Panangmatmat iti Lubong
NALIPATANEN A BIKTIMA
Dagiti lallaki a ti assawada, wenno dagiti nobiada, ket narames ket naawagan nalipatanen a biktima. Sigun iti sikiatrista iti London a ni Anthony Bateman, dagitoy a lallaki agsagabada iti nakaro a parparikut—kas iti panagliday, pannakabasol, ken ti pakarigatan iti sekso—nga agpaut pay kalpasan ti krimen. Mabalin nga agbalinda a nalabes ti panangsalaknibna, a kuykuyogenda ti biktima iti sadinoman wenno kalikagumanna nga isut’ ‘agreport’ kadagiti naikeddeng a tiempo. Naipadamag a kunkunaen ni Dr. Bateman a dagita a lallaki mabalin a kasapulanda ti kasta unay a psychotherapy wenno pannakaagas ti isip tapno maawatanda ket bigbigenda ti napasamak.
CONDOS PARA KADAGITI KABALIO
Idiay makin-abagatan a laud a Vancouver, Canada, dagiti henete matuktukonanda kadagiti condominium a pangiyaponan kadagiti kabkabalioda. Ti maysa a kabalio nga addaan iti pribado a condo mabalin a tagiragsakenna ti 11 metros kuadrado a pakaiyaponan nga addaan iti naisiguden a tubo nga automatiko a mangpunno iti paginuman, a naatepan iti tisa a naaramid iti cedro ken nadidingan iti kayo, ken mabalin a makapan iti terasa. Dagiti agpangpangato a presio iti daga ken ti nangato a buis ti nangtignay iti daytoy a proyekto a condos para kadagiti kabalio. Ti presiona a $26,000 (Canadian) ket mabalin a makaawis kadagiti dadduma nga agbayad iti “$300 iti maysa a bulan wenno ad-adu pay tapno iyapon dagiti kabalioda kadagiti komersial a pagiyaponan kadagiti nabaknang a luglugar iti Umabagatan,” kuna ti The Sunday Star.
MABOMBA ITI KINARANGGAS
Ti Assosasion dagiti Mannursuro idiay Alemania parparegtaenna dagiti nagannak ken dagiti mannursuro a mangsumbra iti pannakaisarang dagiti ubbing iti kinaranggas a maipakpakita iti pagiwarnak. “Ti nakaam-amak a pannakaidayaw ti Satanismo, droga, ipapatay, ken ti kinaranggas” kadagiti musika a hard rock ken kadagiti videos ti mamagbalin kadagiti bumarito/bumalasitang nga awan ti panangikankanoda iti kinaranggas ket madadaelda iti emosional, kuna ti presidente iti asosasion. Dagiti mannursuro ken nagannak kasla nagbassitan ti ammoda maipapan kadagiti linaon dagiti videos ken ti musika a hard rock. Naipadamag a maysa iti tunggal dua nga agtutubo ti agbuya iti kasta unay kadagiti video a horror. Dagiti agtutubo ibilangda dagiti pelikula a nasayaat wenno nakasaysayaat.
DAGITI CURFEW A MAMAGSARDENG ITI KRIMEN
Tapno mapagtalinaed dagiti agtutubo iti uneg ti balay kalpasan ti alas 11 iti rabii, maysa a probinsia idiay Queensland, Australia, ti nangipasdek iti di-pormal a curfew. Nagsayaat dagiti resulta. Dagiti polis ken dagiti lokal a miembro ti konsilio ipadamagda ti pannakakissay ti krimen iti lugar. Kas banagna, ti gobierno ti Queensland sapsapulennan ti pananganamong ti Gabinete iti pangpadasan a curfew a maipataw kadagiti amin nga agtutubo a nababbaba ngem 15-años. Ti plano ket agpaay kadagiti dua a pangpadasan a curfew a maaywanan, maysa iti siudad ken ti sabali iti maysa a probinsia. No nasayaat ti resulta dagiti pangpadasan a curfew iti panangpabassitda iti kaadu ti krimen, ngarud ti gobierno makalikagumanton a mangusig iti panangipaulog iti linteg a mangipaalagad kadagiti curfews kadagiti amin nga agtutubo iti isuamin nga estado.
PANNAKADANGRAN TI DORI GAPU ITI RUGBY
Iti nabiit pay a 23-años, maysa nga ospital ti nangtaming kadagiti 88 a kaso dagiti agtutubo a nadangran iti kasta unay bayat ti panagay-ayamda iti Rugby football. No dadduma adda pannakadangran gapu iti flying tackle wenno pannakaiduron ti managay-ayam, nupay gagangay a daytoy ket saan unay a napigsa a kas ti tackle ti football nga Americano. Ti sabali pay a peggad isu ti scrum, kayatna a sawen, no dagiti agsalsalisal a grupo nakaro ti panagiinnagawda, ken panagiwalinda tapno maikutanda ti bola. “Masansan a mapasamak ti buya,” kuna ti South African Medical Journal. “Masinasina ti scrum ket, bayat ti ibabangon dagiti managay-ayam, maysa a managay-ayam ti nakaidda a di agkutkuti. Dagiti kameng iti first-aid agdardarasda iti tay-ak ket siaannad nga ikabilda ti nadangran a managay-ayam iti stretcher ket ipanda iti maysa nga ospital. Natukkol ti tengngedna, nadangran ti dorina ket agtalinaden a quadriplegic iti agnanayon.” Idi 1989 tallo a taga Sud Africa nga ages-eskuela nga ubbing a lallaki ti natay bayat ti panagay-ayamda iti Rugby.
NAKANGINGNGINA A PANNAKATAKTAK
Ti pannakataktak iti eroplano idiay Europa ket napattapatta a paggastuan ti kompania ti eroplano ken dagiti pasaherosda iti nakangatngato a $4 bilion iti tinawen, sigun iti maysa a damag manipud German Airspace Users Association. Ti rason kadagiti parikut, kuna ti report, isu ti di umiso a panangusar kadagiti espasio iti law-ang. Ti Europa addaan kadagiti 44 a sentro a mangtengtengngel iti trapiko iti tangatang, no idilig iti 20 iti intero nga Estados Unidos. Ti pannakapataud iti nagkaykaysa a sistema iti pannakatengngel ti trapiko iti tangatang para iti intero nga Europa ket mabalin nga aggatad iti $5 bilion ken $10 bilion, ngem ti kasta a puonan mabalin nga ikkatenna a naan-anay ti amin nga agdama a pannakataktak iti panangtengngel ti trapiko iti tangatang, kuna ti Financial Times iti London. Ti agdama a kinakurang ti panagtutunos agbanag iti pannakaited iti eroplano ti di nasayaat a kangato a pagtayaban ken pagnaan, isu a mamagbalin iti gagangay nga Europeo a panagtayab a 10 porsiento nga at-atiddog ngem ti kawatiwatna koma.
PANANGABAK KEN PANNAKAABAK
Iti sidong ti paulo a “Mabalin a Makapapatay ti Kaadda ti Gasat,” ti pagiwarnak iti Brazil nga O Estado de São Paulo impadamagna ti nakalkaldaang a kapadasan ti nabiit pay a nangabak iti loteria. Kas ti agmaymaysa a nangabak iti loteria, isut’ nakaawat iti 930,000 Novos Cruzados (agarup $400,000, E.U.). Kalpasanna, nupay kasta, ti lalaki nakaawat met iti nakalkaldaang a damag a tallo kadagiti kakabagianna ti pinapatay dagiti mannanakaw a mangsapsapul iti dadduma a kuarta a premio iti loteria.
MAILAKLAKO A PANAGKASAR
Dagiti turista nga agbiahe a mapan idiay Europa matukonanda ti interamente a panagpasiar a mangiraman iti panagkasar iti simbaan a Katoliko. Nupay adda panagkedked manipud iti Vaticano a maibusor iti “panangikomersio iti nasantuan a seremonia ti panagasawa,” umad-adu dagiti saan a Katoliko nga agasawa a Hapones nga “agkasar kadagiti simsimbaan idiay Italia ken Francia,” kuna ti The Daily Yomiuri. Naupay ti Vaticano gapu ta dagiti papadida nabilinda a mangkasar laeng kadagiti Romano Katoliko wenno dagidiay a nakaawaten iti pannursuro ti pammati a Katoliko. Dagiti ahensia ti panagbiahe a Hapones, nupay kasta, naliklikanda ti pagalagadan ti simbaan babaen iti panangpilida kadagiti “saan unay a naistrikto a simsimbaan a mangaramid kadagita a kasar.”
NAANDOR A DUDON
Idi napan a tawen, idi ti sangagasut a milion nga umakar a dudon rinautda dagiti isla ti Caribbean, Guyana, ken Venezuela, daytat’ nangibangon ti saludsod kadagiti espesialista: “Kasano a makaballasiw a sibaballigi dagiti dudon iti Baybay Atlantico?” Dagitoy nga insekto saan idi nga ammo kadagita a paspaset iti lubong. Daytoy nga uppat- agingga iti innem-aldaw a panagbiahe, iti kaawatiwat a manipud 4,000 agingga iti 5,000 kilometros, ket pudno a naaramidan no usigen a dagiti umakar a dudon ket agtayabda laeng iti aldaw, a nalaklaka ti panagtayabda iti napudot nga angin. Agdissoda no nalamiisen ti angin iti naladawen a malem. Sigun iti Pranses a pagiwarnak a Le Monde, dagiti managsirarak agkonklusionda a dagiti dudon nalabit agtalinaedda iti angin bayat ti panagtayabda a bumallasiw iti atlantico, ta awan ti pagdissuanda ken awan ti kanenda. Maysa a banag, nupay kasta, a siguradoda ket, ad-adu nga insekto ti mapukaw iti baybay ngem ti makalasat iti ibaballasiw iti baybay.
“NAKARKARO A MAMMAPATAY NGEM TI AIDS”
Kalpasan ti panangadal iti sakit ti dalem iti 15 a tawtawen, ti direktor iti panagsirarak iti klinika maipaay iti kangrunaan nga ospital idiay Australia ti nabiit pay a namakdaar a ti hepatitis ket “nakarkaro a mammapatay ngem ti AIDS.” Kinunana pay: “Napattapatta nga agarup dua milion a tattao iti tinawen ti matay manipud iti hepatitis ket iti pannakaammok ti AIDS di pay nakagteng iti dayta a kaadu.” Pagbalinenna nga alerto dagiti tattao iti makapapatay a virus ti hepatitis C, isu a mangraut iti dalem ken gapu iti dayta, awan pay ti pamay-an ti panangsubok, a nasarakan, a pakadlawan iti dayta. Dagiti managsirarak patienda a tunggal tawen iti nagbaetan ti 10 ken 15 a tattao ti matay idiay Australia manipud iti hepatitis C a naala manipud iti panangiyalison iti namulitan a dara. Ti pagiwarnak iti Sydney, a The Australian, ipadamagna a 1 iti 400 a supot iti dara a mausar iti panangiyalison idiay Australia ket namulitan iti makapapatay a hepatitis C.
EKSPERTO A PANGSUBOK ITI DANUM
“Ti kasayaatan a pamay-an a panangsubok iti danum isu ti panangipan iti dayta iti eksperto,” kuna ti adbertismen ti Water Authority idiay Wales. Ti eksperto a maibagbaga, nupay kasta, ket maysa nga ikan—ti nanumo a rainbow trout. Dagiti ikan gagangay a sensitiboda iti pannakamulit iti danum. Bayat ti panagangesda, dagiti asangda mangiruarda kadagiti nakapuy a koriente. Ti rugit singaenna ti panagangesda ken kasta met ti koriente. Dagitoy a panagbaba ti koriente mabalin a makita ken aywanan ti kompiuter. Maysa nga opisial iti Water Research Centre iti Britania kunaenna a ti trout “madlawna met ken mapakdaarannakayo kadagiti sustansia a dikay pulos ipagpagarup, isu a kangrunaan a pagimbagan.” Sigun iti The Times iti London, daytoy a pamay-an ti panangaywan aw-awisennan ti interes saan laeng a dagiti umili no di ket ti international a panaginteres.