Ni Satanas Adda iti Likudan ti Pananglimo

ITATTA, aw-awatenen ni Satanas ti sangalubongan nga atension. Nagadun dagiti naisurat kadagiti diario, magasin, ken dagiti tracts ti relihion maipapan kenkuana. Dagiti programa ti radio ken telebision ket naipamaysada iti relihion a mangaw-awit iti naganna.

Ti sao a “Satanas,” a naisurat iti sango ken likudan, ket makita kadagiti tugtugaw publiko, maipinta kadagiti rangtay ken diding dagiti napanawanen a patpatakder ken kadagiti sango dagiti titiendaan, ken maipinta kadagiti sarming a tawtawa. Ti pannakaawis ken ti sumaruno a pannakasilo dagiti tattao, nangnangruna dagiti agtutubo, iti relihion nga agaw-awit iti nagan a Satanas ket nagbalinen a nakaskasdaaw a pasamak.

Nupay kasta, nupay nasaknap ti pannakaipablaakna, adda nagduduma a kapanunotan maipapan iti no siasino, wenno ania, a pudpudno ni Satanas. Kadagiti adu, agraman dagiti debotado a paspasurotna, naabbungotan ni Satanas iti di pannakailasin. “Iturongna ti aramid,” kinuna ti maysa a propesor iti relihion, “manipud kadagiti amin a tattao a mamati iti literal a persona nga isu ni Satanas agingga kadagidiay a mamati a daytoy ket simboliko a mangiladawan a sao ket basta didan ikankano ti kapanunotan.”

Idi ti sabali a propesor iti relihion idiay seminario ti teolohia a Baptist inladawanna ni Satanas a kas ‘adipen ti Dios,’ imbes a kangrunaan a kabusorna, dayta ti nangtignay iti relihiuso a pungtot. Adu nga awag ti telepono ken sursurat iti managpablaak a kompania ti iglesia ti nagprotesta iti daytoy a panangipatarus. “No ni Satanas ket awaten a kas adipen ti Dios,” kinuna ti maysa a konserbatibo a ministro a Baptist, “ngarud daytat’ mamagbalin iti Dios a kabusortayo.” Nupay kasta, ti sabali pay a ministro a Baptist ken propesor iti relihion simmungbatda babaen iti kapaliiwan a dagiti board members iti Baptist “saanda a nakapagsaludsod tapno makita no ania ti opisial a sasaaden ti Baptist” maipapan ken Satanas.

Kinapudnona, dagiti miembro dagiti adu nga ig-iglesia dida ammo ti pudno nga isursuro ti relihionda maipapan ken Satanas. Maysa a mannurat iti diario ti nakapaliiw: “Sumagmamano nga ig-iglesia ti addaan iti doktrina a mangibaga no ania ti masapul a patienda maipapan ken Satanas, gapuna ti tema agbalin a personal unay.” Dadduma ti mangisuro pay a ti Diablo basta irepresentarna iti dakes nga adda kadatayo. Kas pangarigan, kunaen ti Presbiteriano a ministro a ni A. D. Ellison a nasulisog ni Jesus idiay let-ang, saan a babaen iti maysa a sobrenatural a sataniko a parsua, no di ket babaen iti panangipangpangrunana iti bagina met laeng.

Di ngarud pagduaduaan a dagiti miembro iti iglesia agduaduada no maipapan iti kinaisu ni Satanas, yantangay agduadua met dagiti papanguloda iti relihion.

No Siasino Isuna

Ti Kasuratan, nupay kasta, ket nakalawlawag ken napudno maipapan iti no siasino ni Satanas. Pinarsua ti mannakabalin-amin a Dios dagiti adu nga espiritu a parparsua a makaadani kenkuana kadagiti langlangit ken isudat’ ad-adipenna. Ipalgak ti Biblia nga idi inkabil ti Dios ti “pamuon ti daga,” a pinarsuana dayta a maipaay a masanguanan a pagtaengan ti tao, “amin dagiti annak ti Dios [dagiti angheliko nga espiritu a parparsua] dimmir-ida gapu iti rag-o.” (Job 38:4, 7) Kabayatanna, maysa kadagitoy nga anghel ti bimmusor iti Namarsuana, a nagbalin a managalsa, maysa a bumusbusor.

Daytoy dati a bumusbusor, wenno Satanas (a kaipapananna “Manangsuppiat”), isu ti nangusar iti maysa nga uleg kas pannakangiwat idi nakisarita ken ni Eva tapno allukoyenna nga agsalungasing iti Dios. (Genesis 3:1-6) Dayta ti makagapu no apay nga isu ket naawagan met “ti kadaanan nga uleg.” (Apocalipsis 12:9) Ni Jesus a mismo kinunana ken ni Satanas: “Isu ti nakapapatay nanipud idi damo, ket saan a nagtalinaed iti pudno, ta awan ti pudno kenkuana.” (Juan 8:44; 1 Juan 3:8) Gapuna inlasin ni Jesus ni Satanas a kas daydiay a nangtagiragsak idi iti anamong ti Dios ngem immalsa a maibusor ken Jehova a Dios.

Nupay no kunaen dagiti dadduma a ti Diablo ket basta maysa laeng a di makita a prinsipio iti dakes, dagiti kualidad ken tigtignay a naipabiang ken ni Satanas idiay Biblia ket maipabiang laeng iti maysa a persona. Kinapudnona, ipakita ti Biblia a ni Satanas ket maysa a pudno a persona, a di makita nga espiritua a persona a ti napinget a panggepna isu ti panangiyadayona iti sangatauan iti panagserbi iti Namarsua, ni Jehova a Dios. Idi sinulisog ni Satanas ni Jesus idiay let-ang, saan a mabalin a nasulisog ni Jesus babaen iti maysa laeng a kasasaad ti kinadakes wenno iti ‘panangipangpangrunana iti bagina met laeng.’ Ta ti dakes, wenno ti kinaagum, saan nga agtaeng ken Jesus, yantangay nalawag ti panangibaga ti Biblia a ni Jesus “awan basolna, di natulawan, adayo kadagiti managbasol.”​—Hebreo 7:26; Lucas 4:1-13.

Panangsapul iti Pannakabalin

Immalsa ni Satanas a maibusor iti Dios gapu iti panangsapulna iti pannakabalin, gapu iti tarigagayna a mangituray kadagiti dadduma, tapno agbalin a diosda, tapno agbalin a madaydayaw. (2 Corinto 4:4) Kada Adan ken ni Eva intukonna ti pannakabalin ken ti wayawaya​—ti “panagbalin a kasla iti Dios” iti panangaramidda kadagiti pangngeddengda no ania ti naimbag ken dakes, ti umiso ken di umiso. (Genesis 3:5) Ti pannakabalin ken wayawaya isu pay laeng ti ituktukon ni Satanas kadagiti managdaydayawna.

Gapuna, maysa a tin-edyer a Satanista a managan Sean, a kalkalpasna pay laeng a pinapatay kadagiti dadakkelna ken ti maikatlo a biktima, ti nagsurat: “Siwayawayaakon. Mabalinkon ti mangpapatay a dinak riribuken ti konsiensiak.” Iti sabali a tiempo isut’ nagsurat babaen iti darana met laeng: “Idiankon ti Dios, idiankon ni Kristo, agserbiakto laeng ken Satanas . . . Idayawyo ni Satanas.”

Inlawlawag ni Randy Shores, maysa a tin-edyer ken dati a miembro iti sataniko a kulto: “Natan-ok ngarud idi, ta addaanka amin iti dayta a pannakabalin.” Impaganetget ni Shores a dayta a ‘pannakabalin isu ti pangawis, ti pannakabalin nga agtaud iti grupo a mangsalaknib kenka, manipud kadagiti ritual ken panangkulam a maaramid tapno mangdangran iti maysa a tao, ken manipud iti kinalimed.’

Wen, adda ti pammati kadagiti adu a managdaydayaw ni Satanas nga isunto ti mangipaay iti pannakabalin kadagidiay a sumurot kadagiti sursurona. Ket ti pannakaawat dagiti dadduma a managdaydayaw ni Satanas ket daytoy kaipapananna ti pannakabalin a mangpapatay nga awan ti pannakadusa. Ti naipablaak a panangpapatay dagiti managdaydayaw ni Satanas ipalgakna a pudno a patienda a babaen iti panangpapatay makaay-ayodanto iti Diablo. Gapuna masapul nga awaten a sisiserioso ti kumarkaro a peggad iti sataniko a panagdayaw.

Dikay Maallilaw

Laglagipenyo, pudno ni Satanas. Isut’ saan laeng a maysa nga arapaap ti kapanunotan. Ti kadadakkelan a pagragsakanna isu ti pannakalais ti Dios ken ti Saona, ti Biblia, ken ti panangsilona kadagiti adu tapno iturongna ida iti pannakadadael. Ngem rinugianen ti Dios ti agtignay a maibusor ken ni Satanas, a pinalubosanna ti pannakaikkatna manipud langit a naipamaysa laengen iti daga. Awan duadua a ti pannakaipamaysana ditoy daga ket maysa a makagapu iti nabiit pay a pannakaisubli iti Satanismo.​—Apocalipsis 12:7-12.

Dagiti nagannak masapul nga atentiboda. Kadagiti adu a kaso no dagiti ubbing inawatdan ti Satanismo, ti makagapu ket dagiti nagannak saanda nga impaay ti ayat ken atension a kasapulanda. Kagura dagiti annak ti kasla pannakabaybay-a ket nalakada laeng a biktima dagiti sataniko a manangallukoy.

Siraragsak, nupay kasta, asidegen ti panungpalan ni Satanas ken ti impluensiana. Din agbayag isu ken dagiti paspasurotna sagabaendanton ti pannakaabak ken ti naan-anay a pannakadadael. Ti naindaklan a Dios, ni Jehova, isu a sitatangsit a tinabbaawan ni Satanas ken dagiti demoniona, usarennanton ti Mannakigubat nga Arina, ni Jesu-Kristo, a mangipatingga kadagitoy amin a nadangkes a persona. (1 Juan 3:8; Apocalipsis 20:1-3, 10) Kabayatanna, mabalin a maysakayto kadagidiay a mangsuppiat ken Satanas ket makasarak iti pannalaknib iti naayat a panagkakabsat kadagiti organisado a managdaydayaw ti pudno a Dios, ni Jehova.

[Kahon iti panid 9]

Gubuayan ti Pudno a Salaknib

Iti maysa a surat iti The Times Herald Record iti Middletown, Nueva York, maysa a lalaki ti nangdeskribir no kasano nga isut’ nairaman iti panangsapul iti pannakabalin ti okulto. Isut’ nagargari babaen kadagiti sursurat iti dua a psychotherapist isu a nangurnong kadagiti pamay-an iti pananggun-od kadagitoy a pannakabalin. “Sigagagar a sinurotko ti pamay-an,” inlawlawagna, “ngem nagsagabaak iti dayta babaen iti rinabii a pannakariribuk.

“Nagasat ta,” intuloyna, “dua [a] Saksi [ni] Jehova ti nangbalakad kaniak, malaksid kadagiti dadduma pay a banag, nga agkararagak ken Jehova ket rinabii nga inaramidko daytoy no mangrugin a mariribukak kadagiti karkarna a rikrikna.” Ania dagiti resulta?

“Iti maudi a rabii ti pannakariribuk,” kinunana, “aniaman a mangik-ikut kaniak inibbatannakon . . . Kalpasan dayta a tiempo, awanen dagiti dakes a kapkapadasak.” Naammuan daytoy a tao, idi nagsurat iti pagiwarnak, a “kondenaren ti Dios dagiti makipaset iti ar-aramid ti okulto (Deuteronomio 18:10-13).”​—Pebrero 27, 1988.

Kuna ti kasuratan De 18:10-13 nga adda iti ngato: “Awanto ti masarakan kenka . . . maysa a mangaramat iti panagpadpadles, maysa a mammuyon, wenno maysa a manangsalamangka, wenno managanito, wenno maysa a manangilabeg, wenno mannakiuman kadagiti mangkukulam, wenno maysa nga asuang, wenno maysa nga adda karkaradingna. Ta siasinoman a mangaramid kadagitoy isu ti makarimon ken Jehova.”

Kahon iti panid [10]

Nagannak, Siputanyo dagiti Pagilasinan

Gapu iti pangawis ti panagdayaw iti Diablo kadagiti agtutubo, masapul nga agalerto dagiti nagannak kadagiti pagilasinan a mabalin a mairaman dagiti annakda. Maysa nga autoridad maipapan kadagiti kulto ni Satanas, ni Evon Peterson, namalakad:

“Dagitoy (dagiti agtutubo) kasapulanda ti maysa a mamati kadakuada. . . . Dawdawatenda ti maysa a mangasikaso kadakuada . . . umimdeng kadakuada. Dagiti kulto nakasaysayaatda a managimdeng. No awan sadiay dagiti nagannak, adda sadiay dagiti managkulto.”

Ni Angelo Pierri, maysa a manangbalakad idiay New Jersey, namakdaar: “Ammok a kunkunayo laeng, ‘daytat’ basta uso laeng,’ ngem apag-isu a dayta ti kayat dagiti satanista a pagarupenyo. Dida kayat ti maibutaktak. Dida kayat a malawlawagan dagiti ar-aramidda.”

Nangnangruna a nasken a paliiwen dagiti musika a dengdenggen dagiti agtutubo. Adu kadagiti heavy metal rock music ti napnapno kadagiti sataniko a mensahe ken simbolismo. “Aglablabes ti kinadakesna,” kuna ni Peterson, “nga addaan kadagiti mensahe a mangpapatay ken mangdangran. Paregtaenna ti pannakasapul ti agtutubo nga agtignay a buyogen iti kinaranggas.”

Idi napan a tawen maysa a 14-años nga agtutubo a taga New Jersey ti nangbagsol iti inana agingga a natay ket kalpasanna pinatayna ti bagina met laeng. Dagiti poster iti heavy metal rock music ti nangsaknap iti diding ti kuartona. Nagpakaasi ti ama ti ubing a lalaki kalpasanna: “Ibagayo kadagiti nagannak a siputanda ti im-imdengan dagiti annakda a musika.” Imbagana nga iti intero a lawas sakbay ti panangpapatay, ti anakna a lalaki nagkanta iti kanta a rock “maipapan iti dara ken panangpapatay iti inam.”

Kinapudnona, makapapatay ti Satanismo, kumarkaro a peggad. Ti umuna nga addang iti pananglapped iti dayta isut’ pannakaadda iti pannakaammo. Kalpasanna sanguen dayta. Wen, umiso ti Biblia no kunaenna nga addaantayo ti pannakidangadang ‘a maibusor kadagiti dakes nga espiritu a puersa.’ (Efeso 6:12) Pudno nga adda ni Satanas ken dagiti demoniona, ket isuda ti adda iti likudan dagitoy amin a dinidiablo nga ar-aramid.