Manipud Managbasatayo
Mangilaklako ken Patay Pudno a maysa a kinamauyong ti mangipaay iti maysa a trilion a doliar iti tinawen para iti armas, bayat a baybay-an ti 14 milion nga ubbing a matay manipud kadagiti epekto iti bisin! (Hunio 8, 1989) Ti Agriingkayo! ket mangar-aramid iti nagsayaatan a trabaho babaen ti panangibutaktakna iti nagdakkelan a krimen dagiti managlako iti armas, bayat ti panangipakitana no kasano a mabiiten nga iyeg ti Namarsua ti maysa a baro a lubong a sadiay agturayto ti talna ken ti kinatalged.
C. G. P., Pederal a Republika ti Alemania
Natalged a Taraon Binasak a buyogen ti panaginteres ti artikulo a “Pagbalinenyo a Nadalus ti Pannanganyo” iti Hunio 22, 1989, nga Agriingkayo! Ngangngani makatawenen ket kagudua, nagbiahekami a napan iti ganggannaet a daga. Nasdaawak a makaammo nga ugasanda dagiti pinggan babaen iti napudot, addaan sabon a danum ngem saanda a balnawan dagitoy sakbay ti panangpamagada kadagiti pinggan. Yantangay ti artikuloyo dina dinakamat ti panangbalnaw, daytoy kadi kaipapananna a pagarupenyo a daytoy saanen a nasken?
S. B., Estados Unidos
Ti panangbalnaw kadagiti addaan sabon a pinggan ket maysa a napateg nga addang iti panagdalus, ket apresiarenmi ti panangdakamatmo iti dayta.—ED.
Makapasiddaaw no kasano a nagadu a tattao ti mangbaybay-a iti taraon iti sidong ti temperatura ti kuarto iti adu nga or-oras wenno saanda nga aramiden dagiti simple a bambanag a kas ti panangugas ti im-imada sakbay ti panagluto. Napanak iti hedkuarteryo idiay Nueva York, ket kankanayon a naawisak iti kasta unay a kinadalusda. Masapul ti panangtuladtayo amin iti dayta nga ulidan kadagiti pagtaengantayo.
M. B., Estados Unidos
Nakaskasdaaw a Pabuya ti Langit Iti nabiit pay, ti uppat tawenna nga anakko a babai sinaludsodannak no sadino ti paggapuan ti gurruod ken kimat. Nangipaayak laeng iti saan unay a maawatan a sungbat ngem diak mapennek ti kinausiusona. Nagturongak kadagiti libro ti siensia ngem nakitak a teknikal unay ti panangilawlawagna. Ti artikuloyo (Mayo 22, 1989) sinungbatanna dagiti saludsodko iti nalawag ken maawatan a pamay-an. Ket anian ti impresion nga impaay dagidiay a ladladawan iti anakko! Iti sumagmamano nga aldaw kalpasanna, ti estoriada sakbay a maturogda ket ‘gurruod ken kimat.’
P. G., Pederal a Republika ti Alemania
“Genetic Revolution” Agad-adalak iti horticulture (panangtaripato kadagiti mulmula) ket kalkalpasko pay laeng a nagun-odan ti sertipiko iti kinateknisian. Ti tema ti eksamenko ket “Genetic Manipulations.” Agaasenyo ti pannakasdaawko idi iti sumaganad nga aldaw nabasak iti artikuloyo (Hulio 22, 1989) ti maipapan iti dayta a tema. Ti impormasion nga impaayyo ket nalawag ken kabaruan.
A. L., France
Tabako Inlawlawagyo dagiti peggad iti panagsigarilio iti nakalawlawag a pamay-an. (Hulio 8, 1989) Maysaak a managsigarilio, ket awan ti masarakak a saan a nasayaat maipapan iti ugali. Ania ti dakes iti panagsigarilio iti responsable a pamay-an? Kas insurat ni apostol Pablo, ‘kayatko nga aramiden ti maysa a banag ngem diak maisardeng ti sabali.’ Ti basta panangitudo iti Kasuratan maipapan itoy a parikut ket, patiek, saan nga umdas.
S. S., Pederal a Republika iti Alemania
Dagiti medikal a panagsirarak nalawag nga ipakitada nga awan ti “responsable” a pamay-an iti panagsigarilio. Ket pudno a ti ugali ket makapasimron kadagiti saan nga agsigsigarilio a mapilit a manglang-ab iti makadangran iti salun-at nga asuk. Ngarud ti artikulo agpadpada nga impaayna ti Nainkasuratan a panangmatmat iti banag ken ti napudno, praktikal nga addang a mangtulong kadagiti managsigarilio a mangparmek iti pannakaadikto iti nikotina. No awatentayo iti konteksto, dagiti sasao ni apostol Pablo a natukoy iti ngato ipakitana a babaen iti tulong ti Dios, ti maysa mabalin a ‘maagaw’ manipud iti panagbasol. (Roma 7:21-25)—ED.
Dagiti Parke Nasional Pudno a tinagiragsakko ti nangbasa iti artikulo a “No Kasanoyo a Tagiragsaken dagiti Nasional a Parkeyo.” (Hunio 22, 1989) Apresiarekon a dagiti dalan kadagiti nasional a parke ket maipaay iti talgedtayo. Dumtengto ti aldaw, a mabalintayonton ti mapan iti sadinoman a saan nga agbuteng agsipud ta ti Naindaklan a Namarsuatayo inkarina a pagbalinen ti daga a natalged ken napintas a paraiso.
M. L., Estados Unidos