Manipud Managbasatayo

Naisangsangayan a Kasapulan Pagyamanan iti artikulo maipapan iti panangtulong kadagidiay addaan iti naisangsangayan a kasapulan. (Agosto 22, 1989) Addaanak iti nakaro a makapilay a sakit a mangapektar kadagiti piskelko, susuopko, ken dagiti organok. Kas banagna, naaddaanak kadagiti adu nga operasion ket kasapulan a mangusarak kadagiti wheelchair, katulongan iti pannagna, baston, ken dagiti pangpatibker (braces) a nadumaduma a kita. Agsipud ta 25 añosak laeng, makangngegak kadagiti adu a komento, direkta ken saan, a pudno a makapasakit. Nupay no dadduma a tattao ti basta nausiuso laeng, dadduma ti nauyong ken awan ti panangikankanoda. Dayta nga artikulo ti tumulong saan laeng a kadagiti addaan lapped no di ket kadagidiay a nabendisionan iti kinasalun-at; dagitoy masursuroda ti agbalin nga ad-adda a mannakaawat.

D. H., Estados Unidos

Panangidanondanon Agarup makatawenen iti napalabas, nagbalinak a biktima iti makadangran a panangidanondanon. Makarurodak ken nasaktanak idi damo, ngem ni tatangko ken siak tinontonmi ti saosao ket pinasardengmi iti dayta met laeng nga aldaw. Ti artikulo a (Hulio 22, 1989) ti nangtulong kaniak a nanglipat iti daytoy nga interamente a kinaulbod.

P. M., Estados Unidos

Maysaak a 17 años, ket dadduma a tattao ti nagidanondanon maipapan kaniak. Maysa a rabii nakitak ti maysa kadakuada, ket diak ammo ti aramidek. Idi nakaawidakon, nabasak ti artikulo maipapan iti panangidanondanon. Nagyamanak ken Jehova manipud iti puso iti panangsungbatna kadagiti karkararagko. Nasursurok ti makilangen kadagita a tattao ket nakitak a saanak koma nga agbalin a serioso unay. Ta kalpasanna, saanak met nga importante unay a pagsasaritaandak iti natda pay a panagbiagko, ket ti napatpateg pay, dagiti pudno a gagayyemko ken ni Jehova ammoda a ti isaksaknapda ket saan a pudno. Pagyamanan iti pannakaammoyo kadagiti kasapulan dagiti agtutubo!

L. U., Brazil

Shark Bionics Binasak a buyogen ti interes ti artikulo maipapan iti artipisial a kudil ti pating. (“Panangmatmat iti Lubong,” Agosto 8, 1989) Naiyimpleoak iti maysa a kompania nga agtartrabaho iti daytoy met laeng a proyekto iti sumagmamanon a tawen. Dagiti artikulo ti Agriingkayo! kas iti daytoy a nangisalaysay iti nakaskasdaaw a naaramid a disenio a masarakan iti naturalesa ti nangted kaniak iti adu a gundaway a mangisarita kadagiti dadduma maipapan iti Namarsuatayo.

M. H., Estados Unidos

Panagtabbaaw Nabiit pay nagsuratak kadakayo maipapan iti parikut a panagtabbaaw kadagiti agtutubo. Iti dakkel a pakasdaawak, itatta laeng a naawatko ti Agosto 22, 1989, a bilang nga addaan ti artikulo nga “Aniat’ Dakes iti Sagpaminsan a Panangilunod?” Ammok a daytoy nga artikulo ket naisaganan mabayag pay sakbay ti panagsuratko, ket makaparegta ken makapabileg pammati ti makapadas a personal a ti kararagko maipaay iti tulong ket nasungbatan babaen kadagiti publikasionyo.

J. A., Estados Unidos

Natalged a Taraon Nagserbiak kas manangaywan a ministro dagiti saksi ni Jehova, a kinuykuyognak ti asawak. Dikam kayat a padagsenan ti dagosmi kadagiti nakaad-adu a paglintegan maipapan iti panangaywan iti taraon, gapuna naisarangkami kadagiti adu a parparikut iti bagis. Mapanunotmi no kasano a makatulong a naimbag daytoy nga artikulo (Hunio 22, 1989) kadakami! Pudno a kayatmi ti agyaman kadakayo iti panangpanunotyo iti isuamin a naimbag maipaay iti ili ti Dios.

R. P., Venezuela

Mailaklako ni Patay Isuamin a naisurat iti artikuloyo (Hulio 8, 1989) ket napno ti impormasion ken pudno. Ammok agsipud ta agsigarilioak iti nasuroken a sangapulo a tawen. Ti resulta: pannakabannog, panaglin-et, ken di nasayaat a rikna no diak agtabako. Inkeddengko nga isardeng ti agsigarilio, ngem ti pangngeddengko nga agbalbaliw nagpaut laeng iti dua a bulan. Kamaudiananna, nakipagadalak kadagiti Saksi ni Jehova ket nasursurok nga iyaplikar ti balakad ti Biblia idiay 2 Corinto 7:1, ket kamaudiananna simmardengakon. Iti mabiiten inanamaek ti mabautisaran kas maysa a Saksi.

A. P., España