Manipud Managbasatayo
Mailaklako ni Patay Agyamanak kadakayo iti daytoy a serie dagiti napnuan impormasion nga artikulo. (Hulio 8, 1989) Inapresiarko ti pamay-an ti panangipaayda kadagiti kinapudno maipapan iti panangdadael ti panagsigarilio iti bagi ken kasta met ti impormasion maipapan kadagiti dakes nga epektona. Patiek nga amin dagiti managsigarilio a mayat a mangisardeng iti dakes nga ugali masapul a manggun-odda iti kopia daytoy a magasin.
C. T. M., Estados Unidos
Wall Street Agyamanak iti kasta unay kadagiti napudno ken addaan pannakaawat nga artikulo maipapan iti Wall Street ken ti pannakarbek ti paglakuan iti aksíyon. (Agosto 8, 1989) Mangar-aramiden ti pinansial a lubong iti interamente a kampania tapno ipasigurado iti kaaduan iti publiko a ti pannakarbek ket ‘saan a napasamak,’ ket natalged manen ti tumapog iti danum. Ti intelihente a tao a makaawat no ania ti aramidenna ammona a ti lubong nakaro ti pinansial a parikutna. Paregtaek dagiti managbasa a liklikanda ti paglakuan iti aksíyon, bayadanda ti utang, ken agurnong ti kuarta imbes a gastuenda dayta.
B. W., Estados Unidos
Gapu iti saan a natalged nga ekonomia iti lubong, pudno a nasayaat ti agbalin a nasirib iti pinansial, ket ti risgo a nairaman iti panangipuonan kadagiti paglakuan iti aksíyon di mabalin a di ikankano. Nupay kasta, amin a panangipuonan—agraman dagiti deposito iti banko—makuna nga adda risgona. Ngarud dagiti indibidual masapul a mangaramidda iti personal a pangngeddeng no kasano kadakkel ti risgo a kayatda nga ibaklay. Dagiti artikulo a matuktukoy saanda a nairanta a giya iti panagipuonan wenno nangnangruna mangupay iti panagipuonan kadagiti paglakuan iti aksíyon. Dagitoy agserbida a mangipaganetget a ti kinabuklis isu ti ramut dagiti adu a pinansial nga ay-ay iti lubong ket ti gobierno ti Dios laeng ti solusion.—ED.
Maton iti Eskuelaan Kas agwaywayas a naganak nga addaan iti tin-edyer nga anak a lalaki nga aywanan, makasarakak ti adu a panangiwanwan, ken dagiti sungbat kadagiti adu a salsaludsod ken parparikut a sangsanguek, kadagiti artikulo ti “Agimtuod dagiti Agtutubo . . .” Ti kaudian maipapan kadagiti maton (Agosto 8, 1989) isu laeng ti kasapulan ti anakko. Daytat’ binasana iti namitlo a daras idi aldaw a pannakaawatna iti dayta.
V. B., Estados Unidos
Homoseksualidad “Ti artikulo maipapan iti homoseksualidad iti “Ti Panangmatmat ti Biblia” (Hulio 8, 1989) pinagpanunotnak maipapan iti panagbalin a homoseksual. Makitayo, nakidindinnaakon kadagiti lallaki nanipud pay idi agtawenak iti 12. Itan agedadakon iti 47. Nagparangak metten kadagiti adu a sine a pornograpiko. Ngem pagarupek a panawenen ti panagbiagko iti normal a panagbiag, ket rinugiakon ti makipagadal iti Biblia kadagiti Saksi ni Jehova. Agyamanak iti kasta unay iti nagsayaatan nga artikulo.
T. M., Estados Unidos
Pannakisarita Ti artikulo a “Kasano a Maparang-ayko ti Pannakisaritak?” (Mayo 22, 1989) ti nangawis iti atensionko. Marigatanak a makisarita ket kapadak dagiti dadduma nga agtutubo a nadakamat iti artikulo. Babaen iti tulong ni Jehova a Dios ken dagiti nasayaat a singasing nga intedyo, madlawkon ti adu a rinang-ayak iti daytoy a pamay-an. Patiek a rinibribo nga agtutubo ti makarikna iti panagyaman kadagiti naipaay nga artikulo iti “Agimtuod dagiti Agtutubo . . .”
M. C. M., Brazil
Panagliday Pagyamanan iti artikulo maipapan iti panagliday iti bilangyo nga Oktubre 22, 1987. Nabasakon iti namin-ano a daras ta dandani maikabisadokon. Nangipaaykayo iti nakaad-adu nga impormasion iti 15 a panid! Uray pay dagiti ladawan ket makaparegta. No dadduma basta panunotek laeng ti ladawan iti babai a malidliday iti akkub ket kalpasanna nakaisemen, ket sumayaaten ti riknak. Mangparigat ti panagliday. Ngem ti pannakabasa maipapan kadagiti dadduma a nakapadas iti dayta ket makatulong. Kasla aduankayo ti pannakaawat no kasano ti rikna iti malidliday. Kayarigannat’ makisarsarita laeng kaniak ti artikulo.
J. A., Estados Unidos