Panangsapul kadagiti Solusion
NO MAIPAPAN iti panangiremedio kadagiti pagdaksan iti Wall Street, adut’ kapanunotan. Ngem awan ti panagtutunos. Dadduma nga eksperto ikalinteganda a ti utang ken ti LBO masapul a malimitaran, ngem dadduma ipilitda a nasayaat dagitoy a dua iti ekonomia. Dagiti dua a dasig addaanda kadagiti adu unay nga estadistika a “mangpaneknek” kadagiti puntoda.
Marikna ni Helmut Schmidt a masapul nga agtitinnulong dagiti kangrunaan a bileg ti ekonomia ti lubong (Estados Unidos, Alemania, Japan) tapno risoten dagiti pakarigatan ti ekonomia ti lubong. Kunaenna: “Ti kinakapuy dagiti tallo a gobierno saan a mabalin a pagpambar iti panangbusbos iti ad-adu a tiempo nga agreklamo maipapan iti maysa ken maysa ngem ti panangbigbigda iti pagkapuyanda met laeng. Uray pay dagiti nakapuy a tattao makaibaklayda iti rebbengen.”
Ngem imtuodenyo ti bagiyo met laeng: Kasano kaadu ti nainkalintegan nga inanamaentayo manipud kadagiti nainkasigudanen a nakapuy a gobierno ti tao? Kas pangarigan, dagus nga aminen ni Schmidt, a ti parikut iti utang ti Third World ket “di marisot ket pudno a saan a marisot.” Marisot kadi ti nakapuy ti saan a marisot?
Pudno unay dagitoy a sasao ti masirib a tao agarup 25 siglon ti napalabas: “Saan nga agtaud iti tao a magna ti panangiturong kadagiti addangna.” (Jeremias 10:23) Anian ti kinapudno dagidiay a sasao itatta! Nakarikrikut ti ekonomia ti lubong ta di pay maawatan dagiti eksperto, siranto ketdin ti panangtarimaan iti dayta.
Aniat’ maaramidam iti sidong ti kasta a di natalged nga ekonomia ti lubong? Manen nangitudo ti Biblia iti balakad: Sisisirib a mangipuonan! Paliiwenyo dagiti sasao ni Jesus idiay Mateo 6:19, 20: “Saankayo nga agurnong kadagiti gupgupit ditoy daga, isu a ti sanga ken ti lati dadaelenda ida, ken isu a dagiti mannanakaw kalienda ken takawenda. Ngem, agurnongkayo kadagiti gupgupit sadi langit, isu a ti sanga ken ti lati dida dadaelen ken isu a dagiti mannanakaw dida kalien ken takawen.”
Ngem kasano ti panangaramidyo iti dayta—agurnong kadagiti gupgupit sadi langit? Rugianyo babaen ti panangbigbigyo a, datay amin, masapul a pennekentayo dagiti naespirituan a kasapulantayo. (Mateo 5:3) Maiyurnosyo dagidiay a kasapulan babaen ti panangipuonan iti napatpateg pay ngem kuarta—ti tiempoyo—iti panagadal iti Biblia. Agsiddaawkayto kadagiti simple ken nainkalintegan a sungbat nga ipaayna kadagiti kaaduan a saludsod a mangrirriribuk kadakayo.
Ti dati a yuppie a nadakamat iti napalabas nga artikulo kasta ti inaramidna. Isut’ nagsubli iti panagadal iti Biblia a binaybay-anna bayat dagiti okupado unay a tawtawen a kaaddana idiay Wall Street, ket nasarakanna a ti panangaramidna iti kasta pinagbalinna a nasaysayaat ti panagbiagna. Isut’ naragsakan a makaammo nga impadto ti Biblia ti kamaudianan a pannakarbek dagiti amin nga iturturong ti agum a sistema ti ekonomia daytoy a lubong. Inton iyegen ti Dios ti makadidigra a panungpalan daytoy a sistema ti lubong, awanto ti listaan dagiti aksiyón, awanto ti kuarta, a makagatang iti pannalaknib wenno ti pannakaispal. Awanto ti pateg ti kuarta ta ibellengto dagiti tattao kadagiti kalsada. (Ezequiel 7:19; 1 Juan 2:15-17) Dagiti laeng naespirituan a puonan ti addaanto iti pateg iti dayta a tiempo.
Ti nangnangruna a makaliwliwa isu ti kari ti Biblia a kalpasan dayta a tiempo iti pannakadadael, saanton nga iturayan ti agum ti lubong. Ti kinahustisia, saan a ti ganansia, ti agturayton iti agnanayon. (Isaias 9:6, 7) Wen, dumtengto ti aldaw a kunaenton dagiti tattao, ‘Wall Street—ania dayta?’