 1895, ket ti Glacier National Park idi 1910. Gapu ta adut’ mangidagadag, pinagkaykaysada dagitoy dua a parke idi 1932 a kas Waterton-Glacier International Peace Park, ti damo unay a kasta a klase. Nakaim-imnas a buya ti adda kadagita a parke, yantangay dinappatanda ti Nagbedngan ti Kontinente. Daytoy a kabakiran ket ayuyang dagiti oso a grizzly, nangisit nga oso, karnero a bighorn, atap a kalding, moose, ken cougar, agraman dagiti ugsa a mulo, ugsa a puraw ti ipusna, ken elk.

BRAZIL/ARGENTINA

Ti Iguaçú National Park, kinapudnona, ket dua a parke; ti parke ti Argentina ket napartuat idi 1909, ken ti naisilpo a parke ti Brazil idi 1939. Ti sangalubongan kinalatakna nga Iguaçú Falls nangatngato ngem ti Niagara Falls ken nalawlawa ngem ti Victoria Falls idiay Africa. Ditoy met ti pakasarakan ti sumagmamano a kadadam-egan, kapipintasan a mula iti intero a lubong.

JAPAN

Ti Nikko National Park saklawenna dagiti nagadu a danaw, dissuor, patag a turod, ken bantay ket gagangay a Hapones ti buyada. Ditoy ti ayuyang ti maikalkaluya a serow a Hapones, wenno kalding nga ugsa. Dagiti dadduma nga animal ditoy a parke isu ti Hapones nga oso a nangisit ken ti Hapones a macaque, wenno bakes nga ababat’ ipusna.