Krusada iti Kinaranggas Apay?

I Satanismo, wenno panagdayaw iti Diablo, agsubli idi tiempo dagiti immuna a tattao. Ti makalimo a kaadda ni Satanas iti minuyongan ti Eden ti nangiturong iti immuna a paris a simmiasi iti Namarsuada, ni Jehova a Dios. (Genesis 3:1-6; Apocalipsis 12:9) Dayta ti nangtanda kadakuada iti agnanayon a kas ti immuna a kakadua ni Satanas.

Bayat dagiti simmarunon a milenio, imbangonen ti Satanismo ti nadumaduma a naalas nga okultona​—panangkulam, black magic, ti dinedemonio a panagsalamangka, ken adu a dadduma pay. Babaen iti panangallilaw, nupay kasta, kaaduanna a ti nagan a Satanas ken ti pakailasinan iti panagdayawna ket nasalimetmetan a saan nga ammo dagiti paspasurotna ken dagiti managdayawna.

Nanipud iti panaglabas ti maika-20 a siglo, adda ti nagdakes a pannakaisubli ti panagdayaw ken satanas, ket ita nakagtengen kadagiti adu a paspaset iti lubong. Nagparang ti Satanismo iti narelihiusuan nga aramid nga addaan iti napanayag a baro a ladawan. Saanen a mailimlimed, nga agpammarang a kasla manangtulong. Imbes ketdi, madaydayaw ni Satanas kadagiti mapanunot a kararanggasan a pamay-an.

Maysa kadagiti immuna a nangibangon iti Satanismo iti daytoy a siglo isu ti maysa nga Ingles a managan Aleister Crowley. Idi 1905, idiay Los Angeles, California, nangorganisar ni Crowley ti grupo a Satanismo a managan “Ordo Templi Orientis.” Di nagbayag isut’ nagbalinen a maawat a pangulo iti dumakdakkel a kulto. Iti librona a Book of Law, intandudo ni Crowley ti maysa a baro a pormula iti relihiuso a pammati: “Ti intero a linteg isut’ panangaramid iti aniaman a pagayatam.” Manipud itoy a pilosopia nga intandudo ni Crowley ti pananglabsing iti amin a paglintegan iti moral ken ti prinsipio ti Biblia naammuanen ti tao. Ti panangpapatay, kinaranggas, panangrames, ken ti panangidaton iti tao ngarud ket nagbalinen a paset iti relihiuso a ritual.

Maipapan iti panangidaton ti tao, nagsurat ni Crowley: “Maipaay iti ngangngani amin a panggep ti daton a tao ti kasayaatan, ket ti ubing a lalaki nga awan ti ammona ken nakalalaing isu ti kasasayaatan ken maitutop a biktima.” Naminsan tinukoy ni Crowley ti bagina met laeng a kas ti “kadadaksan a tao iti lubong.” Kalpasan ti panangbusbosna iti sumagmamano a tiempo iti pagtaraknan kadagiti agmauyong, nakuna nga isut’ natay a maysa nga adikto iti heroin iti nalaka ti abangna a balay idiay Inglatera.

Daksanggasat, nupay kasta, ti pilosopia ni Crowley a wayawaya “a mangaramid iti aniaman a pagayatan ti maysa” iti nagan ti relihion ket saan a natay a naikuyog kenkuana. Paliiwenyo daytoy a kapaliiwan ti maysa a mannurat: “Ti kapanunotan ni Aleister Crowley nasaknap idiay [lugar ti Los Angeles], ngem ti panaglablabesna awan ti mamaayna no idilig kadagiti managdaydayaw iti diablo itatta.”

Kinasungdo iti Diablo

Patien dagiti managdaydayaw ken Satanas a ti Diablo ti agturay iti lubong. Kasta met, sigun ken Robert J. Barry, iti panagsuratna iti The National Sheriff, “inton dumteng ti panungpalan ti lubong, dagiti puersa ni Lucifer ringbawannanto ti pannakabalin dagiti puersa ti Dios ken ni Kristo ket iturayandanto ti langit. Ngarud, dagiti Satanista ikarida ti kinasungdoda iti diablo, saan laeng a maipaay iti tulongna iti daytoy a lubong, no di ket iti lubong nga umay.”

Dadduma a managdaydayaw ken Satanas ti makuna a mamati a ni “Kristo ken ni Satanas pinagtiponda ti puersada tapno iyegda ti panungpalan iti lubong.” Kinuna ti maysa a sataniko a kulto nga usaren ni Kristo ni Satanas a mangdangran iti tao. Gapuna, sigun ken Maury Terry, iti librona a The Ultimate Evil, “ti panangdayaw ken ni Satanas ket kaiyariganna ti panangdayaw ken ni Kristo. Ket ti panangpapatay iti nagan ni Satanas ket iti kinapudnona panangpapatay a maipaay ken Kristo: maysa a nadiosan a mision.”

Ni Aleister Crowley ti nagkuna a kayatna, kas paset iti sursuro ken ar-aramid ti narelihiusuan a kulto, “ti panagtabbaaw, panangpapatay, panangrames, rebolusion, aniaman a dakes.” Kinapudnona, maysa a pangulo iti kulto ti nangiwaragawag iti nakalawlawag nga ayab: “MAMAPATAYKA!” Ket nakalawlawag a daytoy ti apag-isu nga ar-aramiden dagiti miembro iti sataniko a kulto.

Inlawlawag ti maysa a tao ti rason iti kinaranggasda: “Ti panangrames isu ti panggep iti panangtulaw iti birhen, isu nga addaan iti naisangsangayan a kinapateg kadagiti managdaydayaw ni Satanas. Ti panangpuor ket maysa a simbolo iti dakkel nga uram, wenno Armagedon, ket dagiti panangpapatay isuda ti mangisaknap iti riribuk ken mangtungpal iti padto ni Daniel: ‘Ngem ti nadangkes agaramidto a sidadangkok.’”

Ti panangmatmat kadagiti paglintegan dagiti dadduma a managdaydayaw ni Satanas ipalgakna met a patienda a ni Adolf Hitler maikari iti panagdayaw. Kinapudnona, kinuna ti maysa a mannurat: “Matmatanda ti panangdadael nga inaramid ni Hitler a kas ti panagsagana laeng iti umayto​—ket kayatda ti makipaset iti dayta dakkel nga okasion.”

Ania ti rason iti likudan ti pannakaitan-ok ni Hitler? Inlawlawag ti reporter nga imbestigador a ni Maury Terry a ti maysa a rason “ket maysa a panangnumero iti tiempo a ti tunggal letra iti alpabeto ket natudingan iti maysa a numero. Iti sidong daytoy a sistema, ti A katupagna ti 100 ken ti Z katupagna ti 125. Dagiti numero a katupag dagiti letra iti maudi a nagan ni Hitler (107, 108, 119, 111, 104, 117) no pagtitiponen ket 666​—ti bilang di dakkel nga animal iti libro ti Biblia nga Apocalipsis. Ti bilang ti diablo.”

Daytoy ti tumulong a mangilawlawag iti nasaknap a pannakausar ti bilang a 666, a naipinta kadagiti diding dagiti paggigimongan ti grupo wenno kadagiti diding ken rangtay iti publiko. Dagiti letra nga HT ken HH ket makuna a kaipapananna ti Hitler, ket ti galón ti Aleman nga SS ket makuna nga isimbolona ti “bileg ti langit nga agturong iti impierno.” Inusar met dagiti Satanista ti swastika. “Dagitoy amin ket tanda ti animal, ni Satanas-Hitler, isu a pagserserbianda,” kinuna ti maysa a kaduada.

Gimgimong a Mangyeg iti Kinaranggas

Addada makuna a nasurok a 20 a naisangsangayan nga okasion iti gimgimong ti grupo bayat iti tawen. Adu ti nairana kadagiti makunkuna a Kristiano a selebrasion. Daytoy ket panangsalimetmet iti matmatanda a kas pamay-an ti panangaramid a saan a sagrado kadagiti amin a maibilang a naimbag wenno nasantuan. Ti vispera de Todos los Santos (halloween) ket maysa a kangrunaan a sataniko a piesta. Dagiti gimgimong, wenno sabbats (panaginana), ket maaramid kadagiti nalimed a luglugar, a mabalin nga agbaliw sigun kadagiti kasasaad. “Sakbay ti panaggigimong ti grupo,” insurat ni Terry, “masapul a maay-ayo ni Satanas babaen ti panangrames ti maysa a birhen [agtutubo a babai], ti holocaust [pananguram], wenno ti ritual a panangpapatay ti maysa a tao wenno animal.”

Napateg ti panangidaton kadagiti aso ken pusa iti kulto. Iti maysa a lugar iti asideg ti siudad ti Nueva York, kas pangarigan, 85 a nalalat a German shepherds ken Dobermans ti nasarakan iti uneg ti 12 a bulan, a maipagarup nga amin dagitoy ket aramid dagiti Satanista. Masansan, ikkatenda ken sidaenda dagiti paspaset ti bagi ti animal gapu iti panamati a dagitoy ikutanda dagiti mahikal a pannakabalin. Maipasa ken mainum ti dara manipud kadagiti pirak a kopa a tinakaw kadagiti simsimbaan​—amin dagitoy ket paset iti panagdayaw ken Satanas. Siempre, ti daton a tao ket maibilang a natan-ok a daton isu nga ad-adda a mangay-ayo kenkuana. Ket masansan nga isut’ maay-ayo iti kastoy a pamay-an.

Ngem siasino daytoy a Satanas? Pudno kadi nga adda? Wenno isut’ maysa laeng nga ar-arapaap ti kapanunotan?

[Kahon/Ladawan iti panid 7]

Panangidaton Tapno Penneken ti Diablo

Idi napalabas nga Abril nakigtot ti lubong babaen iti pannakasarak kadagiti bangkay dagiti nasurok a sangadosena a lallaki a napapatay a naidaton iti ruar iti siudad ti Mexico a Matamoros, iti asideg ti beddeng ti Texas. Impadamag ti magasin a Time:

“Tapno agbalinda a makaay-ayo iti diablo, dagiti manangpapatay inangerda dagiti utek ken puspuso dagiti biktima, nga inlaokda iti inumen dagiti tultulang ti saka ken takkiag ken dagiti ulo ti animal. Nakarungrungsot dagiti managdayaw iti diablo ta binusbos ti dua a patologo . . . iti ngangngani uppat nga aldaw a mangturpos kadagiti autopsia.”

Patien dagiti managdayaw iti Diablo a makaawatdanto iti pannalaknib manipud iti diosda babaen ti panangpennekda kenkuana kadagiti natauan a datdaton. Maysa a teniente ti polis ti nagkuna a dagiti manangpapatay nagkararagda iti diablo “tapno ti polis ket saan a mangaresto kadakuada, tapno saan a papatayen ida dagiti bala ket makasapulda iti ad-adu pay a kuarta.”