Manipud Managbasatayo

“Down’s Syndrome” Pagyamanan iti artikulo a “Panangibtur iti “Down’s Syndrome.” (Agosto 8, 1989) Dakami addaankami met iti addaan lapped a miembro iti pamilia, ket nakitami no kasano a ti ayat ti napartak a nangparang-ay kenkuana. Kadagiti Nakristianuan a panaggigimong, agtugaw sadiay a buyogen iti panagpannakkel nga addaan iti bukodna a Biblia ken literatura iti Biblia. Naparegtakami iti kasta unay babaen iti pannakabasami ti maipapan ken ni Suzy ken ti awan sardayna a panagayat ti pamiliana.

L. S. B., Sud Africa

Naisangsangayan, Manangipateg Kalkalpasko pay laeng a nabasa ti Oktubre 8, 1989, nga Agriingkayo! Daytoy a bilang ket naisangsangayan unay. Dadduma a magasin ket mabalin a makaipaay iti adu nga impormasion ngem masansan a baybay-annak a naliday wenno addaan parparikut. Ti Agriingkayo! ibagana ti panggep ti Dios a mangiremedio kadagiti parparikut. Daytat’ naisurat iti mannakaawat unay, napudno, prangka ngem manangipateg a pamay-an. Dandanin diak magawidan ti rummuar a dagus ket itukon dayta kadagiti tattao iti daytoy a komunidad. Agyamanak unay kadakayo!

S. D., Estados Unidos

Kasta unay ti pannakasairko babaen iti estoria ni bassit a Suzy ta nakasangitak. Addaakon iti edad a 70’s, ket ni nanangko addan iti edad a 90’s. Nakitak a nagin-inot ti panagkapuyna manipud iti agsasaruno nga istrok. Bayat ti napalabas a walo a bulan, isut’ kasla maysa a kappasngayen nga ubing, sibibiag ken agang-anges a tao ngem dina kabaelan ti agbiag a bukbukodna. Ngarud mariknak ti kas iti sasaaden ni bassit a Suzy. Mariknak met ti kellaat a pannakarikna ti nauneg a panagayat ken panangapresiar iti nailangitan nga Amatayo, nga itinto maysa nga aldaw aramidennanto ni bassit a Suzy ken ni nanangko a naan-anay a kas iti inrantana a pagbalinanto ti amin a sangatauan.

I. S., Estados Unidos

Steroids Di pay nabayag pampanunotek iti kasta unay ti artikuloyo maipapan kadagiti steroids. (Marso 22, 1989) Ti sioman a kabsatko a lalaki nakagun-od iti dua a medalia iti ’86 a Winter Olympics. Nupay kasta, isut’ saan a napnek nga isut’ kasayaatan; masapul nga isut’ nasaysayaat pay koma. Iti dua a tawen a panagusarna iti steroid, dimmakkel ti bagina iti kagudua manen iti kadakkelna. Amin dagidiay a libra ket solido a piskel. Ngem isut’ nagbalin a managpungpungtot ken agresibo. Isut’ mapan idiay Lake Placid inton 1990 a maipaay iti pannakisalisal iti panagay-ayam. Imbes ketdi, isut’ mangbusbosto iti kalam-ekna iti sementerio. Dagiti steroids ti nangpapatay kenkuana.

A. N., Estados Unidos

Historia ti Relihion Kalkalpasko pay laeng a binasa ti Paset 12 iti serie a “Masanguanan ti Relihion Gapu iti Napalabasna.” Masarakak dagitoy nga artikulo a makapainteres ken aduan ti impormasion. Pangngaasiyo ta ikabildak kadagiti listaan dagiti susuratanyo.

M. K., Estados Unidos

Panangidanondanon Idi nabasak dagiti artikulo iti “Agimtuod dagiti Agtutubo . . . ” maipapan iti panangidanondanon (Hulio 8 ken Hulio 22, 1989), basta rinugiakon ti nagsangit agsipud ta isuamin nga imbagada ket mainaig kaniak. Timmulongak a nangisaknap iti saosao, ket pudno a sinaktanna ti adu a tattao, agraman kaniak. Napukawko ti kasta unay a panagraem dagiti tattao ket dagitoy ti nangisaknap pay iti saosao maipapan kaniak. Dagiti artikulo ti nangtulong kaniak. Diak laeng ammo no kasano ti panagyamanko kadakayo.

J. P., Estados Unidos

Kansion ni Ayat Kabasbasak pay laeng ti artikulo nga “Agimtuod dagiti Agtutubo . . . Ti Ayat Kasla Aya kadagiti Kansion ni Ayat?” (Hunio 22, 1989) Nakasaysayaat ti pannakaisurat ti artikulo ken napno iti pannakaawat. Maawatak nga amin a kansion ni ayat ket makadangran kadagidiay awan pay iti kasasaad a makiasawa. Ngem daytoy kadi kayatna a sawen a dagiti naasawaanen masapul nga isardengda metten ti umimdeng kadagiti kansion ti ayat?

D. K., Estados Unidos

Ti artikulo nagserbi, saan a tapno kondenarenna a naan-anay dagiti kansion ti ayat, no di ket tapno ipakitana nga adu kadagita a kansion ti mangisuro iti saan a pudno ken di nasayaat a panangmatmat iti ayat ken ti panagasawa. Nupay kasta, ti kinapudno a ti maysa a kansion iyebkasna dagiti romantiko a rikrikna dina automatiko a pagbalinen dayta a di makaay-ayo kadagiti Kristiano. Naikkan ngarud dagiti agtutubo ti pammaregta a managpilida koma iti musika a denggenda. Dagiti naasawaan a Kristiano masapul a kasta met laeng ti pannakaiwanwanda.​—ED.

Pagarupko no dagiti kansion ti ayat pudno nga iyebkasda no kasano ti rumbeng a pannakaipakita iti ayat ken no kasano ti pannakaipaay dayta. Daytoy nga artikulo ti nangipabigbig kaniak iti kamaudiananna a masapul nga agtrabahoka a mangparang-ay iti relasion ket masapul nga agtalinaedka iti dayta iti nasayaat ken dakes a tiempo.

M. Z., Estados Unidos