Manipud Managbasatayo

Kinaladaw Kasta unay ti panangapresiarko iti artikulo a “Kanayon Aya a Maladawkayo?” (Hunio 8, 1989) Inrekomendaryo ti pananginanama iti panagur-uray ken ti panangitugot kadagiti babasaen tapno adda magapuananyo bayat ti panagur-urayyo kadagiti dadduma. Dagiti singasingyo napaneknekan a praktikalda.

I. D., Nigeria

Butangero Nupay no diak mabutbuteng a madandanog idiay eskuelaan, pudno a kasta unay ti panangsursuronda kaniak gapu ta ni nanangko nagtaud iti naiduma a pagilian ket naidumat’ itsurana. Ti artikuloyo maipapan kadagiti butangero idiay eskuelaan (Agosto 8, 1989) ti nangibaga kaniak a diak ikankano ida, ket dayta ti nangtulong kaniak. Nabigbigko metten a kaaduan kadagidiay nga ubbing nagtaudda kadagiti nasinasina a pagtaengan ket ipaspasada dagiti pannakaupayda kadagiti dadduma nga ubbing. Maragsakanak ta maawatanyo dagiti agtutubo a kaputotan.

M. D., Estados Unidos

Pannakaibelleng ti Lana Idi nakitak ti paulo a “Naibelleng a Lana!” (Setiembre 22, 1989) agduaduaak bassit. Adun ti nabasbasak maipapan iti pannakaibelleng kadagiti pagiwarnak ken magasin ket masdaawak no ania pay ti mabalin a mainayon ti Agriingkayo! Bueno, kalpasan ti panangbasak iti napnot’ kinapudno, kabbaro nga anggulo ti artikulo, naikkaten ti panagsiddaawko. Linab-awanyo pay ti imbagan dagiti pagiwarnak ken magasin ket impakitayo a ti pudno a sungbat dagiti parparikut ti sangatauan isunto ti baro a lubong ti Dios.

C. K., Estados Unidos

Naisangsangayan a Kasapulan Dandani 14 ti edadkon ket kayatko laeng ti agyaman kadakayo maipaay iti artikulo iti Agosto 22, 1989, maipapan iti panangtulong kadagidiay addaan iti naisangsangayan a kasapulan. Idi addaak pay laeng iti eskuelaan elementaria, addaankami kadagiti tallo a tuleng nga ubbing iti klasemi, ket dagiti tattao agtignayda a kasla dagitoy ket awanda iti tengngada ket pagsasaritaanda ida agsipud ta dida makangngeg. Gapuna dadduma kadakami ti nagtataripnong ket nasursuromi ti makisarita kadakuada. Idi dagiti dadduma nga ubbing nakitada no kasano a nagsayaatan ti mangaramid iti dayta, rinugianda met! Inanamaek a dumtengto ti aldaw a makaipatarusak a maipaay kadagiti tuleng kadagiti kumbension dagiti Saksi ni Jehova.

A. B., Estados Unidos

Historia ti Relihion Agyamanak kadagiti serie iti “Masanguanan ti Relihion Gapu iti Napalabasna.” Makasabetak kadagiti adu a tattao a nagduduma ti relihionda. Dagitoy nga artikulo ket makatulongto kadagiti adu a mangtunton iti relihion manipud iti pangrugian agingga iti agdama.

D. S., Estados Unidos

Basbasaek dagiti serie maipapan iti historia ti relihion. Pudno nga adut’ nasursurok, ad-adu pay ngem ti nasursurok idiay eskuelaan.

B. J., Estados Unidos

Matmatay nga Ubbing Ti sangapulo-bulan nga apokok a babai nagibleng. Isut’ pinagawid ti ospital, ket kimmaro iti inaldaw. Nalagipko ti artikuloyo maipapan iti panangispal kadagiti ubbing babaen ti panangusar iti pormula ti Oral Rehydration Theraphy. (Setiembre 22, 1989) Sinurotko dagiti instruksion, ket iti sumaganad nga aldaw isut’ nangrugin a pimmigsa. Simmardengen ti panagiblengna, ket isut’ naan-anayen a naimbagan.

R. M., Estados Unidos

Panangaywan iti Taraken Agtartrabahoak iti maysa a pagaywanan kadagiti dinguen ket masansan a mangipapaayak kadagiti palawag a mangisuro iti publiko iti rebbengenda iti panangaywan iti dinguen. Maragsakanak a makaawat iti artikuloyo a “Talaga Kadi a Maaywananyo ti Taraken?” (Hunio 8, 1989) iti aldaw sakbay ti dakkel a panangiparang idiay eskuelaan. Dagiti kakaduak naawisda iti artikulo ket kayatda nga usaren dayta iti report iti pagiwarnakmi inton otonio. Masansan mangpili dagiti tattao iti maysa a taraken agsipud ta maayatanda iti dayta iti dayta a kanito. Makaawis, nupay kasta, ti pamay-an ti panangiparangyo kadagiti kinapudno ken rebbengen ti maysa a tao a masapul a tingitingenna sakbay ti panangpili iti maysa a taraken.

C. S., Estados Unidos