Di Makaay-ayo a Nota iti Industria ti Musika?

UMIMDENG a naimbag iti musika nga agtataud iti radioyo wenno kadagiti plakayo wenno iti telebisionyo. Dagidiay kadi mangmangngeganyo ket pudno a de kuerdas nga instrumento? Ti kadi im-imdenganyo isu ti pudno a brass section?

Bayat ti irarang-ay ti teknolohia ti musika, dagidiay timtimek a mangngeganyo mabalin a saan nga agtataud kadagiti instrumento a pampanunotenyo. Mabalin nga umim-imdengkayo iti maysa a synthesizer. Kinapudnona, para kadagiti adu a musiko, ti synthesizer irepresentarna ti di makaay-ayo a nota iti industria ti musika. Adu a kakasta a musiko ti makarikna a ti synthesizer al-alaennan ti trabahoda!

Ania ti Maysa a Synthesizer?

Ti synthesizer ket maysa nga instrumento a pakapataudan ti maysa a timek babaen iti elektrikal a pamay-an. Mabalin a balbaliwan ken timbengen ti mangus-usar ti kasasaad ti timek. Ti timek ket masansan a mapataud manipud iti maysa a teklado, ket no kasta, ti pannakaurnos dagiti teklado pumada iti piano.

Ti synthesizer ket naawagan a kasta agsipud ta pataudenna, wenno pagtitiponenna, dagiti nadumaduma a naiprograma a kasasaad tapno pataudenna ti timekna. Dadduma a synthesizer ken elektroniko a teklado mangipaayda iti digital a pamay-an a sadiay ti timek pudno a mairekord iti teklado ket mapataud ti tono sigun iti paset ti teklado a maitalmeg. Nupay no ti kasta a timek mabalin a saan mapataud babaen iti umiso unay a depinasion, daytoy nga artikulo iramanna ti teklado a kas synthesizer.

Dagiti synthesizer addadan iti aglawlaw iti adun a tawtawen. Ngem ti kimmaro ti kinalatakda bayat ti 1970’s, idi ti instrumento ket nausar iti popular a musika tapno mangiyeg iti baro a timek a nangkompetensia iti guitara a de koriente. Nupay no iti damo daytat’ maysa laeng nga immuna nga instrumento a makapataud kadagiti makaawis nga epekto iti timek, dagiti synthesizer mabalin a maiprogramada babaen iti digital a teknolohia tapno tuladenda ken pataudenda ti naisangsangayan a timek iti gagangay nga instrumento.

Kasano a Pagpeggaden ti Synthesizer dagiti Trabaho?

Panunotenyo laengen a dakayo ket maysakay a musiko, ket pagsapsapulyo ti panagtokar ti biolin kadagiti panagtokar a panagirekord ti musika a maipaay iti telebision, dagiti komersial, ken dagiti kapada dayta. Ipagaruptayo nga iti maysa a panagirekord ti tokar, ti 20 a nakuerdasan nga instrumento ket kasapulan.

Ti direktor iti musika kayatna a pababaen ti gasto iti panangtangdan kadagiti adu a biolinista, ket magun-odanna ti isu met laeng a kapigsa ti nakuerdasan a timek babaen ti panangtangdanna laeng iti innem a biolinista ken maysa a managtokar iti synthesizer. Ngarud ti synthesizer inikkatna ti trabaho ti 14 a biolinista a maipaay iti dayta a panagirekord ti tokar, ket mabalin a dakayo ti maysa kadagidiay saan a matangdanan. Itan, no mapasamak daytoy iti maminsan laeng, mabalin a dikay madanagan. Ngem no daytat’ agbalinen a kadawyan a padron​—ket marikna dagiti dadduma a musiko a kastan ti napasamak​—makitayo kadi no kasano a ti synthesizer mabalin a pagpeggadenna ti pagsapulanyo?

Siuumiso kadi a matulad ti synthesizer ti gagangay a tuno ken kapigsa ti instrumento? Ni Mike Comins, biolinista ken opisial iti Recording Musicians Association, kunaenna: “Masansan nga agaangawkami maipapan iti kapanunotan nga agparang ni Georg Solti iti entablado iti Orchestra Hall idiay Chicago, ket kaduana ti maysa a managtokar iti synthesizer. Itag-ayna dagiti takkiagna, ket daytoy a lalaki naan-anay a pataudenna ti timek ti Chicago Symphony . . . Daytat’ nakalkaldaang nga angaw, agsipud ta nupay no ti synthesizer dina sinukatan ti maysa nga orkestra ti simponia iti publiko wenno iti rekord, kabaelanna nga aramiden ti kasta, ket daytat’ nakaam-amak.”

Orkestra a Nakakahon?

Idi 1984 maysa a musiko ti nangirekord iti maysa nga album nga addaan iti napigsa a timek ti orkestra ket inawaganna ti “orkestra” ti “LSI Philharmonic.”a Kinapudnona ti “orkestra” ket maysa a synthesizer. Ti kompositor gimmasto iti napattapatta a 2,000 nga or-oras iti nasurok laeng a maysa ket kagudua a tawen a nangiprograma iti digital a synthesizer tapno maalana ti timek ti orkestra. Nakaskasdaaw dagiti resultana. Ti magasin a Keyboard awaganna dayta ti “maysa kadagiti nakaskasdaaw unay a paglaingan iti panamagtitipon” ket kunana a “ti kapanunotan a ti maymaysa a teklado mabalin nga allilawennatayo a mangipagarup a dayta ti Chicago Symphony ket naan-anay a saan nga imposible a kapanunotan.”

Dayta kadi a panangtulad kadagiti timtimek iti orkestra ipamatmatna nga awanton ti mamaay dagiti gagangay nga instrumento? Saan sigun iti nadakamat iti ngato a kompositor, isu a nagkuna, “Pagay-ayatko ti orkestra . . . kaykayatko pay laeng ti orkestra a mismo!”

Umanamong dagiti adu a musiko. Dadduma ti makarikna nga awan ti synthesizer a makatulad a siuumiso kadagiti timek ken kapigsa dagiti dadduma nga instrumento a pudno a sukatanna ida. Kunaen ti musiko a ni Walter Sear: “Ti [napataud] a timek ti trompeta ket saan a kas iti timek ti trompeta iti maysa a nalaing a musiko. . . . Ket ti indayog ken arte ti mapuypuyotan nga instrumento saan a gagangay iti maysa a teklado.” Ngem pagamkanna a dagiti tattao saanda a mailasin dayta iti panagimdengda ket awatendanton ti patauden ti koriente a timek uray no daytat’ “agkurang kadagiti babassit a puersa a mamagbalin kadagiti mapagpaguni nga instrumento a makaawis unay.”

Pudno unay, ti synthesizer mamataud bassit iti panagsusuppiat iti propesional nga industria ti musika. Ngem ti kinalatak iti synthesizer dina laeng apektaran dagiti propesional a musiko. Apektaranna met ti nalataken nga instrumento nga adda iti pagtaenganyo.

Ti Maudi nga Al-aldaw iti Piano?

Gapu iti panagbalbaliw iti synthesizer, sangsanguen met ti piano ti pakarigatan. Ipadamag dagiti kompania ti piano a bumabbaban ti paglakuanda, ket sumagmamano a nalatak a managpataud iti piano ti simmardengen nga agnegosio. Kaskasdi, bayat dayta met laeng a tiempo, ngimmato iti kasta unay ti naglakuan iti synthesizer.

Nupay kasta, saan a ti timek ti piano ti nagbalin a di nalatak. Kas inlawlawag ti maysa a makinkukua iti maysa nga studio: “Adda pudno a panagkalikagum kadagiti timek iti piano, ngem 99 a daras kadagiti 100 a kliente ti saan a napudno unay no kasano a magun-odanda dayta.” Kaykayat dagiti adu nga usaren ti synthesizer gapu ta saan nga agbalbaliw ti tunona, maaw-awit ken iti adu a kaso, nalaka. Kinapudnona, adu a synthesizer ti mailako laeng iti nababbaba ngem kagudua ti gatad iti piano.

Daytoy kadi kaipapananna a din agbayag ti synthesizer sukatannanton ti piano a namimpinsan? Agduadua dagiti dadduma a mapasamak dayta. Kunaen ti ehekutibo iti panagpataud a ni John Steinway: “Awanto ti makasukat iti main-inot a gagangay a panagtokar ti piano. Nupay no mangar-aramidda iti ekstraordinario a trabaho iti daytoy a paset, pagarupek a saandanto a makaipaay iti agtokar iti panangtengngel a magun-odanna iti maysa a piano.”

Kaskasdi, manipud iti panangmatmat iti managpataud ti piano, nalawagen ti pammaneknek: Bimmaban ti naglakuan iti piano, ket kaykayaten dagiti tattao ti synthesizer. Mabalin a temporario dayta a kasasaad. Wenno mabalin, kas napaliiw ti magasin a Keyboard, “a masaksaksiantayon ti umuna kadagiti maudi nga al-aldaw iti piano.”

Ul-uliten Kadi ti Historia ti Bagina?

Saanen a baro ti parikut. Iti intero a historia, ti irarang-ay ti teknolohia pinataudna ti kellaat a din pannakaiyempleo dagiti adu a nalalaing a trabahador. Ket itan, gapu iti synthesizer, uray dagiti dadduma a propesional a musiko mangrugrugin a makitada ti di pannakaiyemplo a nakalkaldaang a pagbanagan iti karerada.

Para kadagidiay a nairaman iti panangpataud ken panagtokar iti synthesizer, linukatan ti teknolohia dagiti ruruangan ti kasla awan patpatinggana a gundaway. Para kadagidiay ti pagsapulanda ket panagtokar kadagiti gagangay nga instrumento, ti synthesizer irepresentarna ti di makaay-ayo a nota a mabalin a mangikkat iti trabahoda.

Gapuna iti sumaganad a dumngegkayo iti musika iti TV, radio, wenno pagpatokaranyo iti plaka, umimdengkayo a naimbag, ket dikay palubosan nga allilawennakayo ti lapayagyo. Mabalin nga umim-imdengkayo iti maysa a synthesizer.

[Dagiti Footnote]

[Blurb iti panid 14]

“Ti [napataud] a timek ti trompeta saan a kas iti timek ti trompeta iti maysa a nalaing a musiko. . . . Ket ti indayog ken arte ti mapuypuyotan nga instrumento saan a gagangay iti maysa a teklado.”