Napanunotyo Kadin?

ITI ginasut a relihion, sekta, ken kulto iti lubong ita, kasano a posible a mailasinyo ti relihion nga anamongan ti Dios? Kasla panangbirok dayta iti dagum iti bunton ti garami. Ngem kasapulan kadi a saggaysaenyo a sukimaten ti tunggal garami? Saan. Mabalinyo nga usaren ti proseso a panangilaksid. Agtignay ti Sao ti Dios, ti Biblia, kas maysa a magneto a tumulong kadakayo a mangilasin iti “maysa a pammati.”​—Efeso 4:5.

Iti napalabas a ruar daytoy a magasin, iti sidong ti “Napanunotyo Kadin?” (Enero 8, 1994, panid 13), inlawlawagmi ti saludsod maipapan iti di ipapatay ti kararua. Babaen ti pannakausar ti Naimbibliaan a panagrason, napaneknekanmi nga awan ti di matay a kararua ti tao a maparaburan wenno agsagaba kalpasan ti ipapatay. (Eclesiastes 9:5, 10; Ezequiel 18:4) Babaen dayta a simple a kinapudno, mailaksidtayo ti aniaman a relihion a mangisursuro nga adda di matay a kararua ti tao. Dayta ti mangibati iti sumagmamano laengen a relihion iti panagbiroktayo iti maysa nga anamongan ti Dios. Isu nga usarentayo ti dadduma pay a saludsod a makatulong kadatayo a mangkissay pay iti listaan, babaen laeng iti panangusig ken pannakirinnason kadagiti Nainkasuratan a teksto a nadakamat iti baba.

1. Ti kadi pudno a panagdayaw itan-ok, ipadayag, ken di maitutop a padayawanna dagiti natauan a relihiuso a panguluen, nga urayna la a naganan ida kadagiti di nainkasuratan a titulo?​—Salmo 96:5-7; Mateo 23:6-12; 1 Corinto 3:5-9.

2. Rumbeng kadi a ti pudno a relihion ket maysa nga organisasion ti negosio, tapno makapagbiag a sinanam-ay dagiti panguluenna?​—Mateo 6:19-21; Santiago 2:1-4; 5:1-3.

3. Rumbeng kadi a managanan ti pudno a relihion iti maysa laeng a sursuro (kas iti Baptist, Pentecostal), babaen iti namunganayanna a lugar (kas iti Romano, Southern, Church of England), babaen kadagiti imperpekto a namuangay iti dayta (Luther, Calvin, Wesley) wenno babaen iti kita ti panangiturayna (kas iti Presbiteriano, Episcopal, Congregational)?​—Isaias 43:10, 12; Aramid 11:26.

4. Ikagumaan kadi ti pudno a panagdayaw nga ilemmeng wenno sukatan ti impalgak ti Dios a naganna?​—Isaias 12:4, 5; Mateo 6:9; Juan 17:26.

5. (a) Kasano ti rumbeng a panangmatmat ti pudno a relihion iti Biblia? (Salmo 119:105; Lucas 24:44, 45; Roma 15:4; 2 Timoteo 3:14-16) (b) Kasano ti rumbeng a panangmatmatna kadagiti maawagan a kalpasan-Biblia a paltiing?​—Galacia 1:8, 9.

6. Iti ania ken kadagiti siasino ti rumbeng a pangiturongan iti atension dagiti pudno a managdaydayaw agpaay iti pannakaisalakan?​—Salmo 27:1; Mateo 6:33; Roma 16:25-27; 1 Corinto 15:27, 28; Apocalipsis 11:15.

7. Ania a kita ti kababalin ti rumbeng a patauden ti pudno a relihion kas resulta dagiti sursurona?​—Mateo 22:37-40; Efeso 4:23-29; idiligyo ti Galacia 5:19-21 iti Gal 5:22, 23.

8. Makiraman kadi ti sangalubongan a panagkakabsat dagiti pudno a managdaydayaw iti Dios kadagiti mamagsisina a politika ken nasionalismo?​—Daniel 2:44; 7:14; Juan 18:36; Roma 16:17; 1 Corinto 1:10.

9. Ipalubos kadi ti panagdayaw nga anamongan ti Dios ti pannakiraman kadagiti gubat ken panagpipinnatay gapu iti pulí wenno tribo?​—Exodo 20:13; Isaias 2:2-4; Juan 13:34, 35.

10. Iti sangalubongan, asino ita ti mangipakpakita iti pudno a Nakristianuan nga ayat? Ti saan a pinagsisina ti politika, pulí, wenno nasionalismo? Ti saan a mangipadpadayag kadagiti natauan a papanguluen? Ti saan a manggunggundaway iti kinabaknang ken takem dagiti tattao? Ti saan a makiramraman iti gubgubat? Ti addaan Naimbibliaan a nagan? Ti mangitantandudo iti turay ti Pagarian ti Dios kas ti manayon a solusion dagiti parikut ti sangatauan?​—Isaias 43:10, 12.

Napanunotyo Kadin? Dagiti Sungbat ti Biblia

Ti sumaganad isut’ dadduma kadagiti nadakamat a teksto iti salsaludsod idiay panid 20:

1. “Kaykayatda ti katan-okan a lugar kadagiti pangrabii ken dagiti makinsango a pagtugawan kadagiti sinagoga, ken dagiti kablaaw kadagiti plasa ken awagan dagiti tattao iti Rabbi. Ngem dakayo, dikay maawagan iti Rabbi, ta maymaysa ti mannursuroyo, yantangay agkakabsatkayo amin. Mainayon pay, dikay naganen nga amayo ti asinoman ditoy daga, ta maymaysa ti Amayo, Daydiay nailangitan. Dikay met maawagan iti ‘papanguluen,’ ta ti Panguluenyo ket maymaysa, ni Kristo. Ngem daydiay kadakkelan kadakayo masapul nga agserbi kadakayo. Siasinoman a mangitan-ok iti bagina maipababanto, ket siasinoman a mangipababa iti bagina maitan-okto.”​—Mateo 23:6-12.

2. “Isardengyo ti agurnong maipaay iti bagbagiyo kadagiti gameng iti rabaw ti daga, sadiay nga ibusen ti sanga ken lati, ken sadiay a dagiti mannanakaw serreken ken takawenda. Imbes ketdi, agurnongkayo maipaay iti bagbagiyo kadagiti gameng idiay langit, sadiay a saan nga ibusen uray ti sanga wenno lati, ken sadiay a dagiti mannanakaw dida serreken ken takawen. Ta no sadino ti yan ti gamengmo, addanto met sadiay ti pusom.” (Mateo 6:19-21) “Umaykayo, ita, dakayo a nabaknang a tattao, agsangitkayo, nga aganug-ogkayo gapu kadagiti ladingityo nga um-umay kadakayo. Dagiti kinabaknangyo narunotda, ket dagiti makinruar a kawesyo kinnan ti sanga. Ti balitok ken pirakyo naglatida, ket ti latida kasladanto pangsaksi a maibusor kadakayo ket kanendanto dagiti nalasag a paspasetyo.”​—Santiago 5:1-3.

3. “‘Dakayo dagiti saksik,’ kinuna ni Jehova, ‘ti adipenko a pinilik, tapno maammuanyo ken patiendak, ken maawatanyo a siak Daydiay.’” (Isaias 43:10) “Immuna idiay Antioquia a dagiti adalan babaen ti nadibinuan a panangiwanwan naawaganda iti Kristiano.”​—Aramid 11:26.

4. “Agyamankayo ken ni Jehova, dakayo a tattao! Awaganyo ti naganna. Ipalawagyo dagiti aramidna kadagiti inilin-ili. Isaritayo a ti naganna maitan-ok. . . . Maipakaammo koma daytoy iti isuamin a daga.” (Isaias 12:4, 5) “Amami nga adda iti langlangit, masantipikar koma ti naganmo.”​—Mateo 6:9.

5. (a) “Manipud kinamaladaga naammuam dagiti nasantuan a sursurat, a makabael a mamagsirib kenka maipaay ti pannakaisalakan babaen ti pammati a mainaig ken Kristo Jesus. Amin a Kasuratan impaltiing ti Dios ken makagunggona iti panangisuro, iti panangtubngar, iti panangpalinteg iti bambanag, iti panangdisiplina iti kinalinteg.” (2 Timoteo 3:15, 16) (b) “Uray no dakami wenno ti maysa nga anghel manipud langit ideklarana kadakayo kas naimbag a damag ti maysa a banag a nalablabes ngem iti indeklarami kadakayo kas naimbag a damag, isu mailunod koma.”​—Galacia 1:8.

6. “Itultuloyyo, ngarud, a sapulen nga umuna ti pagarian ken ti kinalintegna, ket isuamin dagitoy sabsabali pay a bambanag mainayondanto kadakayo.” (Mateo 6:33) “Ti pagarian ti lubong nagbalinen a pagarian ni Apotayo ken ni Kristona, ket agturayto kas ari iti agnanayon ken awan inggana.”​—Apocalipsis 11:15.

7. “‘Masapul nga ayatem ni Jehova a Diosmo iti amin a pusom ken iti amin a kararuam ken iti amin a panunotmo.’ Daytoy ti kadakkelan ken umuna a bilin. . . . ‘Masapul nga ayatem ti kaarrubam a kas iti bagim.’ Kadagitoy dua a bilin nga agpannuray ti intero a Linteg, ken dagiti Mammadto.” (Mateo 22:37-40) “Ti bunga ti espiritu ket ayat, rag-o, talna, mabayag a panagitured, kinamanangaasi, kinaimbag, pammati, kinaalumamay, panagteppel. Awan ti linteg a maibusor kadagita a bambanag.”​—Galacia 5:22, 23.

8. “Ni Jesus simmungbat: ‘Ti pagariak saan a paset daytoy a lubong. No ti pagariak ket paset daytoy a lubong, dagiti agserserbi kaniak nakibakalda koma tapno saanak a maiyawat kadagiti Judio. Ngem, iti kinaagpaysuanna, ti pagariak saan a manipud itoy a gubuayan.’”​—Juan 18:36.

9. “Dika mamapatay.” (Exodo 20:13) “Mangtedak kadakayo iti maysa a baro a bilin, nga ayatenyo ti maysa ken maysa; kas ti panagayatko kadakayo, kasta met nga ayatenyo ti maysa ken maysa. Babaen iti daytoy maammuanto ti isuamin a dakayo dagiti adalak, no addaankayo iti ayat iti maysa ken maysa.”​—Juan 13:34, 35.

10. “‘Dakayo dagiti saksik,’ kinuna ni Jehova, ‘ti adipenko a pinilik, tapno maammuanyo ken patiendak, ken maawatanyo a siak Daydiay. . . . Gapuna a dakayo dagiti saksik,’ kuna ni Jehova, ‘ket siak ti Dios.’”​—Isaias 43:10, 12.