Manipud Managbasatayo
Panangisalakan kadagiti Ubbing Pagyamanan iti artikulo a “Minilmilion nga Ubbing ti Matmatay.” (Setiembre 22, 1988) Naaddaanak ti gundaway a mangusar iti impormasion maipapan iti Oral Rehydration Therapy idi ti dua-bulanna nga anakko nagsakit iti diarrhea. Dagdagus, makitak ti nagbaliwanna. Nagtalnan ket nakaturogen.
S. S., Estados Unidos
Holocaust Kas sungbat ti artikuloyo, mangipatulodak iti maysa a polieto a napauluan Did Six Million Really Die? (Pudno Kadi nga Innem a Milion ti Natay?) (Abril 8, 1989) Adu a historiador a manangrebisar ti nagkuna a saan a pulos a napasamak ti Holocaust, a ti bilang nga innem a milion ket nakalablabes iti maminribo a daras, nga awan a pulos dagiti gas chambers a naibangon a maipaay a pangpukaw dagiti Nazis kadagiti Judio.
R. B., Canada
Ammomi a naimbag ti kapanunotan dagiti historiador a manangrebisar. Nupay kasta, adda pammaneknek dagiti rinibribo a nakalasat—ginasgasut kadakuada dagiti Saksi ni Jehova—nga iti adu a kaso nakitada a mismo ti panangpapatay kadagiti kampo konsentrasion. Nupay no ti eksakto a bilang dagidiay natay iti Holocaust ket pulos a dinto maammuan, saan a mapagduaduaan ti historiko a kinapudno a napasamak ti holocaust.—ED.
Mariknak a diak maipaima daytoy a bilang kadagiti dadduma gapu iti ladawan kadagiti panid 2 ken 3. Dagita a buya naipabuyadan kadagiti nabiit pay a programa iti TV; siempre mabalin nga iddepen ti maysa dagitoy. Ti epekto dagiti naimaldit a pagbasaan ket nakarkaro, ket ad-adda a nataktika ti panangpakdaar kadagiti tattao a saan a nairuam iti inaldaw a pannakakita iti nakaam-amak a pasamak.
V. S., Inglatera
No dadduma saan a makaparagsak ti kinapudno, makapakigtot. Uray pay ti Biblia usarenna dagiti nakalawlawag—no dadduma nakaam-amak—a pagsasao no ti tema sapulenna dayta. Ket ti tema maipapan iti Holocaust pudno a sapulenna ti napudno a panangisalaysay. Ti ladawan ngarud nagserbi a mangipaganetget kadagiti managbasatayo ti kinapudno ken pagam-amkan iti Holocaust iti pamay-an a saan a kabaelan dagiti sasao. Ipaganetgetna met kadatayo a ti turay ti tao di nagballigi ket naan-anay a nainkalintegan ti Dios iti panangiyegna iti mabiiten iti panungpalan daytoy dakes a sistema dagiti bambanag ken ti panangsukatna iti dayta iti turay iti Pagarianna.—Daniel 2:44; Mateo 6:9, 10; 2 Pedro 3:13.—ED.
Ti nabiit pay nga artikuloyo maipapan iti Holocaust kasla naan-anayen. Nupay kasta, naipamaysa unay iti dakkel a grupo dagiti Judio ken ti minoridad a grupo dagiti Saksi ni Jehova. Daytoy ket maipaay a pagdaksan dagiti dadduma a grupo a nagsagaba, kas kadagiti Gypsies.
A. G., Francia
Adu a dadduma a grupo ti nagsagaba iti sidong ti turay ti Nazi. Dagiti Saksi ni Jehova, nupay kasta, ket naisangsangayanda ta mabalin a nawayawayaanda koma no inlibakda ti pammatida. Ti panagkedkedda a mangaramid iti kasta ipakitana a nagbalinda a martir, saan laeng a biktima.—ED.
Homoseksualidad Sakbay ti pannakairuar ti artikuloyo kasta unay ti pannakariknak nga agmaymaysaak. (Abril 8, 1989) Sakbay ti panagbalinko a tin-edyer, nakikadkaduaakon kadagiti gagayyemko a homoseksual. Intultuloyko daytoy agingga iti panagbaritok agingga a rinugiak ti nakipagadal iti Biblia kadagiti Saksi ni Jehova. Ngem no dadduma adda pay laeng dagiti dakes a rikriknak. Mariknak pay a diakto a pulos agbalin a pudno a lalaki, ken di met agbalin a maysa a panglakayen iti kongregasion. Ngem idi nabasak ti naadaw manipud ken Jason iti artikulo, nagsangitak gapu ta isut’ maysan a panglakayen iti kongregasion, ket isut’ addaan kadagiti umasping a parparikut idi napalabas! Mariknakon a pasetnak ti organisasion ni Jehova.
M. M., Estados Unidos